3月中着鬆身褲
本來就生得瘦削的 Ada雖然未見肚，但有了 2個月身孕的她月中出席《越光寶盒》首映時，穿鬆身褲的腰部已經比以前圓潤。"
大肚婆
2萬蚊養和霸房 蔡少芬 10月生得
2010年03月31日
1個星期之內結婚離婚新聞齊齊爆，鄭中基同蔡卓妍呢一 pair係就係令人惋惜，不過今年娛樂圈其實喜事亦接住嚟。
繼黎姿證實懷上孖胎後，結婚 2年嘅好姐妹蔡少芬（ Ada）亦傳出有喜！本刊更獲得獨家消息，當事人連 2萬蚊訂都落埋，在三月初 book定養和私家房， 10月生得。
雖然同 Sa基一樣講大話唔肯認，不過有餡 2個月嘅 Ada都係怕 BB小器啫，明嘅！明嘅！
一向瘦蜢蜢、說話又倔到冇彎轉，本月 13日，蔡少芬出席電影《越光寶盒》首映禮時，明顯發福連腰都隱埋形，被傳媒追問是否懷有身孕時， Ada就以內地拍劇好食好瞓發福為由不肯承認：「老公要成日上內地拍劇，我哋有努力過造人，不過呢啲嘢唔係話想就得，計劃要推後！」話到明恨做媽咪。
微凸肚
週日（ 28日）往成都《第 14屆華語榜中榜頒獎禮》領取「最佳電視劇女演員」大獎時， Ada小腹更比兩週前明顯凸出。新浪網圖片
收收埋埋拍拖 4年半， 08年 1月結婚前夕，蔡少芬才主動發信公告傳媒，自己與內地小生張晉修成正果。
豐儉由人
養和私家房有 47吋大電視有得上網又有馬場靚景，生完同 BB靜養一流。
跑馬地養和醫院甚受明星和名人歡迎，小至頭暈身㷫感冒發燒、大至賭王何鴻燊跌傷住院 7個多月，張栢芝、盧淑儀等生仔產檢，都係幫襯養和，貪佢除咗名醫設施齊備，仲服侍慣名人巨富，私家房要幾豪有幾豪、保安要幾嚴有幾嚴。剛剛生完女嘅咪精徐淑敏埋單 20萬，外傳李澤楷幫又大肚嘅梁洛施都 book定頂樓至豪華 Ellen Suite，淨落訂都要 20萬， Ada雖然暫定$32,200套餐，事實上呢個只不過係自然分娩 3日 2夜最基本收費， 8個月後實質開刀定自然分娩、用邊個醫生、麻醉師、紗布同兒科醫生逐樣計，一般產婦出院時埋單 10萬走唔甩。
百發百中
雖然兩公婆幾乎全年分隔異地拍劇，不過張晉和蔡少芬都一樣好勤力 update blog講吓近况，農曆年前， Ada（右圖）宣布從南京回港，張晉（左圖）就話自己同老婆過完年又要返去拍《一代宗師》，造人時間雖然唔多，最緊要真槍實彈百發百中！
春節播種
今年 9月就滿 37歲的蔡少芬啱啱加入高齡產婦行列，造人計劃點可以再推後！話就話冇時間造人，其實 35歲的張晉與蔡少芬今年 1月剛剛結婚 2周年，尚屬新婚甜蜜階段，加上年中各有各忙拍劇分隔兩地，更加小別勝新婚！
據悉， 2月初蔡少芬終於完成拍攝 3個月的內地劇《西津渡》從南京回港，而正在瀋陽趕拍王家衛《一代宗師》的張晉亦在個人網誌公告天下，剛過去的農曆新年終於有得收爐回港過年，當然努力造人啦！
養和留名
據知情人士透露，一直與張晉不設防的蔡少芬月初發現身體有變化前往求診，獲得醫生證實懷有身孕，預產期是今年 10月，時間正正與農曆新年不設防短聚的兩公婆吻合。
由於近年內地孕婦來港產子數量激增，更大多數在私家醫院分娩，蔡少芬聽取身邊友人意見，甫證實懷孕，便立即親自在跑馬地養和醫院 book定私家產房，更落定 2萬訂金，保證到時同 BB有房住。老公張晉過完年就飛返《一代宗師》劇組，至於一向工作多產的 Ada，除了下月中推出的《飛女正傳》便再沒有工作安排，睇怕都係穩穩陣陣停工養胎等做媽媽！
蔡少芬：我要生 4個！
去年 8月 24日，蔡少芬和張晉齊齊接受鳳凰衛視主持魯豫訪問，大談二人拍拖和結婚趣事及夫妻相處之道，兩公婆更 sweet目標一致表示隨時 ready做父母。若果 Ada當真如現場所講生 4個，真係要加把勁至得。
我有時候想生 2個，有時候 3個，但是我問過專家，排行中間的小孩會被忽略。今天坐車來這裏時，我突然想生 4個！
甚麼時候生孩子？我覺得現在就是適當時候！
我希望第一個是女孩，因為女孩細心又能幹，像我一樣！
我的兒子一定要像爸爸一樣學武術，因為吃過苦的小孩將來能力比較強。
7虎媽
今年唔少娛樂圈媽咪都想生個虎仔虎女，有老又有嫩，有佗頭一胎亦有加碼力追，由年頭喜到年尾呀！
盧淑儀
4月幫克勤生第二胎
張栢芝
5月出世嘅囝囝好腳頭，旺到霆鋒攞咗「第四屆亞洲電影大獎最佳男配角」。《壹週刊》圖片
趙薇
一直匿埋喺新加坡等 5月生嘅趙薇死口唔認懷有龍種，但大肚相曝晒光冇得假。
黎姿
又改名又傳使 30萬做人工受孕，終於證實７月生孖胎。
呂麗君
之前被指打入冷宮放逐到英國的呂麗君，原來靜靜雞有喜，盛傳今次仲係慈姑椗。
趙頌茹
貧賤夫妻周永恆同趙頌茹要快撲水，阿 Yu更加連 Amusic份工都唔敢辭。
梁洛施
去年 4月先生咗長治，話咁快又傳懷有龍鳳胎，預產期為 10月。 
留言列表
