繼叢培崑拖女現身之後，陳志雲另一愛將寧進近日亦高調露面，而佢重識揀最多人嗰日「蒲頭」，正正係上個禮拜嘅周永恆、趙梓淇（趙頌茹）婚宴。不過新娘子阿Yu就口多多，篤爆寧進當日係不請自來，因為兩位主人家只係請咗寧進嘅女朋友，根本冇請寧進，而據聞寧進同女友已經分咗手添……。
其實大家又唔怪得阿Yu，因為寧進當日一現身，就搶晒主人家鋒頭，個個爭住圍攻呢位「紅人」，反而冷落咗周永恆同阿Yu。而寧進亦都好似有備而戰咁，大方回答所有問題，話自己唔係「孿」，亦冇扮「孿」呃志雲，又話驚大家誤會「夾口供」，所以唔敢同志雲、叢培崑見面，但當提到佢有冇同女友一齊嚟，寧進就突然支吾以對。但話時話，寧進同主人家真係唔多熟絡，因為寧進上台同新人合照嗰陣，好姨見佢尷尷尬尬咁，同人好鬼生疏，所以事後難怪有人話，寧進今次實情厚住面皮嚟做騷。
相反，新郎哥同寧進比起上嚟，就怕醜得多，事關喺「錫錫」環節度，阿Yu顯得非常熱情，一臉陶醉，然後大大啖咁錫落周永恆到，睇得出佢真係嫁得好開心，但新郎哥就顯得有啲怕醜，錫嘅時候，唔只唔合埋眼，重有少少反白眼，再加少少面容扭曲添呀陰公，好彩阿Yu睇唔到咋！咁唔通周永恆愛得阿Yu未夠深？定係因為佢腦有水瘤，所以唔敢有太大動作呢？無論點都好，好姨都祝呢對新人可以開開心心啦！ 
寧進當日不請自來，高調現身周永恆同阿Yu嘅婚宴，令到全場詫異，重搶晒一對新人嘅鋒頭。 
寧進似係有備而戰，大方解答記者們嘅問題，只係問到女友一環，即刻口窒窒，究竟發生乜嘢事呢？ 
而上台同新人合照嗰陣，寧進尷尷尬尬咁，重同新人唔太熟絡，但佢咁都肯抽空出席，認真畀面。 
連群星大合照都冇寧進份，可想而知，佢同主人家有幾好朋友啦。 
相反，新郎哥就比寧進怕醜得多喇，因為當阿Yu情深獻吻之際，周永恆居然反反眼，求其敷衍了事咁，好彩阿Yu睇唔到咋，唔係實唔開心嘅。 
周永恆好似想快啲收工落台咁，唔通驚錫得太耐影響病情？ 
留言列表
