VW由代理回歸到車廠直接經營後，福士車價屢有驚喜，繼 Polo及 Golf後，仲有款 Tiguan中型 SUV值得留意！歐洲車賣三十零萬日本價，有齊 7速 DSG同全時四驅，更有 200匹馬力貨如輪轉，及 280Nm步步高升強橫爬山扭力！記者：徐影龍攝影：周旭文Model： Hidy@GME Models
其他副刊影片 穿梭山路越爬越有 放大圖片 
■視野廣闊軚感輕巧， SUV都啱女仔揸。
農曆年一向無乜新車，索性跟福士借架 Tiguan玩長測，原以為屬兩年前試過嘅 6速 Tiptronic版，點知廠方已換上 7速 DSG波箱，令人更為期待。鬧市出發， Tiguan天生唔係霸氣大牛龜，中等體形係喺新年期間車多到爆滿瀉嘅路面，又真係 Fit到漏油，不單止塞車 Cut線走人夠 Easy，就算旺區泊街邊超窄 S位，一樣輕鬆得多，最重要係 DSG轉波夠靈敏，燈位停停開開間，波段運用相當醒目，令車身無頓挫感之餘，亦變相幫你慳番唔少寃枉油錢。SUV跑街當然嘥，轉上紅棉路直指太平山，抒發一下塞咗兩粒鐘車嘅愁緒。由於車重相對較輕，儘管 200匹馬力唔算驚人，但 Turbo及 280Nm強大扭力輔助下，上山一段爆贏唔少金鐘出沒嘅貴車，亦免卻被慢車阻礙前路，由馬己仙峽道一直飆上凌霄閣。面對大量超窄彎位， Tiguan又以身形取勝，加上全時四驅增加咬地能力，直驅太平山輕而易舉，新年流流，好有步步高升之寓意，非常好意頭。
放大圖片 
■天窗面積頗大，亦可向後收納，令車廂充斥陽光。
放大圖片 
■尾廂一般已有不俗空間，四平八穩無多餘凹凸阻碇位。
放大圖片 
■後排有獨立風口、可摺式手枕位，亦可放平增加尾廂空間。
放大圖片 
■後座兩個位都有可摺式茶几仔，用途多多。
SUV當家庭車咁揸 放大圖片 
■尾部並非斜頂設計，後座唔怕頂頭，尾廂空間亦大增。
穿過柯士甸山道上到山頂公園，意外地無乜人羣，攝影師同 Model忙於拍攝，我就偷閒從旁細心欣賞 Tiguan嘅賣相。雖然 Tiguan骨子裏有 Turbo及 280Nm扭力高表現，但外表卻無嚇人霸氣，又或狂野 Off-Road Feel，感覺反而偏向溫婉親切，大量電鍍飾邊亦增添不少高貴氣質，好適合想偶爾玩吓車、又要接載一家大細嘅好爸爸。福士並無將貨就價，車內仍有不少豪華貼心設備，如前座 Sport式座椅連暖熱功能、全電動大天窗、多功能真皮軚環及百變座椅，連同級車較少見嘅後座茶几都屬標準配備。揸足全日，發覺軟熟座椅及良好視野值得一讚外，軚感輕重適中，女士們更易駕馭 SUV。
放大圖片 
■馬己仙峽道彎多且窄，全時四驅及強大扭力可從容應付。
放大圖片 
■座椅軟熟兼承托得好，由朝玩到晚都未覺攰。
VW Tiguan 2.0 TSI 放大圖片 
引擎： 1,984cc直四 Turbo馬力： 200ps/5,100rpm扭力： 280Nm/1,700-5,000rpm傳動： 7速 DSG波箱 AWD售價：$358,000查詢： 3698 9688（ Volkswagen HK） 
留言列表
