霆鋒激練詠春騷 Quali　葉準大彈唔掂忽然1周 787期 @ 明星靚相大分享☆

近年詠春勁hit，加上電影《葉問》系列催谷下，習武之人有增無減，連藝人都爭相拜師學藝。已取得詠春初級教練牌的謝霆鋒，早前被爆接受張繼聰挑戰，結果大獲全勝。最近霆鋒再下一城，拍咗一條同師傅伍允龍及婷婷男友安志杰練詠春嘅短片，由助手「表哥」放上YouTube任人睇。
霆鋒拍短片騷Quali，明顯對自己嘅功夫好有信心，但詠春大師葉問長子葉準睇片後就大彈：「佢做唔到詠春以柔制剛嘅精髓！」

謝霆鋒06年在拍電視劇《詠春》時，初次接觸詠春即瘋狂迷上，並拜曾與鍾嘉欣傳緋聞的武指伍允龍（Philip）為師，知情人士說：「伍允龍嘅爸爸伍紹華喺芝加哥開武館，係葉問師兄弟黃順良嗰一派嘅，喺詠春圈子輩份好高，伍允龍細細個就跟老竇練武，身手唔錯，所以霆鋒先搵佢學功夫。」

拍片前要栢芝同意
剛在今年考獲詠春初級教練牌的霆鋒，最近孖住師師傅伍允龍和好友安志杰在其市值過億的三千呎赤柱豪宅練功兼拍短片，事前霆鋒更要取得老婆栢芝同意，知情人士透露：「霆鋒想拍練功短片好耐，不過又怕喺外面俾人見到，結果決定喺屋企拍。拍前栢芝講明唔可以整爛屋企任何嘢，仲一定要清場，因為Lucas見爸爸練功都會郁手郁腳，有樣學樣，所以條片都係喺走廊同露台拍，唯獨打木樁嗰段至喺室內拍。」
記者發現練功片雖然只長分半鐘，但製作專業，又有特別效果，非常認真。霆鋒同伍允龍除咗練詠春，仲有練打拳，兩人更由豪宅露台打到入走廊，十足十電影宣傳片。知情人士說：「霆鋒想拍低練詠春嘅進度，近排伍允龍話霆鋒已經可以去考詠春二級教練牌（下一級便是競賽級教練），娛樂圈未有人攞過，不過呢個牌要練埋棍法先考得，所以霆鋒仲心大心細，怕冇時間練。」

師傅讚小方開心
本周一（23日）記者將霆鋒練武的短片拿給葉準師傅審評，他睇片後直言霆鋒詠春未到家：「詠春係一門以柔制剛嘅功夫，但謝霆鋒做唔到，佢只係做到詠春嘅動作。（伍允龍係咪好啲？）兩個都做唔到，從佢哋嘅黐手就知道。（張繼聰同霆鋒比過武。）佢哋玩啫！（霆鋒比張繼聰打得好？）好難講，張繼聰跟我學詠春，佢係做到以柔制剛，不過仲未做得認真，只係啱啱合格。（圈中有冇邊個真正做到以柔制剛？甄子丹？）甄子丹都唔得，佢做出嚟好睇，但仲未夠好。圈入面係杜宇航做到，方力申都做得到，佢打得幾好。（關唔關佢游水叻事？）可能有啲關係，因為佢識得放鬆肌肉。」
對於被葉準大讚，身在昆明拍劇的方力申非常開心：「係咩？多謝晒！我學咗兩個月咋，不過啱啱要拍劇，所以停咗，但之後會繼續學。」
霆鋒打到嘭嘭聲原來都係唔掂，睇嚟佢要好似對老婆栢芝咁，落多幾錢溫柔喇！

葉準讚方力申掂

[火羅]咗㖭！（設計對白）
老婆錫番！（設計對白）
已接觸詠春有4年之久嘅霆鋒，近排將練詠春嘅短片放上網同fans分享，點知俾葉準彈唔掂，睇嚟栢芝要呵番老公喇！