約胡定欣訪問,不是忙於宣傳《義海豪情》,就是宣傳《刑警》,兩齣台慶劇相繼播完,才抽出時間。
原來還有一個緣故。兩隻貓太重。灰色的英國短毛呈圓筒狀,叫小虎;啡色的暹羅貓呈條狀,叫小豬。一虎一豬,加埋,重過兩袋米。叫胡定欣一手舉起,舉兩秒,已經青筋暴現。「係呀,所以我無乜幾何帶佢哋出街。」奇就奇在,去到陌生環境,兩隻貓不單只無熬底,仲不知幾咁興奮跑來跑去。「鬼咩,佢兩隻嘢惡到死,要對付佢哋,搞到我都要惡埋一份。」可惜,任主人如何兇狠,始終係得把口,最後仲俾小虎整傷手指。做人,同做貓一樣,都係惡者得勝。

甫士王
胡定欣養貓年資不算長,年半前,從寵物店買來小虎,養咗半年,從胡杏兒的朋友中再領養埋小豬。數數手指,大概是剛拎過飛躍女演員獎,事業有起色之際。「都係一個人住太悶囉,諗住養隻貓來打發一下時間。一開始時,搞到成屋都係貓毛,都幾難搞,慢慢,就發覺養貓真係好有樂趣,我尤其鍾意用部iPhone幫佢哋影相,可能因為影得多,佢哋已經好習慣,仲識擺不同甫士。睇住佢哋由細細粒唔算靚,越大越可愛,就開心。

爭風呷醋
兩隻貓一個主人,唔會爭寵咩?「會o架!基本上,小虎係比較黐我,每次我一返屋企,就會跳上我身,小豬見到,就會跳上嚟用個頭頂小虎。有眼你睇,小虎大份幾多先得o架,邊頂到佢吖!」Sorry,貓不如女人,女人越瘦越有殺傷力,貓不是。「不過,話爭寵,佢哋都係玩吓啫,其實,小虎好照顧小豬,成日幫佢掃毛。」所謂的惡,原來只針對主人來恰,真有個性。

男朋友與貓
本人做記者做了十年,大部分欄目都做過,唯獨未做過寵物採訪。一直最有興趣的題目是,你一個人養狗養貓,好哋哋,如果有朝一日,遇上對象,對象非常憎貓憎狗,但係你又的確好愛佢,點算?係咪似基督徒非信耶穌的不嫁?「咁我又唔會喎!就算男朋友唔鍾意小動物,都無得勉強,我唔需要佢扮到好有愛心咁來奉承我,即使佢直行直過都無所謂o架!只要唔好太抗拒小動物就可以了。」究竟,寵物重要,還是人重要?沒有定案。只可以話,如果身邊嗰個人又對你唔好又對你唔住又唔夾仲唔肯包容你的缺點,咁,一定係寵物重要。


係係係,我知,兩隻貓好可愛,一啲都唔惡,同條題目不符,可以不要次次都望圖作文畫公仔畫出腸嗎?


確係手指損o架!


胡定欣的iPhone作品,擺晒甫士做晒表情,chok過林峯。


現場有狗,隔住玻璃,你睇小虎一啲都唔慌,仲識怒啤。


一去到拍攝場地,兩隻貓走來走去,原來係為咗搵個暖啲嘅地方抖吓。


「小豬真係好得意,個樣夠傻,毛色特別上鏡。捲埋,似個波。」胡定欣說的。

arrow
arrow
    全站熱搜

    stacylife 發表在 痞客邦 留言(0) 人氣()