唔少後生女書都未讀完，就趕住入娛樂圈，諗住可以過下啲大明星嘅生活，其實世上邊有免費午餐，呢班冇乜墨水，只靠剝衫露肉嘅女仔，入行冇耐已經俾新一班嘅後浪淹沒，消失得無影無蹤，計我好姨話，無論係做邊一行，都應該自我增值，好似星級主持顧紀筠咁，忙緊TVB嘅主持工作時，已經讀緊珠寶鑑證，家陣先至可以急流勇退，轉行做珠寶鑑證嘅工作。
其實顧紀筠結婚之後，有老公照顧生活，做珠寶鑑證亦只係賺下私己錢，生活總算無憂，加上退出幕前多時，平日都係Shopping打發時間，日前好姨喺中環遇到顧紀筠，身穿粉紅色外套嘅佢，睇落十分精神，連環掃咗幾間鞋店，但最後都係冇收穫，其後好姨見佢拎出電話同人煲粥，跟住重約埋對方見面嘅地點，究竟佢約咗邊個呢？幾分鐘之後，謎底終於解開，原來佢係約咗老公，老夫老妻都咁恩愛，真係羨慕死好姨。 
退出幕前做珠寶鑑證咗顧紀筠，多咗唔少時間行街Shopping。 
咪睇顧紀筠上晒岸咁款，佢買嘢依舊精打細算，買鞋最緊要係睇下鞋底標明嘅價錢。 
顧紀筠傾電話時，笑到見牙唔見眼，唔知咩人可以令佢咁開心呢？ 
謎底揭開，原來佢約咗老公喺商場外會合，結婚咁耐都咁甜蜜，羨慕死人。
全站熱搜
留言列表
