社民連周日借「反預算案」支旗，帶領一群紅衛兵操去中環瞓馬路，阻塞全部行車線，仲故意挑起衝突，同差人埋身肉搏，當中竟然有十四、五歲細路及八歲幼童，搞到咁激真係好得人驚。點解社民連要做呢場「騷亂Show」？原來背後同激進派大分裂有關。

線人回報，社民連早前爆發內訌，毓民同大嚿拉隊另搞「人民力量」，分裂之後社民連走咗二百幾人，佔成四分一，多數係八十後憤青，令中堅力量大減，主席陶君行亦知形勢不妙，一定要諗計箍番住班友，並招攬更多憤青入夥，重新聚合兵馬，如果等個勢弱落去，跟住嘅選舉就好難搶位。

事實上社民連內部嘅激進成員，一直「目及」實黨領導係咪繼續高舉激烈抗爭旗幟，如果阿陶表現唔夠薑，佢哋隨時散水另搵山頭，所以阿陶一定要保持激進路線，以佢嘅性格，一係唔做，一做就激到盡。因此之故，社民連早前已借住「茉莉花革命」個勢，發動班紅衛兵連番衝擊中聯辦，實行玩鋪大嘅，特別係見到毓民嗰檔「人民力量」冇乜聲氣，就更加出位，盡量搶風頭以壓低毓民嘅氣勢。

社民連愈玩愈激還有另一原因，就係保住長毛同阿牛兩支激進人馬。線人話，長毛冇跟毓民一齊退黨，阿陶鬆咗口氣，因為長毛盤踞新界東，如果社民連失咗呢個區，就好大鑊，所以一定要箍到實。

長毛近年在新界東收咗一大班o靚，多數係八、九十後激進青年，上周二衝擊煲呔嘅黃俊傑，本身在沙田一間越南餐廳做嘢，就係長毛嘅人馬，如果阿陶要箍住長毛支兵馬，就一定要不斷搞激，而長毛亦可以keep住班o靚。

「阿牛」嫡系人馬唔受控

阿陶要箍嘅另一股勢力，就係港島區嘅阿牛（曾健成）。佢老哥在毓民當權時，一直鬱鬱不得志，更一度幾乎被踢出黨，今次大分裂之後，佢支部隊忽然成為搶手貨，被阿陶大力拉攏。

阿牛支嫡系兵馬，一向最激最唔受控，過往在保衛皇后碼頭及反高鐵行動，都係打前鋒，表現十分爆火，上周在歷史博物館衝上台突襲煲呔嘅「金鷹」曾浚瑛，就係一個代表人物。

阿陶要鞏固自己嘅領導地位，今後一定會放手畀兩大激進派系玩，有咁激搞咁激，但呢班友向來唔受指揮，咁搞落去，可能愈玩愈失控，最後想㩒都㩒唔住，分分鐘玩火自焚。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄