明星靚相大分享☆

上年 11月，陳柏宇同 G.E.M.過澳門新濠天地為《翡翠歌星賀台慶》演出，當時已發功冧 G.E.M.嘅陳柏宇，不避嫌在後台同素顏 G.E.M.影合照。 caption_pure: "上年 11月，陳柏宇同 G.E.M.過澳門新濠天地為《翡翠歌星賀台慶》演出，當時已發功冧 G.E.M.嘅陳柏宇，不避嫌在後台同素顏 G.E.M.影合照。"
封面
撇裕美溝幕後　雜食陳柏宇挑逗懷春 G.E.M.
2010年02月17日
18歲巨肺王鄧紫棋（ G.E.M.），去年 10月被本刊踢爆怒撇偷食大學男友、有嶺南 Eason之稱的 Aaron後，一直自稱單身的 G.E.M.上週卻忽發春情，自爆有圈中男星狂追，仲話對方大佢 3至 9年，冧笑放風。
G.E.M.揞名爆，但本刊得知搞掂 G.E.M.的殺手，原來係 26歲情歌王子陳柏宇（ Jason）。據知花心 Jason去年撇甩 o架妹裕美後，最近又搭上唱片公司女幕後，同時間又出招冧 G.E.M.。大包圍雜食，最離奇係陳柏宇反指 G.E.M.少女思春多幻想，「佢仲好細路女，人哋對佢好少少都會心動！」至於事後唔願多提「男星溝」事件的 G.E.M.就話：「佢先自作多情！」 80、 90後愛情真亂籠。
上週五（ 5日）， G.E.M.出席新城電台訪問，被記者問及近期有否追求者時，竟笑住爆響口：「唔係好多，一隻手數得晒，佢係圈中男仔，大我 3至 9年啦！我對佢都有好感 o架！家處於了解階段。」 18歲少女情懷表露無遺。

唱 K報到
陳柏宇爆響口話有次 G.E.M.同朋友唱 K，就打電話同佢講：「我朋友唱緊你首歌喎！」暗示 G.E.M.主動撩佢傾電話。

咖啡送暖
早前陳柏宇同 G.E.M.到港台出席活動前， 2人先到飯堂 hea，當陳柏宇遞杯熱咖啡畀 G.E.M.時即用冧女聲話：「快啲飲唔係會凍！」鬼咁細心。

佢唱 K打畀我！真實對白

最緊要佢哋開心囉！真實對白
本週四，記者就陳柏宇追 G.E.M.一事致電其前度裕美，她先回答：「唔清楚喎！」定神後先話：「你咁講我好 surprise…最緊要佢哋開心囉！」說到俾仔飛，裕美就死撐：「我哋都冇一齊過！」

學琴追女
G.E.M.放風話有人追後，雖被傳媒多番追問男主角屬誰，但一直死口唔講。但本刊收到風，確實有圈中男星出招冧 G.E.M.，而懷春 G.E.M.又傻更更受晒。據稱冧掂 G.E.M.的男星正是專唱情歌冧女、上年唱唱吓歌「動~L」激凸 hit爆的陳柏宇。
激凸柏宇和 G.E.M.在前年已在各大音樂頒獎禮密斟，見得多鬼咁老友，但 Jason真正出招，要數去年 9月 2人夾份幫 moov搞騷，當時剛與疑患抑鬱症的裕美分手的 Jason，剛又得知 G.E.M.啱啱與初戀學生男友 Aaron甩拖，即對考獲 8級鋼琴資格的 G.E.M.落手，表面扮學琴，實質借故挑逗。

學琴黐埋
上年 9月兩人出席 moov騷綵排，陳柏宇主動請 G.E.M.教彈琴，其間仲哄到鬼咁埋，但 G.E.M.踢爆佢：「其實佢識彈琴 o架！」

拖手搞騷
陳柏宇借教彈琴同 G.E.M.發電嘅 moov騷，到正式表演時， 2人拖住手出場鬼咁 sweet，事後 G.E.M.更在記者面前直接同陳柏宇話：「不如你追我吖？」冧到出面。

佢先自作多情！真實對白

暗交幕後
情歌王子陳柏宇，出道已被揭背脊有大紋身，又煙又打機，溝女底亦唔少。 07年踩入樂壇初期，跟裕美撻着。本刊獲悉，去年 7月 Jason撇甩裕美不久，即暗交一名唱片公司幕後工作人員，更有人目擊最近 Jason經常帶新女返歸短聚，同時間又出計冧 G.E.M.，「少女殺手」個朵，當之無愧。
講完失憶
2/5 自爆
上週五（ 5日）， G.E.M.到新城接受訪問非常興奮咁自爆：「有男星追我，家仲了解緊。好驚呀！好似跌入陷阱咁！」
2/9 唔認
週一（ 8日）記者求證實陳柏宇係咪溝 G.E.M.後，唔知係咪 G.E.M.收晒風，週二記者追問 G.E.M.冧佢嗰個係咪陳柏宇？佢竟反口：「你唔會問到 o架！因為嗰個人唔存在，我發夢咋！」幾經迫供， G.E.M.先肯承認陳柏宇挑逗過佢。

2/5 自爆

2/9 唔認

夠狂野
外表斯文乖仔的 Jason，原來性格都幾狂野，除咗背脊有個大紋身，仲鍾意落機鋪、食煙同打牌，嗜好多多。啱囉， G.E.M.都鍾意打機，唔怕冇話題啦，打天光有排玩呀！

大紋身
08年被揭背脊有個巨型紋身，陳柏宇事後解釋紋身係好藝術嘅事，唔會影響形象。

蒲機鋪
同一般後生仔一樣，陳柏宇一樣愛蒲機鋪，可以打足幾個鐘都唔返屋企。

戒唔甩
曾因當眾扯煙而要向歌迷道歉的陳柏宇，承諾戒煙但轉頭又被影到喺屋企狂扯煙，搣極唔甩。

變「 J神」
陳柏宇上年 7月做商場騷，俾人發現唱唱吓〈你瞞我瞞〉時「動~L」下體激凸，被封為新「 J神」。

「好想同佢玩」
週一（ 8日），陳柏宇出席港台活動，記者上前問他追 G.E.M.一事，他似是而非：「佢係一個好 nice、好玩得嘅女仔，令人好想同佢玩……如果佢覺得有一個人追佢，只有佢諗多咗。（會唔會你做咗啲嘢令 G.E.M.誤會？）有機會 o架！有次我哋去電台做嘢， DJ Eric（港台 DJ梁德輝）幫我哋叫咗咖啡，我叫 G.E.M.快啲飲唔係會凍， Eric都同佢講小心俾我電親。我唔介意傳 o架，阿 G.E.M.呢啲好嘢，我覺得唔係壞事！」
陳柏宇更踢爆 G.E.M.試過和朋友唱 K，點他歌唱時， G.E.M.即時致電陳柏宇「水吹」。
被指懷春，翌日（ 9日） G.E.M.笑住反擊：「佢（陳柏宇）先自作多情！如果真嘅話（唱 K事件），我唔係同啲 friend唱 K，而係同 Jason唱啦！」之後 G.E.M.更反踢陳柏宇出招溝女：「佢夠試過叫我教佢彈琴啦，上次我哋一齊做 moov音樂會，佢叫我教佢嘅！」
不過講到陳柏宇符唔符合男友條件時，一樣同陳柏宇啱晒 key鍾意打機嘅 G.E.M.就話：「咁佢係一個有才華嘅男仔嚟嘅，我都想將來嘅男朋友係一個有才華嘅人！（家追緊你嗰個有冇才華呀？）其實冇個咁嘅人，我嗰日（自爆）喺度發緊夢。」懷春夢係時候醒一醒喇！
成人禮發情

抽男模水
滿 18歲的 G.E.M.，拍廣告時唔介意當眾瞓落男模出身、 Square成員 James（何尚謙）重要部位，事後仲承認抽人水：「我唔覺喎！乜都 feel唔到，我冇尷尬 o架！」果然大個女！

想睇偉仔 pat
當年《色．戒》上畫時仲未夠 18歲的 G.E.M.，表示好恨睇：「我梗係知入面有啲親熱鏡頭好寫實，偉仔仲有露 pat添呀！」

短訊追 William
G.E.M.經常將同 William的合照放上自家 blog，又狂傳短訊畀人，更恨對方教佢跳舞恨到出晒面：「佢跳舞咁叻，我都想佢教吓我呀，不過佢話好忙，你哋（記者）幫我催吓佢啦！」

公開求愛
成日同狄易達孖公仔周圍玩的 G.E.M.，公開叫達仔主動追求：「佢要做啲嘢取悅我先得 o架，我鍾意有心思嘅禮物！」

打機仔
多次被影到送上門，拍拖 3年、有「嶺大 Eason之稱的 Aaron屋企，雖然 G.E.M.唔認二人拍拖，但就認上人屋企：「我係成日上佢屋企打機，不過我冇過夜 o架！」

麥玲玲：佢易俾人呃！

18歲 G.E.M.人仔細細已經咁多緋聞，麥玲玲師傅幫佢睇過面相，原來 G.E.M.面形圓圓，容易俾人呃：「要知佢早唔早婚就要算命先知，不過齋睇 G.E.M.嘅面相，都睇到佢有孩子鼻，容易受人氹；至於佢眼珠好深色，代表好重視愛情，係愛情至上嘅女仔；而面形圓即係份人比較包容同隨和，不過太易信人，會容易俾人呃！」

眼珠深黑：重視愛情
面圓：容易信人易俾人呃
孩子鼻（鼻圓多肉）：易受氹
採訪、撰文：娛樂組
攝影：娛樂攝影組
部分圖片提供：《蘋果日報》、《壹週刊》、《忽然 1周》