陳七飛女友部署翻撻 o靚妹李綺雯拒復合：我賠不起忽然1周 785期 @ 明星靚相大分享☆

本周三，o靚妹對自己成為陳七與Natalie分手的導火線拒絕評論，只說：「我一個人依家幾好。」暗示自己仍然單身。

25歲的香港足球先生陳肇麒（陳七）去年11月被踢爆與無綫女藝員李綺雯（o靚妹）暗交半年，但戀情見光即死，陳七最終選擇重投舊愛Natalie Ng懷抱。之後陳七與Natalie不時高調拍拖，表現恩愛，令Natalie正印地位穩如泰山。
以為三角戀終有結局，本周一（9日）卻爆出陳七於7月23日到南韓集訓前，主動向黐身的Natalie提出分手。原來陳七於7月初在友人生日派對上重遇o靚妹，之後便不時在網上撩女方傾偈，又以sms傳情，希望與o靚妹復合。雖然o靚妹曾一度心郁，卻害怕情緒不穩定的Natalie做傻事，所以本周三在facebook剖白：「我們輸不起也賠不起，亦未必再有力重來。」堅拒復合。

陳七今次主動向Natalie提出分手，據知除了難忍對方的癡纏外，亦為翻撻o靚妹李綺雯鋪路，適逢南華要到南韓集訓三星期，他覺得正好讓大家冷靜一下。知情人說：「南華有條規例，一去到球場就要熄電話，如果邊個電話響或者俾人發現send sms，就要罰錢，所以陳七覺得呢個時候分手最好。」
原來陳七對與o靚妹分手後一直未忘情，更因7月初一次聚會而重燃愛火。知情人士說：「陳七同o靚妹分手之後，表面上絕口不提對方，出面嘅人仲以為佢哋不歡而散。佢哋分手後雖然冇聯絡，但關係又唔算太差。7月初佢哋有個共同朋友生日，喺Volar開party，佢哋兩個都有出席，嗰晚陳七仲不避嫌主動坐喺o靚妹隔籬，但係o靚妹成晚冇睬佢。」
之後數日二人又於夜店碰上，有人更目睹陳七主動坐喺o靚妹身邊，今次o靚妹肯同佢傾密偈，兩個人成晚雞啄唔斷。知情人說：「嗰晚之後，陳七趁機喺網上同用sms撩o靚妹傾偈，而轉捩點就係7月22號。因為21號陳七出席書展活動，第2日報紙就話陳七暗寸o靚妹放料，陳七覺得報紙寫嘅同佢講嘅有出入，主動send sms同o靚妹道歉。陳七咁關心o靚妹感受，明眼人都知佢部署翻撻o靚妹。」
據知o靚妹雖然心郁郁想復合，但始終有顧忌，知情人士說：「o靚妹第一次同陳七分手，都係因為Natalie要生要死，況且o靚妹俾人飛過一次，始終都有陰影，所以唔敢隨便下決定。」
事實上，被飛的Natalie，上周五（6日）開始在微博以「power子」之名訴說失戀心情，如「我需要一直都在我身邊的你，我需要會撓着我膊頭的你……心煩死了……很不快樂」、「發惡夢，一起來就哭！」、「每一晚我都不能睡……心很痛！」之後Natalie又寫道：「當世界不再容納你時，是否應該退出這個圈子！」處處顯示未能對陳七忘情，極之痛苦。

o靚妹：一個人幾好
見Natalie情緒不穩，o靚妹終於在本周三（11日）於facebook撰文拒愛，她寫道：「年輕時，我們總是可以不顧一切地相愛……很多事情，我們輸不起也賠不起，亦未必再有力重來。有一種愛是要留在回憶裏，有一種故事不需要續集。」
本周三（11日）記者在電視城守候正拍攝劇集《萬鳳之王》的o靚妹，問她是否因受壓才拒絕與陳七復合，她只無奈說：「總之感情嘅嘢唔係咁簡單，依家一個人幾好。（你7月時係咪見過陳七？）唔答。（Natalie好hurt喎。）唔想評論，做人係要珍惜自己。」之後記者致電身在南韓集訓和比賽的陳七，但始終聯絡不上。

陳七從不承認曾與o靚妹拍過拖，如不是親密照流出，恐怕死無對證。