由菲林機發展到數碼機的年代，孫耀威也是一「機」在手，去到那裏也拿着相機拍下眼前景象，他說要記下那一刻的光陰。人越大，流失的東西也越來越多，腦袋容量有限，不自覺會遺忘某些時刻，某些光景，相片正好能讓人尋回往事。老孫拍照堅持不假手於人，有時會帶備腳架，有時借助一些物件固定相機位置。他說：「影低嘅全部係自己嘅感覺，自己一手一腳做出嚟好啲，借人哋隻手就唔係嗰回事。」近年，老孫主要用兩部相機，分別係「大女」 Canon 5D Mark II配 24-105EF鏡頭，及「細女」 S90 Compact相機。他說：「我用佢哋影咗好多相，曬做相片，等我老咗逐頁逐頁翻睇我嘅人生故事。」撰文：王連連
故鄉尋根（左圖）
「呢度係我鄉下潮州，住咗好多我嘅親戚朋友，我每次返去都覺得特別親切。有時間我就同媽咪返去探佢哋。我刻意影黑白，係因為最初有相時都係黑白色，就如呢度係我嘅根一樣。」
小孫公園 放大圖片 
「我間中都會返母校，回憶讀書時候嘅開心事。呢度就係我母校後面嘅公園，我好鍾意喺呢個鞦韆玩，細個都冇乜煩惱，我經常提醒自己，遇困難唔好將問題簡單複雜化，用童心可能解決到件事。家好多公園都冇咗鞦韆，要好好影低留念。」
不可含怒到日落 放大圖片 
「有日我做嘢好唔順利，跟住拎個相機去天台，睇風景平靜心情。我慣咗唔開心就上天台影下相。生命同天氣一樣變幻無常，唔係我哋掌握之內。今日唔知聽日事，對住咁靚嘅日落，做乜要浪費時間去唔開心，第二日又係新的一天啦﹗」
如果生命還有歌 放大圖片 
「三年前我決定返嚟香港再做唱片，係因為我真係好鍾意音樂。不過有時出碟做宣傳，為咗商業原因，未必可以完全講到自己嘅音樂理念。好難得有一次我可以搞一個研討會，對住座上客一次過講晒我嘅想法，更可以邊彈邊唱，我忍唔住留住呢一刻，將來睇番，相信諗起都興奮。」
失戀得到甚麼 放大圖片 
「做人有時好迷失，都唔知自己應該點做，真係想搵盞明燈指引自己。有次覺得好沮喪，於是駕車去郊外兜風，點知迷路又差唔多天黑，搞到個人都急晒。有少少嘅時候，咁啱全條街嘅燈着咗，喺黑暗中突然見到一片光明，根本唔使怕。」
我的故事上集 放大圖片 
「呢度都係我母校，同樣留低好多回憶嘅地方。喺我人生故事嘅前半部份，學校都佔據咗好多片段。有次返去搵老師，經過呢度，我覺得特別親切同溫暖。我能夠有今日嘅成就，真係要多謝教過我嘅老師，同埋陪我長大嘅朋友。」
老孫 36變 放大圖片 
「有次我拍 MV，要試好多唔同造型。當時心想，我 36歲其實都唔係老，點解要怕改變？試到呢個爆炸頭，睇到真係覺得好搞笑，好似有個新嘅『老孫』出現，忍唔住要記低呢一刻，哈哈。」
談「分」論嫁 放大圖片 
「有一次有個女歌迷帶埋佢未來老公着住婚紗嚟參加歌迷聚會，印象好深刻，因為自己都好想搵到真命天『女』，想拍拖一擊即中，唔想再亂拍拖亂去試，都大個喇，唔會咁易就分開。」 
留言列表
