曬機自拍
有啲人對鏡自拍嘅主題唔係自己,而係手上新買嘅相機,比如左邊位龍友拎單反扮晒 pro、右邊個潮人冇錢買 Leica都最少出動 NEX-7遮面自拍。

Geek友講場

十大熱門相影靚先好 Post

2012年07月18日 ~~ 第269期 Face

早排 facebook大搞 timeline革命,用家鬧完一輪,最終都係繼續 post相、改 status。最近有篇網絡文章叫《香港人最喜歡分享的十種相片》,講中晒香港人「鋪相」習慣,有 10類相係我哋不自覺咁經常放上 facebook。「鋪相」冇罪,不過影呢 10種相,都有分影得好與壞,忽略一啲要點,分分鐘俾人笑到面黃。即教十大熱門相秘技,搶盡朋友 like!

香港人最喜歡分享的十種相片




原文中呢十種鋪相習慣分別係:拎相機遮面自拍、機場顯示板、新相機/手機、姊妹/伴娘自拍照、一堆演唱會門券、馬拉松號碼布、自家飯菜、藥、 Starbucks杯、三文魚刺身,引起好多港人共鳴。

最愛 Share Photo01
舉機遮面對鏡自拍


10大分享相之中,最多人關心,最多技巧講嘅就係舉起部相機,半遮面對鏡自拍!
香港不乏愛 chok之人,無時無刻拎住部 iPhone自拍,如果畀佢哋見到面全身鏡,仲會一面照鏡、一面自拍。宅男唔靚仔,會用部單反遮面;自命型仔索女,部相機都總係會高舉貼面, chok住影。但係,呢種對鏡自拍法如果唔揀啱場地,背後大塊布景好易出事,隨時製造無辜受害者,甚至淪為笑柄,即睇!

星級示範




許志安唔知係咪襯咗好多套衫先影呢張自拍呢?破綻就係門柄上個衣架,加上成張落咗黑角 filter,唔好睇!


韓國女團 T-ara成員居麗喺排舞室對鏡自拍,背景夠晒清,個 iPhone case又好靚,原來韓星唔一定都用 Samsung同 LG嘅。


查實要影自拍影得靚唔一定企直直,學 Jeana屈坐一角加埋抑鬱神情,加埋黑白效果,性感又有美感。


明星賣樣,唔使學宅男用機遮面,但係阿徐都係拎到部 iPhone去到頭咁高,原來係因為要高抄!咁樣影的確型啲又瘦啲,姊妹學嘢啦。

着衫嚇親


自拍造型當然唔可以忽略,唔係個個都係阿 Y或者臣嫂,識襯到靚一靚影相,不過好似呢位仁兄着孝服自拍,結果咪搞到成為高登仔改圖對象囉!





傷及無辜




玩自拍搞到變封面,強國代表有潘霜霜同張馨予,日本代表就有 AKB48成員。以為自拍大頭就實冇死,但竟然揀係後台玩,搞到隊友露晒春光,做埋國際新聞,爆得多!
NMB48嘅松田刊, V字手下面驚見一對豐胸,有傳係隊長山木彩。


剛去完台灣嘅北原里英(右),出賣咗幼兒身形嘅石田晴香,露晒 bra同 under。

最愛 Share Photo02
姊妹合照必殺技




做姊妹,最開心有人畀錢幫自己扮到靚一靚,一行十幾人着到選美咁款出巡,難怪呢類姊妹合照,成為十大熱門相之一。之但係十隻手指有長短,個個着到一式一樣,一拍埋就好易出事,即睇專業 model教你影相自拍絕招,下次再影姊妹相俾人 tag上 facebook,肯定唔使做綠葉。

姊妹示範作


除了自拍,成班姊妹一字排開做人肉布景板影相,亦係婚禮指定動作。睇兩位大明星擺酒結婚,姊妹團功架各有高下,偷師好機會。


千嬅平民姊妹
天后千嬅擺酒,一班姊妹朋友應該都係圈外人,影大合照難免犯下唔少錯誤,好似企到離行離列、雙手亂擺、雙腳分開企咁,睇見嚇人。


梁靖琪星級團
睇番梁靖琪班姊妹,粒粒皆星夠晒養眼,特別係前排班姊妹好似夾過咁,動作一致到似足選美咁。留意周家蔚(下排左 2)唔理上排鏡頭,低番個頭落嚟,即時 sharp晒!


S.H.E衫出事
影姊妹相,最忌件衫出事,好似 S.H.E Ella(右)同 Hebe(左)件衫整泡泡形,成個身形冇晒,明明側身都成條羅馬柱咁,好彩二人甜樣搭夠。

Waye Waye自拍心得




如果一大班人影,大面人就唔好揸機,幾大縮到後面。如果真係要拎機,部機舉高到 45度角,隻眼向上望睇落大啲;想塊面瘦就記得要低番個頭,咁就實變 V煞。

錯誤示範




比如黑澀會呢張合照,室內影相用閃燈,搞到中間無情情多咗道佛光。左邊嗰位明知自己包包面,仲要舉機,咪影到自己更加肥囉!

最愛 Share Photo03
出遊必影機場閘口


原文中十大熱門相片之一,竟然係一塊毫無裝飾嘅機場登機閘口牌,內裏向朋友炫耀「我又飛喇」嘅深層意義,遠比相片內容重要,所以我哋都推遲喺第 4版先講。既然出發前影低登機閘口牌係指定動作,人影我又影,好易有比較,咁就唔可以馬虎,一定要影得靚靚先好鋪。到底一碌柱可以點影?即睇示範!


影呢條呆板柱,要影得靚真係好睇技巧,學呢位網友咁構圖之外,仲可以低抄上埋天花板,避開現場的雜亂環境,靚!


好多人出遊係坐夜機,但係用玻璃幕採光嘅機場即時暗得多,好易因環境太暗無法對焦,下次影相時記住留意。


影柱都可以有意思嘅,比如 AKB48總管 TGSK先生,上次來港返東京時,咁啱去正 48號閘,呢啲又真係要影低。

項明生:「影條柱冇驚喜!」




知名旅遊作家 James Hong次次外遊都影好多相放上 fb,但就絕少會影柱,佢話:「畀我就唔影呢個閘口告示牌啦,因為影同睇嘅人都冇驚喜。反而我最近公司去沖繩,我就會影條苦瓜畀人估吓,影嘅人可以動吓腦筋,睇嘅人又冇咁悶。」

最愛 Share Photo03+
外遊系列公仔做 𡃁模


成功示範
天公造美,係旅行影相時最好用、且免費嘅攝影利器,好似呢張相咁,巴黎當日勁好太陽,機主用 1/500、 f/7.1細光圈,毛公仔同背景嘅鐵塔都咁 sharp咁鮮。

其實影條柱,真係冇乜技巧可言,家吓《 FACE》賣大包,教埋你影柱起飛後,到外國點樣影靚相繼續晒命。近年,好多朋友仔都喜歡帶埋心愛公仔當 𡃁模,幫佢哋喺景點不斷影影影。呢類靚景加可愛公仔嘅相,一鋪上 facebook,話咁易俾人爆 like!但係要影靚景加公仔,唔係用部靚相機就一定掂,要加少許技巧,至可以拎滿分。

Tips大公開




距離要遠
影相時,相機同公仔之間一定要分得開啲,情願變焦 zoom番近仲好,否則好多 DC會自動跳去微距 mode,咁後面背景肯定矇到乜都睇唔到。學 model咁將 Kitty有幾遠擺幾遠,就可以減少問題。

公仔忌細
去旅行無理由帶你晚晚攬住隻大公仔去,我明嘅。不過帶到太細隻,就擺到幾遠都無用,企太遠又搞到公仔太細,太近又變到影微距咁,好難影到靚。


要影到隻細公仔成個人咁大,相機距離冇辦法拉長,一對焦即時變到微距 mode,好一個聖城起晒霧咁樣。


解決方法係將對焦擺係公仔同建築物中間,但係就會令到公仔同建築物都唔夠 sharp。




唔好貪心
公仔夠大,切忌貪心影到大大隻,唔係一樣得個矇字之外,仲擋住背景,搞到無人知你去咗邊。

光圈要細
其實要前後都清,最簡單係用手機影。如果想像素更高,一定要用相機,就要校細光圈,避免營造出淺景深。校到個光圈咁細之後,避免張相太暗,就一定要係光線充足的戶外環境至影得靚。


較大光圈影相,連樹影都矇到無形狀。
光圈 f/4快門 1/1000


用細光圈再影一次,後方樹形清晰可見,只係相片略暗。
光圈 f/25快門 1/60

項明生推介 app


旅行 post相最緊要係即興,返到酒店開晒 photoshop執相,當夜先 post張大白天嘅圖,冇晒意義。所以 James推介兩款 app,畀你即場簡單執一執,加啲效果,即賺 like!




Line Camera iOS/
Android Free
我時常要用微博,一條 msg只可放一張相,用佢內置功能,或者用砌相 apps,都唔係咁靚,最近發現 Line Camera除咗可以加公仔,原來可以畫中畫砌相,比如個天空太單調,可以加多張相入去。




Photoshop Express iOS/Android Free
手機影相一般唔夠光,想嗱嗱聲影完就放上 facebook,用呢個免費 app簡單一推,成張相即刻光晒!

最愛 Share Photo04
影靚三文魚升呢高品味


早排有外國 blogger好出奇咁話覺得亞洲人食飯前必先影相,係好有趣嘅事。箇中樂趣鬼佬真係唔會明,但就俾《香港人最喜歡分享的十種相片》一文輕易點破, 10大之中有 3位都係「食」有關,其中包括家常便飯、咖啡、同尋常不過嘅三文魚刺身。
三文魚入選除因原文所述自日本核事故後,影低食三文魚相,就等於「證明了我們必死的決心」,筆者仲覺得當中嘅核心價值,係可用最低消費去影出最高品味。金太郎一碟三文魚刺身只係廿幾蚊,但只要影得靚,鋪上 fb隨時有喺銀座高級料理進餐嘅感覺,印證到黃興桂「蔗渣價錢踢出燒鵝味道」嘅神論。既然係咁,就一定要學吓點影得靚喇!




成功示範
刺身細細碟,好多時要哄到相機好埋去影,首要係唔好開內閃,否則實爆!部機有手動 mode的話,不妨校大光圈同推高 ISO,盡量曝現場光,影出嚟色水會自然啲,亦有埋淺景深效果,更加突出三文魚主體。




忌影全相
影晒成隻刺身碟,構圖唔會靚;若隻碟同伴碟都唔靚的話,影出嚟更加霸氣盡失,所以要學成功示範咁影 close up。




忌用冷色
三文魚一定係紅噹噹先靚,所以相機不妨選用暖色溫 white balance設定去影;用手機影就千祈唔好亂用 fitler,萬一影到呢張變晒色就真係似中咗輻射!

惡搞明將潛力相


食日本刺身嚟表示唔怕輻射(其實香港多數三文魚嚟自挪威),大有話去挑戰明將壽司勇氣同情懷!呢期 fb就瘋傳緊話係明將最新出品嘅可樂糖軍艦相,姑勿論真偽,發掘或創作明將千奇百趣壽司,好有潛力成為港人第 11大分享相片!


冇耐前 fb仲瘋傳過明將另一極品啫喱糖軍艦嘅相,雖睇落冇乜破綻,但至今都冇人證實到真定假。


留意可樂糖軍艦嘅紫菜邊殘留住沙律醬,所以好多網友認為係拍攝者用正常軍艦改扮而成,屬「假膠」之作。

最愛 Share Photo05
住家飯相晒溫馨




打入十大相嘅食物,仲有自家飯菜。除非屋企有個廚神,否則啲 餸一定冇餐廳整得咁靚,初任人妻嘅傑作更可能 燶晒添!但無論自願定被迫鋪呢啲相上 fb,雖然目的都係晒家庭幸福居多,但都不能不注重賣相,若你將老婆或老母煮嘅 餸影靚幾十%,喺 fb得多啲人 like,你屋企實會更加和諧,所以更加要學影靚住家飯!




成功示範
屋企燈光通常較暗,影相最緊要補光,好彩多數天花都係白色,相機可加裝機頂燈,朝天射光再折射落飯 枱,光線就夠平均兼柔和。

忌睇電視
本例兩張圖係同一間屋、同一燈光、同一部機影,右圖因為被電視強光影響測光,影到食物又暗又黃,所以影住家飯時,唔好開電視!








忌 枱面亂
冇酒店級靚 枱布鋪 枱唔緊要,保留普通木 枱紋更有住家 feel,但報紙就核突啲,最好影完先鋪, 枱面亦應執企理啲,唔好咁多雜物入鏡。

Blogger Ivy
掌握光線最緊要




我自己最喜歡用側光影,因正光影的話,食物的細節會不見,主體亦會變得太平,全逆光就可能對焦點會太暗,好難控制。而我喺餐廳唔鍾意用閃燈,因怕騷擾到人,通常會用 ISO 800同 f4-f5光圈去影。

最愛 Share Photo06
Starbucks偽中產榮耀


最後入圍嘅食物相係 Starbucks隻杯!其實同影三文魚嘅心態近似,高登巴打早就形容影 Starbucks杯係「最高性價比的偽中產表演」,就連向西村上春樹都認同,話「以四十元不到的價錢,就能夠告訴給幾百位朋友知,自己能夠跨過 Starbucks的高消費門檻。」正所謂「心態決定境界」,影呢隻杯冇乜技術可言,鋪相後自我感覺良好即可,如果想再 chok啲,可以加本英文小說,唔好擺向西本書囉。


向西將有新作《雜文.西》喺書展推出,收錄咗寸爆偽中產嘅〈我在 Starbucks射了出來〉一文,所以封面都惡搞 Starbucks logo, slogan仲叫做「射破虛偽」,寸得好應!


年頭向西首作《一路向西》出版,就有 fans專登拎本書去 Starbucks同隻杯影合照,可見呢款相幾咁深入民心!

最愛 Share Photo07
新 gadget要連盒影


10大中嘅最後 4種相,就係日常遇到嘅物件,但當主人翁抱着高登反話金句「。絕。不。是。炫。耀。」嘅心態去看待,就即刻成為絕對值得影同鋪嘅相!
使咗幾千蚊買件新 gadget,相一出,實有大把 friend問你買咗幾錢、好唔好用,簡直係重要聯誼題材。不過呢啲相唔可以影得太靚,否則會俾人懷疑你 download網相扮買咗機,更重要係一定要連埋機盒影,咁先似「開箱文」。


連盒畀 like


冇盒 dislike

反面教材




Angelababy違約搶先喺微博貼未曝光新機 GF5,搞到俾 Panasonic追討千萬賠償。雖然讀者都冇乜機會做代言人,但故事教訓我哋鋪相前記得自我審查,睇吓成張相有冇唔見得光!

Share Photo08
黃牛相唔好鋪




演唱會飛相要選擇性咁鋪,只影兩張飛,既可凸顯你聽歌品味,又可暗示你成雙成對去睇,恨死班毒男盛女 friend。但啲成疊黃牛飛嘅相就無謂影,一來會引到朋友個個搭膊頭叫你平讓,二來萬一炒 燶時會被人恥笑,唔鋪好過。

Share Photo09
編號布要清楚




有實力跑馬拉松,又點忍得住唔上 fb公告天下呀?但呢張相影去號碼布遠比閣下尊容重要,所以一定要影得清清楚楚。就算你顧住私隱要遮咗姓名,但都唔好遮到 10km、半馬、全馬啲字,跑全馬嘅光榮比 10km大好多㗎!

Share Photo10
貼藥博慰問




筆者非常認同原文中話睇完醫生貼藥相,可以博到人同情,喺 fb慰問你兩句(女仔仲有人 like),更有證據畀老闆睇,你唔係詐病。其實小病是福,可以有得小休,都係一種另類「炫耀」。

奴 Comment


其實我都有影機場條柱!我仲會加濾鏡、留意角度。出外食飯除非食物有特色,我都盡量少影,反而支持影自家飯,回家食飯係樂事,值得錄低!你問我心目中的第十樣係乜?香港難得有藍天、出現 double rainbow當然要珍惜,我成日會影低佢為自己同朋友打氣!


《 FACE》 Gadget版監修人
903 DJ Donald



撰文:鄺浿鏇、陳兆奇
攝影:傅新發
模特兒: Waye Waye、 Kabby、 LaYing@GME

    stacylife 發表在 痞客邦 留言(0) 人氣()