憑一句「跳出香港」人氣勁升的天氣女神黃婉曼，因出席美容產品活動而被無綫新聞部炒魷，不過卻有樂易玲賞識，意欲羅致她簽約做藝人，「世界盃」開鑼後，黃婉曼在《世界盃動起來》擔任評述員，又上《獎門人》、《星級廚房》等節目，曝光率甚高。為此，卻惹起新聞部不滿，直上天庭投訴，結果，在「世界盃」結束後，黃婉曼無得留低。
唔守規矩
上星期，無綫內部出了一份通告，指在「世界盃」完結後，若要起用黃婉曼做節目，必須有充分理據，以及經過管理層批准。據知這份特別通告，是向來獨立的新聞部不滿部門被炒的員工，竟然立即可以重返公司，獲製作部重用。
「呢件事唔啱規矩，黃婉曼俾新聞部炒，竟然可以即刻返轉頭做藝人，喺《東張西望》接受訪問，又上《獎門人》、《星級廚房》玩遊戲節目，就連樂小姐都話想俾個節目佢做主持人，如果個個新聞小花有樣學樣，咁以後點管班女仔。」工作人員透露。
投訴事件直達方逸華，最後由副總經理麥當傑出面向各部門主管「訓話」：「麥當傑問啲高層有冇sense，主動辭職嘅員工都要過三個月冷河先可以返嚟，何況佢係俾公司炒出去，仲要俾咁多嘢佢做，仲講明『世界盃』之後，暫時唔可以搵佢做嘢，就算搵佢，都要得到管理層嘅批准。」
臨門一腳
據知，只差臨門一腳，黃婉曼便成為無綫力捧新人。「世界盃」期間，樂易玲多次搵黃婉曼傾藝人合約，不過對方卻拖拖拉拉，未有即時答應，直至日前老闆娘落令要嚴守紀律，黃婉曼即時變得「生人勿近」。
週日（七月十一日），「世界盃」冠軍戰當晚，黃婉曼在商場擔任嘉賓評述員，對於遭新聞部阻撓一事，她表現得十分錯愕：「我唔知道有呢件事，佢哋為咗我出通告，都好睇得起我，不過冇新聞部，我亦都冇今日，遲啲我會放假，之後再返雜誌社開工，其實我都唔一定要做呢一行嘅。」
天氣女神
「有波有天氣」的黃婉曼，原名粘冰冰（洋名Icy），96年由內地來港定居，於中文大學新聞與傳播學院畢業後加入無綫新聞部，曾為《新聞透視》記者，09年2月被欽點轉做天氣女郎主持晚間天氣報告，憑一句「跳出香港」跑出。
今年2月，她離開無綫，轉職中國移動旗下雜誌任編輯。直到5月她重返無綫，但不足1個月，再度離職新聞部，近日食住世界盃熱潮於商場及無綫《世界盃動起來》講波，成功掘到第一桶金。
咁殘忍！（設計對白）
跟現場兩位男觀眾玩遊戲，黃婉曼笑得開心。
「世界盃」冠軍戰當日，黃婉曼跟黑澀會美眉成員大牙（中）及Apple（右）在商場擔任嘉賓評述員，雖然未有大騷32F本錢，但就着短裙露長腿。
在節目中被張國強（右）讚了一句「好波」，黃婉曼又再人氣急升。（《蘋果日報》圖片）
人氣升，彼邀上《獎門人》，黃婉曼（左）跟浸大E神Carol玩吹波波遊戲。（《FACE》圖片）
因為出席美容產品活動，在五月重返無綫兼職天氣女郎的黃婉曼又被炒魷。（《蘋果日報》圖片）
未做天氣女郎前，黃婉曼在新聞部任記者，未經悉心打扮的她，出鏡時不單兩眼無神兼帶「娘」味。
成為天氣女神後黃婉曼被大起底，發現她放工有攝影師男友接送返屋企。（《FACE》圖片）
離開新聞部後，黃婉曼在「世界盃」期間頻頻出席活動搵真銀。（《蘋果日報》圖片）
留言列表
