香港政府對菲律賓發出黑色外遊警示已接近四個月，其間零港團選擇到該地，旅遊保險更加唔受保，偏偏吳浩康、莊思敏、李彩華、趙碩之、李卓庭、EO2等唔怕死，竟然走去距離首都馬尼拉僅個幾小時車程的克拉克做騷，成為首批去菲律賓「冒險」的香港藝人。
人在險境，吳浩康同莊思敏拍拖行街，亦要持械保安護駕，恍如王室出巡。

一呼八應
今年八月，馬尼拉發生門多薩槍殺香港人質慘劇，八名港人慘遭殺害，香港特區政府於八月二十三日對菲律賓發出黑色外遊警示，提醒市民不應前赴當地，而身在當地的旅客應留意人身安全，提高警惕。
慘劇發生至今四個月，香港仍未撤回菲律賓的黑色旅遊警示，由於旅遊保險都唔受保，在此情況下，赴菲的港人無疑「搵命搏」，但八位藝人為搵錢，竟不理人身安全，冒死去菲律賓旅遊特區克拉克做騷。
「敢死隊」成員包括吳浩康（Deep）同女友莊思敏（Jacquelin）、李彩華（Rain）、趙碩之（Wylie）、李卓庭（Eunix）、EO2四位成員彭懷安（Eddie）、王志安（Otto）、洪智傑（Osman）及謝凱榮（Eric）共八人，為十二月十八日晚在當地舉行的「克拉克溫泉渡假城六周年」活動，身先士卒。
今次一呼「八應」，全是俾面老闆林英樂。人稱積哥的他，號稱亞洲新一代賭王，除了經營賭場生意，還涉足酒店、飲食、郵輪同娛樂事業，圈中人脈甚廣。冒死一行人分為「有啲驚」同「好鬼驚」兩種。「有啲驚」代表有吳浩康、莊思敏同EO2，眾人上週六（十八日）抵達克拉克，但留一晚就走。莊思敏因擔心男友安危，甘願陪行，一於驚就兩份。
「驚都冇辦法，搵錢緊要呀！」吳浩康說。相比男友，莊思敏大膽得多。「呢度係旅遊區，治安好好，如果逗留馬尼拉就會驚啲。」

警察陪拍拖
藝人捨身冒險，老闆積哥亦做足安全措施，由他們甫抵達菲律賓，即派出警車開路，還有持長槍警員沿途保護，另有保安跟出跟入，大陣仗到恍如王室出巡。
保安周全，原本提心吊膽的吳浩康同莊思敏亦放下心頭大石，兩人由持槍警員及兩位保安護航下，拍拖到附近的SM商場購物。雖然有持槍警員及保安陪同，但守衞商場門口的保安員，依然要吳、莊二人接受金屬探測，以防萬一。

自閉酒店房
至於「驚到死」代表李彩華、趙碩之同李卓庭比吳浩康等人早一日抵菲，李彩華更帶埋母親同行壯膽。三日兩夜行程，除了出席週六晚會表演外，三人全程閉關酒店房，連食飯都只叫room service。
第二日，八位藝人啟程返港，菲律賓機場保安嚴密，大家除咗要被由頭摸到落腳搜身之外，連鞋都要除埋照X-Ray。此行嚴陣以待，有驚無險！

旅警夠切身
外遊警示制度（簡稱旅警）是由香港保安局設立，目的是讓市民容易掌握外地情況，以便評估外遊的潛在風險，保障旅客人身安全。系統由○八年設立至今，曾多次應用於與港人甚至華人有切身關係的國際大事上。

泰國
今年三月，近百萬反獨裁民主聯盟「紅衫軍」成員集結於首都曼谷，舉行為期三天示威。泰國當局緊急出動五萬軍警嚴陣以待，曼谷及周邊多府宣布實施宵禁。港府即時將對泰國旅遊警報升至紅色，取消所有赴泰旅行團，並呼籲市民切勿前往當地自由行。由彭發執導於泰國取景的電影《索命童話》發揮大無畏精神，排除萬難在紅色旅警下繼續拍攝。

香港
○三年三月，「沙士」（非典型肺炎）疫症在淘大花園爆發後迅速蔓延，世界衞生組織（世衞）一度對本港發出旅遊警報，令本港旅遊業大受打擊。醫護界齊心協力，經過兩個月的搏鬥，疫情終受控，世衞在同年五月二十三日撤銷對香港的旅遊警告，而美國疾病控制及預防中心（CDC）則在七月九日宣布撤銷對香港的旅遊警報，籲國民可安心訪港。


保鏢跟身
他倆拍拖出街，亦要動用兩名持槍警員同白衣保安隨行護身，菲國之行認真大陣仗。


商場搜身
行入商場，二人被把守門口的保安員截住，要搜身先至可以入去shopping。


原本二人打算在商場血拼個多小時，但因他們的四人護駕排場太誇張，引來不少當地人注目，故最後只行了十五分鐘，買對拖鞋就速撇。


警車開路
敢死隊成員之一吳浩康同莊思敏，在馬尼拉一落機即有專車接送，更安排兩名騎警，為他們到下榻的克拉克渡假村開路護航，確保安全。莊思敏更用手機拍低難逢嘅巴閉排場。



阿Rain驚到爆
同行的李彩華同趙碩之驚到爆，故除演出當晚，其餘時間匿喺酒店房。離菲境時，保安嚴到要她倆除埋鞋，由頭到腳搜勻全身，雖然係咁，兩個人一句怨言都無。



敢死隊另一成員EO2，與一班菲律賓dancers齊齊在台上演出，雙方沒因港菲的緊張關係影響合作。


當晚負責壓軸的菲律賓女歌手，專登走落台向主辦單位老闆積哥（最左）握手，答謝他出力振興菲國旅遊業。


港人在菲律賓旅遊被挾持慘劇，發生至今已四個月，港人對菲律賓仍未恢復信心。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄