明星靚相大分享☆

日前泰國發生多次連環炸彈爆炸，剛巧身處曼谷的「八模」成員陳嘉寶（Anjaylia）及蔡穎恩（Evelyn）在當地拍寫真期間，竟一度與經理人失去聯絡，當成功與經理人通話時，她們即呼叫︰「真係好驚返唔到嚟！」

Anjaylia（右）與Evelyn正在曼谷拍寫真，期間一度與經理人失去聯絡。（資料圖片）

近日泰國局勢愈來愈緊張，本港更發出黑色外遊警報，而Anjaylia及Evelyn仍身處曼谷為寫真取景，認真危險！由於當地前晚發生多次連環爆炸造成逾百人死傷，所以其經理人都吩咐她們每日要向家人同公司報平安。可惜昨日經理人曾一度與她們失去聯絡，幸好經過幾小時不停的長途撥號，經理人終於成功與她們通話。

機上打橫瞓

在電話訪問中，二人都坦言非常緊張，Anjaylia直說︰「上機只係留意到機位好鬆動，可以打橫瞓都得，點知一落機就見到平日擠滿遊客嘅曼谷機場冇咩遊客，嗰陣先識驚。」身旁的Evelyn又搶住回應︰「今次影寫真真係搵命博，好彩我哋唔係喺市區影相，但都驚下個星期返唔到嚟！（咁危險？）我講驚班機會Delay或者取消。」

由於Anjaylia與Evelyn出發往曼谷時仍未知局勢日趨嚴重，所以她們在機艙內不停玩素顏自拍，Anjaylia更帶埋深愛的小熊陪伴，兩人表現輕鬆，Evelyn更在微博上載新照片。

彭發唔擔心

另外，寰宇老闆林小明開拍的《B+偵探》原本於5月在曼谷進行煞科工作，但因局勢問題故考慮延期拍攝或留港補拍，而同樣身處當地的導演彭發則為《完美童話》做籌備工夫，但他就直言不擔心︰「都唔係第一次，泰國人都習以為常，而且我又唔係喺市區，呢度都好平靜。」