Dream Car

天生公子命  M-Benz SL500

2012年07月11日 ~~ 第1068期 交易通.搵車快線

每一款車天生都有佢嘅命運,有啲車注定要做牛做馬成為地獄腳車,有啲又會成為有錢人玩物,到劏車嗰日都行唔到幾千 km!好似 M-Benz SL車系咁,天生就係明星、富豪嘅御用出巡車,唔使用誇張車門引人目光,亦唔需要嘈到拆天引擎虛張聲勢,行出嚟就好似一個風度翩翩公子一樣。最新第 6代 SL500剛剛推出,唔單只保持高尚形象,更可配搭多項新設計,令呢位公子都潮起上嚟!面對同場 3、 4、 5代前輩,雖然少咗 Classic味,但公子氣質有增無減。

'03 M-Benz SL55 AMG(R230) Spec.
引擎: 5,439c.c. V8 Supercharged
馬力: 476ps
扭力: 71.4kgm
傳動: 5前速自動,附+/-系統
車身: 4,534× 1,829× 1,295mm
易手車價:$499,000
查詢:星譽認證易手車( 2389 6102)

'91 M-Benz 300SL-24(R129) Spec.
引擎: 3,000c.c.直 6
馬力: 231ps
扭力: 32.4kgm
傳動: 4前速自動
車身: 4,521× 1,811× 1,288mm
易手車價:約$40,000

'88 M-Benz 300SL(R107) Spec.
引擎: 2,962c.c.直 6
馬力: 188ps
扭力: 26.0kgm
傳動: 4前速自動
車身: 4,390× 1,790× 1,300mm
易手車價:約$150,000




要令一款車有優雅公子味道,除車系本身有吸引外表同突出性能外,更要有一定歷史背景先得,就好似醇酒一樣,年份要夠,先更有味道。 SL車系誕生於 1954年,至今已有近 60年歷史,一般車系 6-8年就轉款,但 SL近幾代最少都 10年先轉一次款,今次拍攝最 Classic嘅第 4代(編號 R107),當年生產期更長達 17年,可見廠方對 SL形象有幾重視,好嘢又何需常轉款?
今次借出 R107及 R129嘅車主 Mike:「第 6代推出前有人話佢個樣唔吸引,似放大版 SLK,講真驚喜度一般,不過復刻經典車頭同用鋁合金偷輕車身就值得一讚!」 SL500只重 1,785kg,比上代輕咗 125kg,而 SL350更只有 1,685kg,比上代輕咗 140kg,足足 2個成年人咁重!

代代經典


SL可以話每一代都加入新元素, 1954年初代(編號 W121)最爆反而唔係開篷款,而係配用鷗翼車門嘅永恆經典 300SL, 1963年第 2代(編號 W113)就用咗當時極之先進嘅燃油噴注引擎,可以配軟篷或硬頂,成為當年有錢仔指標,級數比當年紅極一時嘅 MG或 Triumph等飛仔車高幾班!而今次拍攝現場最古老、 1972年推出嘅第 3代(編號 R107),當年適逢香港經濟起飛,夜夜笙歌嘅夜總會門口梗有幾部!到咗第 4代(編號 R129),首配電動軟篷,按一個掣就可以開閂篷,成為中港商家晒碼頭用車,亦都可以話最冇公子味。 2002年推出嘅第 5代(編號 R230),只有 10年歷史,外表暫時都未 out,而且首次用電動硬頂,揸出嚟仍然有相當收視。


初代 SL編號 W121,備有硬頂同開篷兩個型號,硬頂版就係經典 Gullwing!


第 2代編號 W113,採用當年極之先進嘅燃油噴注引擎同直燈設計。

天王、天后、影帝齊撐


話 SL有星味真係冇講錯!林寶、拉利外表太揚,好多星級用家都怕人知,但 SL就低調得來有格,接至愛或做腳車都一流,搵一搵資料,全部天王級用家!


舞王車女斷正
郭富城被發現車熊黛林就係用 SL55 AMG!對於阿王呢部車唔算貴亦唔大馬,做腳出入又低調,車女一流!可惜狗仔隊更勁,一樣認出係阿王名下靚車,即時戀情曝光。


金句王周街泊
黎明早喺 05年已用緊 SL350,當然有用嚟車下基兒,但亦當係腳車,多次被記者發現用部車去 shopping或開餐,仲要周街泊車。


憂鬱影帝獨用
朝偉平時極之低調,但用車一直係 M-Benz擁躉,以前有 G-Wagon又有 C36 AMG,近年就用 SL55 AMG代步,絕少開篷,多數都係出街搵吓食買吓嘢,你想見到佢載嘉玲都難。


天后大肚齋坐
千嬅未生 B之前同老公買咗部尾期 facelift SL350,不過就因為大肚好少揸,多數由丁子高做司機車出車入。以前千嬅都用 Lexus SC430,改用 SL350梗係更安全同襯番身份啦!

瑰麗如昔


減輕車重對 SL來講其實有迫切性,全因自第 4代開始用上電動軟篷、第 5代使用更重嘅電動硬頂後, SL嘅定位就愈來愈似一部巡航 GT車,欠缺咗雙座位開篷跑車應有嘅靈活性,亦都加重引擎負擔,人人講環保慳油,停步不前只有沒落,所以用鋁合金車身係唯一方法,減咗車重仲可以造大啲車身,現時比上代 R230長 50mm、闊 57mm,空間上稍勝一籌。新 SL外表其實係多代以嚟最具跑車味一款,車身多處都展現出肌肉線條,侵略性大了一點,慶幸修長車頭仍得以保持,令整體外表仍瑰麗如昔。筆者會視今代 SL為重拾光輝歲月嘅一代,全因車身套用大量經典第 3代嘅元素,最正係鬼面罩用番上下分割式再加一個大章喺中央,呢個經典 M-Benz跑車徽號,喺 SL車系上已失落 23年!




今代採用全鋁合金車身,彌補車重缺陷。


3代 R107
當年車廂要有大量桃木裝飾先叫豪華!


軟篷要用特殊工具先可以開關。


4代 R129
R129車廂同當年嘅 S-class同出一轍,難怪成為廠商最愛跑車。


超巨型防滾架可以手動升起,值得留意當年係 4座位設計。


5代 R230
其實上代 SL車廂仲未 out,而呢部由星譽借出嘅 SL55 AMG,靚如新車一樣。


上代放棄後座,但後方仍有極大儲物空間。

舒適典雅


SL外表要優雅之餘,車廂都要有最好舒適性,先可以擔起旗艦車系之名。車廂套用咗大量 SLS AMG類似嘅布局,中控台上嘅十字形冷氣出風口正正同第 3代一樣,亦會成為未來所有新款 M-Benz嘅指定設計。新車保留雙座位格式,用家可以為座位加配 AIRSCARF頸部暖風系統,座椅承托力及空間都一流,背後又有活動式擾流網防止亂流捲入車內,舒適性同 S-Class不相伯仲。
今代個電動硬頂有 3款可以揀,分別有同車身顏色金屬頂、玻璃車頂,或可變色 MAGIC SKY CONTROL車頂,不論咩車頂都好,成個活動車頂框架都用鎂合金製造,比上代輕咗 6kg,令車身重心低啲,轉彎時擺動更少。


6代 R231
駕駛艙採用 SLK及 SLS類似嘅設計,最醒神係十字形冷氣出風口,夠經典!


座位有多方位調校,包承力極好,如有需要加 AIRSCARF系統,盛惠$7,300。


近年少見 M-Benz出品咁有味道,忽然喺軚盤刻上潦草英文名。


表板布局清晰,筆者最欣賞個波檔顯示,簡單易睇!


測試車雖然未配用 MAGIC SKY CONTROL車頂,但玻璃頂一樣吸引。

安全爆燈




開篷車最脆弱一定係車頂,新 SL嘅 A柱用更堅固鋼管,以防翻車時保護車廂,而座位後亦設有彈出式防滾架,比第 4代 SL個巨型防滾架瀟灑得多,安全氣袋都有改良,可覆蓋更多上身部分。此外,主動安全性亦有所提升,加入 ADAPTIVE BRAKE自動適應剎車系統,可自動比對速度同踩剎車腳踏力度,從而作出最合適制動力,急剎時迫力燈仲會快速閃爍提醒後面車輛司機。最勁係 Post-crash功能,如不幸發生意外,門鎖會自動解除、死火燈自動開啟、兩側窗會自動降低 50mm保持空氣流通,軚亦可以向上移動,方便救援。

M-Benz SL500(R231) Spec.
引擎: 4,663c.c. V8雙 Turbo
馬力: 435ps/5,250rpm
扭力: 71.4kgm/1,800-3,500rpm
傳動: 7前速自動,附+/-系統
車身: 4,612× 1,877× 1,315mm
車價:$2,062,000起
查詢:仁孚行( 2895 7339)

身手矯捷


新一代 SL可謂將前兩代笨重行車表現完全修正,除因為車身輕巧之外,新車加入 Direct Steer系統亦記一大功勞。先係轉向比例比一般車快,一般車盡左至盡右軚,約要 2圈半,但 SL只需 2圈,有利連續攻彎,而 Direct Steer就可以感應車速調節扭軚力度,慢車泊位時軚感變輕,而高速行車時,軚感會較實,增加穩定性同敏銳感覺。筆者喺飛鵝山極窄山路試車,完全唔覺車身龐大,入彎時可感到車身指向中性,同場嘅 R107及上代 R230嘅 SL55 AMG都未有咁嘅輕巧表現。


由於車重大幅減少,令彎路表現有好大改善。


車頭保留修長設計,令座位設於全車中心,有更好前、後車重比例。

不慍不火


今次測試嘅 SL500配全新 4,663c.c.V8雙 turbo引擎,有 435匹馬力,表現雖然唔及同場上代 SL55 AMG咁猛烈,但低轉扭力強得驚人, 1,800-3,500rpm已全數發出 71.4kgm扭力,加速凌厲之餘,亦有極之平順表現,山路上輕柔向油門施壓,車身就隨隨而上,大扭力引擎再加上緊密 7速波箱,根本視傾斜山路如無物,表現輕鬆到好似行平路一樣,呢個正正係 SL車系應有嘅不慍不火表現,公子就係要優雅到底嘛!更大馬力、加速更快嘅 SL63 AMG或 SL65 AMG可能過火咗啲。


全新 4.7公升引擎表現深不見底,馬力比上代增加 12%,但耗油減少達 22%。


7G-Tronic波箱快速而緊密,同引擎配合得天衣無縫。


新 SL車尾首次用長方形尾喉,外表有型之餘,聲音出奇低調。

撰文:袁國基
攝影:葉偉豪
協力:曾慶鸞

stacylife 發表在 痞客邦 留言(0) 人氣()