8月8日互當透明
《摘星》記招上，葉童與劉松仁零交流，冇偈傾冇眼神接觸，互當透明。
是非一籮籮的葉童，近幾年返無綫拍劇屢與演員傳不和。周日（8日），葉童北上為《摘星之旅》宣傳時，與男主角之一劉松仁互當透明，葉童更不時用背脊「得」住劉松仁，最後在記者要求下合照，兩人才局住擠出笑容交戲！
其實在去年的《星星同學會》中，葉童已經向主持吳君如爆料，沒指名道姓地表示曾與一資深男演員合作不愉快，更力斥他「萌塞」，更自爆在片場與對方拍枱反面。遭葉童連珠炮轟的男演員，原來正是當時與她合拍《摘星》、飾演她老公的劉松仁。
周日（8日），《摘星之旅》在深圳觀瀾湖舉行宣傳活動，兩位老戲骨葉童同劉松仁，整個活動都貌合神離，而與眾演員冇兩句的葉童，活動結束後，更獨個兒一個箭步飆入中菜廳。
演員邊用餐邊看宣傳片時，葉童突然向記者自爆︰「睇到promotion（宣傳片）好少自己嘅鏡頭，我咪同監製詐嬌，差啲唔想上嚟……不過睇到布景板自己企中間，咁先下番啖氣。」
其實拍攝《摘星》以來，葉童一直諸多不滿，經常向外發嘮囌。她與劇中的老公劉松仁，鏡頭前恩愛到痺，但鏡頭後卻互藐互窒。一個是過氣影后，一個是電視台老戲骨，各有架子。據知兩人去年拍《摘星》時，葉童不忿松哥改劇本，曾多次發生衝突。試過有一場爭拗戲，劇本根本唔需要兩人嗌交，但他們愈拍愈火，最後竟鬧到面紅耳熱，嚇呆各人。
《摘星》的工作人員透露︰「套劇喺深圳拍嘅時候，有男演員曾向導演投訴，指有人成日黑起塊面擺晒阿姐款，少少嘢就發難，好難頂！同劇演員都對佢避之則吉！」
就兩人不和求證黃宗澤，他說：「我唔覺得佢哋有嘢喎！松哥係鍾意改劇本，但都係有商有量，我當佢老師o架！至於葉童，佢要求好高，但都好niceo架！」而另一演員張嘉兒亦謂不知情：「我做松哥秘書，對手戲多啲，佢好專業又冇架子。葉童？我哋唔熟，但見面都有say hi嘅！」
群星杯葛
有傳葉童遭《摘星》眾演員杯葛，觀乎當日祝酒情況，劉松仁與其他演員有講有笑，反觀葉童卻十分獨家村。
出口術寸爆
其實葉童與劉松仁不和，早就有跡可尋。去年6月，葉童接受《星星同學會》訪問時，曾寸爆一名資深男演員︰「我開工兩星期後，要同佢對戲。我四頁紙背熟晒，佢就得兩句對白。我講第一句說話，佢已經翻開劇本話︰『係12345，唔係2345！』我就話2345講出嚟會順口啲，但對方堅持要我講到同原來劇本一模一樣……我哋喺現場拍晒枱、反晒面……但我睇番佢講對白，蝦！佢又唔係（跟足稿讀）個喎……」
一個月後，葉再向記者呻︰「佢（暗指劉松仁）好多意見，要點、點、點，要你接受。我唔鍾意人管，我呢啲惡婆，唔會聽佢支笛。我好欣賞佢鍾意研究人哋嘅角色，佢鍾意幫後輩，我都唔知佢點同人溝通，有啲人希望有人指導，遇到佢呢啲咪好開心囉。」
葉童頻頻發功，先後兩次開火公然數臭劉松仁霸道、改劇本。劉松仁亦不甘示弱反寸︰「點會？我點會叫葉童堅持我嘅做法？我同佢合作四部劇，喺台灣我已經開始改劇本，佢又點會唔適應？佢都不知幾咁鍾意同我合作，中國人係鍾意講啲違背良心嘅說話。」
有傳葉童與《摘星》演員關係麻麻，反觀劉松仁卻與一班後生演員打成一片，記招翌日，黃宗澤及張嘉兒都在微博上載與松哥的合照，卻獨欠葉童。
麻煩影后周圍辣
葉童多年來拍劇都是非一籮籮，與不少演員傳不和，更被指擺阿姐款，有「麻煩影后」稱號。
寸爆黃子華
07年拍攝《奸人堅》時，黃子華改劇本，曾被葉童即場寸爆︰「你知會我改劇本吖！」而葉亦因為拍攝前拒絕試戲，搞到成日走錯位，頻頻NG。子華亦反擊︰「影后入戲要時間，一場戲拍三次以上先掌握到！」
辣娥姐鄧萃雯
06年8月拍攝《師奶兵團》時，葉童先後同商天娥及鄧萃雯不和，葉童因與娥姐服裝撞色，被對方頂了一句「妳有甚麼問題嗎？」自此兩人交惡，拒絕往來。之後葉童又暗寸同劇的鄧萃雯增肥後似「師奶」，又爆對方拍攝時不單遲到，仲帶埋女傭開工服侍，令雯女極為不滿。
眼紅秋官待遇
03年6月拍攝《非常外父》時，有傳葉童不滿意鄭少秋獲厚待，每日有十小時的休息時間，她踩上監製房投訴，要求同等待遇，搞到拍攝進度受阻。
《摘星》的宣傳海報上，監製陳家樹特別安排葉童及劉松仁放中間，俾足面兩位老戲骨。
《摘星》中，劉松仁及葉童飾演夫妻，葉更為老公高齡懷孕，但後來發現老公有情婦，受刺激下小產。
去年，葉童上《星星同學會》，數臭資深男藝人霸道，矛頭直指劉松仁。
葉童炮轟完，主持吳君如曾旁敲側擊追問男演員是誰，但葉童卻堅拒透露。
留言列表
