肥肥過身時，拍心口話會照顧欣宜的Auntie多的是，勢估唔到兩年後今日，拍罷《畢打自己人》後的欣宜勢成失業大軍，再者與男友被揭「假分手、真同居」的她已有半年時間與Daddy失去聯絡，對此秋官無奈表示：「呢幾年個女都冇同我拜年，佢年年都話唔喺香港。」紙咁薄的父女情，睇怕凍過水。 


各散東西 過去欣宜偶有相約秋官一家食飯睇戲，如今兩家關係變差，有指官晶華亦不想欣宜與她兩個女兒接近太多。

兩年前秋官返TVB拍攝《桌球天王》時，撞正欣宜日日朝九晚六在電視台為處女劇《畢打自己人》開工，兩父女難得共處一「城」，大可乘機食飯見面，惜整整三個月，莫講話食飯，就連在隔籬廠拍劇，亦不會主動探望對方，其時秋官一味敷衍記者：「會約食飯嘅喇，我叫助手mark實欣宜的檔期喇！」結果又係空頭支票。


劇情需要 過去數年亦未有向父親秋官拜年的欣宜，父女感情愈來愈疏離，大晒親情，只限於有記者在場的地方。


契女仲親 拍攝《桌球天王》時，秋官與劇中飾演其女兒的契女周麗淇感情要好，有指他在百忙中也有出席對方的生日派對，親生女欣宜卻未有此待遇。

三千萬遺產
自肥肥過身後，欣宜與秋官關係一度變僵，據知情人士爆料指：「肥姐加拿大舉殯嗰次，秋官又冇去到，要個細路女一力承擔咁多嘢，個心冇條刺就假喇！」

據知，肥肥逝世後的第一年父親節與欣宜生日，兩人亦冇見面，父女關係勢難破冰，就連監製拉攏二人合作拍劇，亦遭欣宜以「同Daddy拍劇會好緊張」為理由，單方面拒絕。

欣宜嬲Daddy可想言知，另邊廂，欣宜力排眾議變賣肥肥留下的劍橋花園物業，亦令父女之間的鴻溝加深。事實上，肥肥離世前已將加拿大全數物業變賣套現七百幾萬，留給愛女作生活費，還未計欣宜變賣劍橋花園吐現的二千萬（其單位肥肥與張耀榮共同持有，她佔有三分之一業權。），與逾千萬人壽保險賠償，欣宜年紀輕輕做富婆，繼承了母親三千多萬遺產。

豪買作風
據肥肥閨中密友透露，「肥姐一向出名豪氣，估唔到欣宜學足媽咪，Joyce細細個食慣嘆慣，同男朋友拍拖都係出入高級餐廳，食同着都要名牌，用錢方面一啲都唔手軟。」欣宜唔識慳住媽咪血汗錢，難怪秋官有微言，週一（22日），本刊發現拍罷《畢打自己人》未有開工的欣宜在中環出現，戴住黑超全身名牌的她，在Chanel化妝品專櫃與女友人選購香水，一口氣連掃半打Chanel「5號」香水，碌卡時黑卡一揮，絕對有肥姐豪爽作風。


豪使實錄 週一（22日），欣宜在中環Chanel化妝品專櫃連掃半打Chanel「5號」香水，埋單數千元也臉不改容。


闊太生活 拍罷《畢打自己人》後，苦冇新劇開拍的欣宜，閒來逛中環名店，過富泰生活。

使錢都係事小，肥姐去世不久，貪玩的欣宜與老外男友Mark Ryan在Facebook上的親熱照意外流出，即刻令監護人陳淑芬同秋官嬲到震，不過最令秋官心痛的是傳出欣宜講大話，偷偷跟老外男友同居。


有料男友
欣宜男友Mark Ryan去年中加入「英皇教育」負責課程設計，去年更在渣打馬拉松勇奪十公里冠軍。


珍姐教女
一手將欣宜拉入TVB拍《畢打》的曾勵珍，08年就曾當着記者前教女，「我擔保欣宜一定冇同居，我成日上去佢屋企，佢幾點返工我都知。」其時珍姐更苦口婆心對欣宜說：「有，我打死你！你應承畀心機做戲……」最後珍姐忍唔住喊，嚇到欣宜面青。


力爭表現 上月《畢打自己人》拍攝煞科戲，《畢》劇監製曾勵珍亦有到場監督，平日貪玩的欣宜見Auntie在場即落力表現自己。


幫得就幫 陳淑芬受肥肥所托，對欣宜視如己出，眼見對方失業在即，即為她接洽新年期間赴美的登台工作。

為了令一眾Auntie及Uncle放心，欣宜立刻轉玩地下情，上月農曆新年前，更自爆將會過一個沒有情人的情人節，點知話仲未完，數天後即被狗仔隊拍得與男友的同居生活實錄，「假分手」大話旋即被踢爆。

忌辰失蹤
戀愛大過天，連媽咪忌辰都唔記得，本月19日肥肥死忌適逢大年初六，陳淑芬拉隊到寶福山拜山，惟獨不見欣宜現身。「唔係，欣宜要去美國登台先唔得閒啫，佢會喺溫哥華拜媽咪。」Auntie撐到盡，另邊廂與女兒仲未破冰的秋官，就懶得回應愛女「假分手」報道：「都已經廿幾歲喇，由得佢自己作主喇，我唔問得咁多。」呻完一輪，秋官又忍唔住大爆欣宜已經幾年冇同佢拜年，「呢幾年個女都冇同我拜年，佢年年都話唔喺香港，唔緊要喇，我知個女有心。」唉，心痛就真。


老婆萬歲 出名是嚴妻的官晶華，當日在跑馬地落車幫秋官買了一束鮮花探病，盡顯河東獅背後溫柔的一面。



[img]http://www.scmedia.com.hk/scm_photos/XPWEEKLY/201002/102433/561095.jpg/img]
好心探病 週一（22日），拎住一大紮花的秋官現身養和醫院探病，似乎非常有朋友心，可惜大年初六肥肥死忌當日，他卻沒有隨陳淑芬現身寶福山，拜祭前妻。


搵銀要緊 08年肥姐死忌，孝順欣宜拉隊到寶福山拜祭，今年死忌，欣宜赴美登台無時間拜媽咪，搵錢至上。


A貨肥姐
同肥姐餅印一樣的欣宜在賀歲片《72家租客》內，重演73年母親於《72家房客》上海婆一角，對於造型形神俱似，她曾謙稱︰「點扮都唔似呀，佢太經典喇，而且佢係肥美人，我就似Daddy。」雖然拍攝前欣宜特意看回媽咪的舊作偷師，且《72》在港的票房高開逾二千萬，在內地雖然敗於《花田囍事》手上，但仍錄得逾千萬票房，無奈「紅戲唔紅人」，莫講話欣宜的上海婆冇人識，就連主角亦少人談論，下次欣宜有機會再登大銀幕，要多多努力喇！

星次代
深得父母遺傳的「明星二代」，有得在娛圈發光發熱，像謝霆鋒兄妹近年各有不俗發展，但亦有星途黯淡的例子，莫非是DNA出錯？


陳宇琛
石修兒子陳宇琛03年拍攝《當四葉草碰上劍尖時》入行，之後亦有接拍《甜酸爺爺》等多套劇集擔演配角，入行七年仍未上位，近年除了做《音樂無間》主持外，亦開創自家品牌銀飾LLazy Bones。


姜文杰
秦沛兒子姜文杰，07年簽約TVB負責主持工作，入行數年曾先後主持《娛樂最前線》 、《360。音樂無邊》 與《無間音樂》 等音樂節目，亦曾成為不少一線歌手包括陳慧琳、李克勤等的MV主角，但卻一直苦無拍劇機會。


楊天經
影迷公主陳寶珠之子，01年於美國德州大學經濟系畢業後返港加入娛圈，演出作品包括舞台劇《天之驕子》、《王子復仇記》等，近年更成為《體育世界》主持一份子，可惜觀眾緣始終不及母親，星運相當一般。


吳嘉龍
以模特兒身份入行的吳嘉龍，是吳耀漢的兒子，00年接拍《一見鍾情》投入影圈，近年亦不乏電影作品，可惜至今仍未有代表作，最近與父親吳耀漢父子檔在《財神到》拍住上演出，但其父在訪問中表示，有意勸兒子轉行。

親親Daddy
秋官與欣宜關係疏離，血脈相連卻絕少來往，事實上，娛圈歷年來不乏父女兵，感情融洽不特止，還偶有把挽公開露面，大晒親情。


謝賢　謝婷婷
一直反對婷婷入娛樂圈的謝賢，近年態度軟化，早前她以超性感低胸裙出席簽約王晶旗下，謝賢挺身支持之餘還大力鼓勵，兩父女不時相約在Cova嘆茶，父女關係良好。


黃霑　黃宇詩
一代才子黃霑生前都對愛女黃宇詩相當提攜，穿針引線助其簽約TVB，傳授主持技巧，又鼓勵女兒寫作，黃霑過世後，宇詩不時在節目中談及父親對她的影響，親情令人感動。


曾志偉　曾寶儀
一直與母親王美華在台灣生活的曾志偉女兒曾寶儀，99年在台推出唱片《阿寶》後走紅，未幾即成為台灣紅極一時的節目主持人，雖然父母離異，與父親兩地相隔，但亦無損志偉父女感情，曾氏一家三口曾在《快樂星期天》等多個節目同台演出，場面溫馨。

明星靚相大分享☆復活板娛樂八掛週刊雜誌★娛樂八掛大放送★ 為食譜識飲識食街★ 任逍遙旅行萬里路 ★ 科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳 賽馬貼士 提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 明星靚相大分享(10月刊)★ 明星靚相大分享(11月刊)★ 明星靚相大分享(12月刊)★ 明星靚相大分享(01月刊)★ 明星靚相大分享(02月刊)★ 明星靚相大分享(02月刊)★ 週刊 及 雜誌(4-11月刊)☆ 週刊 及 雜誌(10-2月刊)☆
arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄