近來很多人擔心，先是隸屬與無綫有歌曲版稅爭端的四大唱片公司之一的他，明明有新歌派台，卻不能在無綫宣傳。另一方面，他honey陳志雲因涉嫌貪污被捕，鄧健泓的工作量可能銳減，替崔建邦主持的《勁歌金曲》，也被來路貨歐陽靖頂上。總之，有傳聞指無綫如有「種族大清洗」，他必定遭殃。

「人哋喜歡點樣講我都係控制唔到，我一九九六年九月二十六號，第一日入兒童節目錄影廠，四年之後我簽咗經理人約，我喺TVB都服務咗好耐，我亦好相信我係一個幾盡責嘅員工，我唔相信TVB會學出面啲人揣測咁樣。你要我喺其他電視台亮相，應該冇可能，除非完咗約啦。」

讀美術出身的鄧健泓，由參加新秀，到兒童節目主持，再拍劇、再當起歌星來，也十分順風順水。

「呢一行講際遇，我敢講開頭嗰幾年嘅際遇係非常之好，亦都非常之順利，嗰幾年我腦裏面只係諗過順利，從來冇諗過跌落嚟。」

很多人覺得他前途未卜，當事人則自有一套思想。

「喺過去三、四個月，我突然有個好得意嘅諗法，work㗎喎！個諗法就係：我淨係諗今日，準備好聽日。」簡單來說，即是「活在當下」。

「漫天飛花，最美剎那瞬間跌下……」

帶着沉鬱眼神，嘴角微翹的鄧健泓，哼起許志安的歌來。

拓展新門路

到二○一○年的今天，還有不少人在卡拉OK愛唱鄧健泓近十年前的經典作品〈直上〉、〈心寒〉和〈朋友二號〉等等。

「已經無以為繼咗好耐啦！所有嘢都係講緣份，可遇唔可以求，係你嘅始終係你，唔係你始終唔係你。如果唔係你嘅嘢，就算你幾努力追都唔會得到。係你嘅，可能唔需要花太大力氣已經有。我好希望我嚟緊有一隻可以代替到〈朋友二號〉、〈心寒〉，又或者〈直上〉嘅歌。一隻比較一○年嘅代表作，但我唔知。我唱〈朋友二號〉嘅時候都冇諗過，會有咁多人喜歡呢隻歌。

「今次成隻新碟好整體，好連貫咁樣，同一個混音師，同一個監製。以前唱得比較歇斯底里一啲，今次諗住轉一轉。我哋之前拍咗MV，因為『四大』關係，喺TVB冇得點樣宣傳，所以我哋擺咗上網，可以冇國界亦冇時間限制咁，大家可以click入去睇。」

鄧健泓讀美術出身，本來是想當美術老師的，因為他嚮往放學後和學生打波云云。

「我以前都有讀多媒體嘅嘢，依家我都同朋友做緊一啲多媒體嘅製作公司，但我參與係最少嘅，我依家講，呢間公司我有份，都好似受之有愧咁，因為我本身有工作，我只係間中畀啲意見，將來我唔敢擔保我會用番多啲時間喺呢間公司度。

「嚟緊會做多啲舞台劇，我會嘗試做幕後嘅嘢，例如拍歌咁。遲啲我會接觸另外一啲歌手，同佢哋拍歌、做吓導演，剪接。

「當然每個歌手都希望紅館開演唱會！我都唱咗十年歌，我係一定夠歌開一個兩個鐘頭嘅演唱會。如果要每十分鐘有高潮嘅話，我每十分鐘都有一首大家記得嘅歌！」

鄧健泓拍過不少電影，沒有讀過演藝學院和藝員訓練班的他，自言《閃電傳真機》是他最好的訓練。「每日你都有performance出街，如果你可以睇到自己缺點，咁咪不停咁改變囉！」

不想太多

不少藝人說過，當藝人是個等待的行業。過分主動的，就會被標貼為「搲撈」。

「由始至終我都係悲觀嘅人，好擔心、諗好多嘢嘅人。將來嘅嘢諗得太高太遠，做唔到、去唔到，自己會好唔開心。有啲嘢係攞唔到，你都控制唔到，你唔知將來發生咩事，咁不如活在當下。到今日你問我想唔想成績好啲，攞番以前曾經有過嘅嘢，我梗係想，只不過我唔諗咁多。年紀都大，都係嗰句，無論你幾多問題發生，你要得嘅都始終都得。你要唔得嘅，就算所有嘢配合晒畀你，你都係唔得。」

不久前，屬於他的愛情也離他而去了。

「隨緣啦，我自己知道自己想要啲乜嘢，我亦都唔會咁容易開一段關係。我好想我另一半係我覺得鍾意嘅，係我需要嘅，又符合我要求嘅！當然你揀人，人揀你！我唔會太着急，亦唔會太在意，自己做好咗自己先。不嬲感情始終係私人嘢，我從來冇諗過公開任何一段感情，因為呢啲自己嘅嘢，唔需要太刻意去偷偷摸摸。如果係嘅，我唔會講畀你知，你哋覺得係咪係囉。

「狗仔隊或者突發組，我好明白佢哋工作範疇，最重要係你唔好生安白做。即係我明明唔係咁，你話到我咁，我會有啲介意囉。當然我都明白係咁o架啦，所以我返到屋企唔會上網、唔會睇TVB嘢、唔會睇雜誌，淨係聽歌打機睇電影！」

與陳志雲（後中）和錢國偉（後右）合作無間，壓根兒鄧健泓也不是跟他們一夥。

最甜美的人

入行初期，鄧健泓得意了好幾年，後來又跌宕了好幾年。

「你會feel到冇咗動力，冇乜嘢推住你，好靜止咁。個啲感覺好奇怪o架，出街再冇人同你影相，又冇乜特別嘢喺你身邊發生。

「我有一段時間離開咗TVB，之前嗰間公司有少少問題，導致我生活幾唔穩定。因為陳志雲一個電話，話TVB隨時歡迎我返去，幾雪中送炭，所以佢梗係我恩人啦！佢簽我返TVB，亦都理解我經濟上有問題。返咗TVB，有番穩定收入，生活上番軌道，佢又教識咗我好多嘢，EQ、待人接物，佢係我嘅恩師。

「我介意嘅係，大家好似唔記得咗我曾經付出過好多努力，自己行得都幾好，淨係記得呢幾年我返番TVB有陳生幫，好似真係唔記得咗其實我都好努力做過一啲嘢。

「二○○二年唔記得幾多號（該是三月十三日），《朋友二號》出碟第一日，Paco中午十二點打嚟，佢話：『Patrick！返單呀！』我話：『吓？咁快？多謝Paco！』四點，再打嚟。『Patrick！過萬呀隻碟！』跟住晏啲再打嚟：『Patrick，過萬五喇！』如果以依家標準我攞咗金唱片！嗰日係我人生裏面最開心。個陣時我女朋友係原子鏸，夜晚我去尖沙咀接佢，佢買咗一紮花，上面有我隻碟，然後影咗張即影即有，嗰個moment相信係我一生中最開心。」

這是鄧健泓一生中覺得最甜美的一天，和陳志雲沒有關係。

鄧健泓再結識女朋友，也不會公開了，更遑論和異性拍一張這般的合照。當年他和原子鏸在路上的報紙大半版咀嘴照，我仍很深刻。

近年的藝人流行不認拍拖結婚，但分手離婚便高調宣布單身，相信鄧健泓也是這種文化的追隨者。

Blog中我

這是的的確確的後記，因為在訪問後發生。

訪問當天，攝影師一邊拍照，鄧健泓也用iPhone到處拍，並即時上載到微博。他拍下坐在跑馬地黃泥涌道街上長椅，用放大鏡看書的伯伯，還有……我。

在他的微博上，有這麼令我嚇一跳的一句：「笑起來像小孩般得意的《東周》記者李醒班！留意這是非一般的傘子。」

我在回家的巴士上，用手機回應：「我就是那個記者了，都三十幾歲人了，幸好還能擠出一個小孩式笑容，昨晚我只睡了四小時……」

執筆之時，正值人人放假我開工的復活清明節超級黃金五連休，如果我有微博，也會拍下我的案頭，然後寫下這一句：

「清明時節雨紛紛，路上行人鄧健泓。」