《第29屆香港電影金像獎》日前圓滿結束，任達華就打破宿命，首次攞金像獎稱帝，而紅姐惠英紅都不負眾望，相隔廿幾年再次封后，好姨都戥佢哋開心。但話時話，當晚身處現場嘅好姨就見到唔少「濕碎」嘢，唔係講笑，啲「濕碎」嘢好多真係濕濕哋。
除咗當日有少許毛毛雨，以及得獎者喺台上講到眼濕濕之外，好似拎到「最佳女配角」嘅葉璇咁，佢行紅地毯嗰陣都好鬼「濕滯」，唔知係佢太緊張定當晚真係涼涼哋，好姨見佢第一步踏入地毯，居然唔小心「凸點」，不過好彩葉璇都醒目，識得行埋一邊「撫平」情緒，先至冇再出醜咋。但最奇怪嘅係，佢呢頭先「凸點」，嗰頭腋下濕咗一大撻，又熱又凍咁，睇嚟葉璇真係好緊張咁喎。
但「濕滯」嘅又點止葉璇一個呀，好似有份獻唱〈龍的傳人〉嘅許志安，行紅地毯嗰陣，好姨已經見佢條褲個大髀位無端端濕咗一撻，以為佢俾雨水濺濕咗啦，點知到佢去到台上，仍然有撻污漬喺度，鬼咁肉酸嘅，唔通佢知道無乜人睇佢嗰part，所以佢可以咁瀟灑，就咁走上台？不過安仔都唔夠《歲月神偷》嘅羅啟銳導演失禮，因為佢拎住「最佳編劇」同「最佳電影」獎之後，居然全個心口濕晒，搞到大家想同佢攬攬慶祝都唔敢呀。; 
唔知係嚇一嚇定還是對個獎太着緊，葉璇居然嚇到腋下濕晒，金像獎最「濕滯」嘅重唔係佢，好彩最後佢都贏咗。 
葉璇一踏落紅地毯就唔小心凸點，重要搞到埋場邊「安撫」情緒，認真狼狽。 
至於許志安，條褲喺大髀位就有撻異常礙眼嘅污漬，個位雖然尷尬，但安仔仍然照樣上台唱歌，勇氣可嘉。 
張靜初條裙前面睇就搶眼，但一睇側面就出事喇，件打底衫真係令佢扣晒分。 
《歲月神偷》羅啟銳導演贏咗大獎，但就輸咗儀態，你睇佢心口濕晒咁，大家點同佢攬攬慶祝呀？ 
有人話李宇春行紅地毯時嘅打扮配搭得宜，甚至誇張到話佢「帥媚美集於一身」，唔知大家又點睇呢？
留言列表
