歌手羽翹（Ava）以靚聲紅爆互聯網，原來教美容、化妝亦有一手，早前就出書講解秘技。吸油爽膚當然難唔到Ava，換轉幫食物「吸油」，佢就推介一間大賣「紙上燒」的新餐廳，一張白紙即令肉類、海鮮燒得嫩滑美味，而且質感乾爽，不油不膩，可以放心大啖食！
等我幫啲食材做住Mask嚟燒先！（設計對白）
電磁爐減油煙
夏日炎炎，好容易令人油光滿面，Ava就教大家如何潔膚爽膚：「有面油是因為肌膚乾燥，天氣愈熱，面油就愈出愈多。大家不妨噴點保濕水，用紙巾抹乾後再補粉，治本方法則是多敷保濕、深層清潔Mask。」 見Ava講得咁好，小記就再請教如何幫食物「吸油」，她即時介紹位於灣仔的新餐廳Kushi One。
話說餐廳老闆張先生曾在日本北海道品嘗紙上燒，即覺驚為天人，並引進及改良這創新食法，像以電磁爐代替明火，減少油煙，然後在特製的雙層鍋鋪上吸油紙燒烤，將肉類、海鮮的肉汁鎖住，入口分外嫩滑美味。Ava即席試燒，很快便傳來陣陣肉香，而堅韌的紙張能抵擋高溫，將烤肉、海鮮燒得外皮微焦，更加吸引。
牡丹蝦玫瑰花壽司杯 $55<br>雞尾酒杯裝着的「壽司」，賣相得意，壽司飯有玫瑰花茶香，及鋪有新鮮牡丹蝦，還附上玫瑰花茶一杯，甜美滿瀉。
特上海鮮拼盤 $380/2人份<br>集北海道蟹腳、銀鱈魚、廣島蠔、大蜆及珍寶帶子等，分量十足，邊烤邊以喜馬拉亞山岩鹽調味，提升味道。
左起：鹽燒秋葵豚肉卷串$28、汁燒海鮮串$28、鹽燒日本銀杏串$20<br>三款燒物也不錯，除了香口亦非常惹味，最適合佐酒。
創新熱食壽司
自言極愛日本菜的Ava，經常同朋友食串燒、Shabu Shabu及日式烤肉等，最愛那熱鬧、輕鬆的氣氛，分享美食特別滋味。餐廳除以紙上燒作主打外，亦提供不同和食，包括卷物、串燒、刺身等，由二十多年經驗的和師傅坐鎮，更創出如玫瑰花壽司杯、和式黑松露溫泉蛋沙律，以及熱食的神串一壽司酥皮卷等，甚有心思。
見Ava今餐開懷大嚼，其實她平日食得檢點，因要保持最佳身形。她笑言：「平時喺屋企食少啲，又比較清淡，但一出街開餐就唔理咁多，食咗再算啦。」Ava視飲飲食食為樂趣，是一大減壓良方：「最怕人哋用熱水淥去食物油分，無晒味道，睇見就唔想食。如果係食紙上燒就無問題，有吸油功效，點都食得放心啲。」
汁燒黃太子免治雞肉棒 $18<br>以新鮮韮菜、鹹蛋黃（即黃太子）、洋葱及雞蛋，經師傅反覆手打而成，非常彈牙入味，每天限量炮製。
神串一壽司酥皮卷（熱）$88<br>入口熱暖暖的壽司，內藏芝士、牛油果、香杧及北海道長蟹肉等，外圍包着酥皮後烘焗，很有新鮮感。
和式黑松露溫泉蛋沙律 $68<br>用上多種醬汁炮製，包括黑松露油、胡麻醬、意式沙律油等，層次分明，當中以黑松露油配溫泉蛋最美味。
兩款特飲Mango Manila（左）以橙汁、杧果醬及甘巴利莓汁調製，酸酸甜甜，而Kushi One Special（右）則以荔枝為主，新鮮荔枝、荔枝醬再配西柚汁等，清新宜人。
餐廳大廳布置以綠色為主，設卡位坐得舒適，而這貴賓房則自成一國，布置別具風格，品嘗美食更自在。
紙上燒吸油「紙」
別小看鍋上的「吸油」紙，紙質類似牛油紙但較為厚身，質感則帶少少「鞋」手。老闆張先生表示為做紙上燒，曾以牛油紙、蠟紙嘗試，但效果未如理想，最後找來瑞士紙張，貪其質地堅韌，不會燒穿。
羽翹飯後感
羽翹近況：早前推出新書《Girls Talk》，分享多年扮靚心得，兼有新歌派台，冧盡樂迷及愛美人士。
Ava：「我覺得紙上燒比一般日式燒烤效果好，烤肉嫩滑Juicy，又無咁熱氣。張紙就好似保濕Mask咁，食物「敷」完更正！如果配埋喜馬拉亞山岩鹽，點埋燒汁、海鮮汁及芝麻醬食，真係食唔停口。」
試食報告
環境氣氛：★★★★
好味指數：★★★1/2
必食推介：特上海鮮拼盤、汁燒黃太子免治雞肉棒、牡丹蝦玫瑰花壽司杯
人均消費：$300
撰文：楊淑英 攝影：林資凱
羽翹髮型：Jay Yeung@Hair Corner 服裝：Runway 查詢電話：2423 7555
留言列表
