明星靚相大分享☆

由汪阿姐汪明荃、王祖藍、阮兆祥再加埋李思捷一眾扮嘢高手主持嘅《荃加福祿壽》，雖然俾人話係明抄亞視攞分嘅節目《香港亂口翕》，但橋唔怕舊，喺無綫播出就寧舍唔同，過去幾集都有好口碑同收視，其實祖藍、祥仔同思捷以前喺台慶嘅扮嘢演出已經大獲好評，今次節目收到都係意料中事。

上個禮拜錄影嘅最新一集《荃加福祿壽》，幾個扮嘢天王又大玩娛樂新聞，就連同無綫友好嘅英皇都冇面俾，最搞笑係本身係英皇歌手嘅祖藍竟然扮「師姐」阿Sa，同思捷扮咗「中基」大玩「離婚記招」，之後思捷又扮劉德華同朱麗倩，真係天王天后全部冇面俾，但其實節目嘅主持人始終係阿姐，雖然佢唔使扮鬼扮馬，但嗰日佢容祖兒上身大唱〈我的驕傲〉，但向來要求極高嘅佢竟要錄足3次先肯收貨，所以話扮嘢都唔係求求其其嘅。


最搞笑都係，李思捷扮劉華與朱麗倩手拖手出現機場被傳媒追訪一幕。


李思捷同王祖藍勁扮全城熱話嘅「Sa基」離婚記招，身為英皇歌手嘅祖藍，竟然連師姐都敢玩？


上個禮拜，《荃加福祿壽》湯盈盈、HotCha、冼灝英同趙永洪做嘉賓，工作當然係扮嘢搞笑。


王祖藍一向扮女人都維肖維妙，當晚就使出渾身解數演繹鄭秀文首〈信望愛〉，就連個deep V造型都跟到十足


汪阿姐當晚亦不甘示弱，聯同Hotcha，在台上大唱大跳自己當年首本名曲〈熱咖啡〉。