年輕一輩聽見以往最大路嘅銀灰色車身都會皺眉喊悶，但 smart偏偏大唱反調，推出 smart fortwo edition greystyle玩灰色特別版。原來只要加些少黃色作點綴，灰起上嚟都真係好 smart。記者：許維雅攝影：譚盈傑Model： CC
大玩灰調 反高潮 放大圖片 
■哈哈笑鬼面罩令車頭充滿陽光氣息。
某啲車款會比較着重外表大於性能，外形 cute cute哋嘅 smart係其中之一，所以玩顏色配搭可以話係佢哋嘅強項。不過最估佢唔到反而係今次推出嘅特別版，並唔係乜嘢鮮艷怪色，而係用灰色做主角 smart fortwo edition greystyle。以為灰色會好悶？設計師卻醒目地以淡黃色點綴車身內外，灰黃配嘅效果不但帶來驚喜，更令 smart剔走慣性可愛味，多添幾分型仔帥氣，應該可以吸納一眾原本嫌佢太 cute嘅年輕男生垂青。再講，車身顏色並唔係普通常見嘅銀灰色，而係特別調製嘅啞光灰色面漆，令整體感覺帶點 Cyber味道。話明係特別版，印有 greystyle字樣嘅淡黃色側鏡罩更係車身外殼畫龍點睛嘅所在，喺視覺上顯得活潑好多。加埋同樣係 greystyle版獨有嘅灰色 15吋 6輻式合金輪圈襯番車身，呢部 smart仔突然 man咗好多。
放大圖片 
■幾欣賞車門無窗框，一開門就知型好多。
放大圖片 
■全景式天窗車頂夠晒美觀。
皮棍軚環 無膠味
貫徹 greystyle版嘅灰黃配宗旨，內櫳佈局亦唔例外，皮椅椅背嘅一大幅黃灰色圖案織布成為車廂焦點，再以黃色車線點綴的真皮椅及中控台，設計夠晒 Trendy。此外，淡黃色轉數錶及時計、繡上黃色 greystyle字樣嘅地氈、兩側襯上織布嘅車門都係呢部特別版先有，再送埋真皮波棍及軚環，令向來感覺膠膠哋嘅 smart貴氣得多。至於引擎就跟以往 passion coupé型號一樣，一公升引擎可輸出 84匹馬力，細小輕巧嘅兩座 smart夠用有餘，但每當上大斜路及起步時，總覺得波箱反應唔夠迅速，好在 softouch自動變速系統總叫做彌補到呢方面嘅不足，將加減撥片拍低兩個波，車仔即時爆畀你睇，沿途喺清水灣道上斜、入彎，從未試過咁有信心，因為唔使再驚對頭大車過晒線挨晒過嚟。
放大圖片 
a.淡黃色側鏡印上 greystyle字樣。
放大圖片 
b.若果灰色 15吋合金輪圈嘅形狀立體啲，可能會更好。
放大圖片 
c.皮製波棍係特別版先有，點解唔用黃色？
放大圖片 
d.用加減撥片上斜起步，反應會更理想。
放大圖片 
e.繡上黃色 greystyle字嘅地氈隨車附送。
放大圖片 
f.以黃線縫製嘅中控台加埋同色嘅轉數錶及時計，配襯得宜。
放大圖片 
g.車門亦有織布點綴，設計感覺統一。
規格 放大圖片 
引擎： 999cc直三 Turbo馬力： 84hp/5,250rpm扭力： 120Nm/3,250rpm傳動： 5前速半自動波售價：$163,800查詢： 3428 8666（ smart HK） 
■ greystyle版外形不變，卻換上啞光灰色面漆。
留言列表
