潮便當

韓日印美 外賣精選

2012年07月18日 ~~ 第269期 Face

雖然香港租金愈黎愈貴,不過要食得好,又畀得起,都唔一定係天方夜譚。近期市面開了好幾間抵食的外賣快餐店,一個 lunch$50以下就搞掂,唔使餐餐食碟頭飯,仲可以畀你揀最地道的韓式鍋飯、印度咖喱、紐約薄餅同日式熱狗,邊個仲夠膽話平嘢無好食?

即製 9吋紐約薄餅夠分量


沿着中環扶手電梯一直去到些利街,在右手邊的窄巷內,竟然有間主打紐約薄餅的企理小店。雖然薄餅只有 5款口味,不過全部每日新鮮製造,廚房還會自製芝士、茄醬、豬肉腸,更會選用本地有機蔬菜,完全落足料。紐約薄餅以分量見稱,每件足足有 9吋長,餅底比傳統的意大利薄餅要厚一點,卻還是比連鎖店吃到的要薄上一半。餐廳特別購入意大利石製焗爐,傳熱快、溫度高,薄餅烤出來皮夠脆,特別是小店的招牌 publico薄餅,微溶的自家製 Mozerolla好吃到不得了。


Publico$45/塊
大廚改良了最傳統的意大利款式,加入意大利辣椒、橄欖油和自製芝士等,辣味醒神,愈食愈開胃。


Brooklyn Special$45
特別設計的配搭,有機茄子加烤過的青椒和蒜粒,還有自家製的茄醬和芝士,味道香濃。


Sausage$40
用本地豬臀和豬背自製的意大利甜腸,蒜香帶微辣,夠哂惹味。


Cannoli$35
意大利西西里島最傳統的甜食,酥皮炸得香脆,中間是比忌廉還要幼滑的 ricoth芝士,混合開心果和橙皮,一啲都唔漏!

Check!


款式:★★★
Pizza款式唔多,不過用料足又新鮮,質優取勝。

環境:★★★★ 1/2
唔想外賣,堂食都有足充座位,可以歎冷氣同聽音樂,乾淨企理。

抵食:★★★★
全部材料自家製又 organic,一塊薄餅最平$30有交易,女仔一定夠飽。




同喺附近住的朋友嚟,試過 2款口味都覺得好好食呀,價錢係中環嚟講一 啲都唔貴。

Pizzeria Pubblico




營業時間: 11am-11pm
電話: 2530 2779
地址:中環俊榮里地鋪

宋芝齡韓式料理百年炸醬麵


有韓國血統的藝人宋芝齡( Angel),最近夥拍媽咪同阿姨進軍飲食業,在銅鑼灣開設韓式外賣店。雖然宋芝齡不諳煮食,不過有在韓國經營餐廳的母親支持,近月都駐足香港為食店打點一切。店中差不多 8成材料,如辣椒粉、紫菜、魚餅等都是由韓國入口,味道和做法都夠地道。當中一定要試 Angel家傳的炸醬麵,由外公開始做了過百年的炸醬麵,用黑色豆豉醬和韓式辣醬每日在韓國人手炒香而成,空運到港後再拌入 10種新鮮蔬菜,味道香卻唔鹹,絕少在本地韓式餐廳食到。




石頭撈飯$46
最新推出的韓式撈飯,用韓國辣椒粉製的辣醬味道偏甜,香辣唔嗆喉,配上近 10款蔬菜,健康唔油膩。


魚餅$7塊、韭菜煎餅$18
魚餅由韓國空運到港,韭菜煎餅則是韓國傳統用來拜祭祖先的家庭小食,做法簡單,蘿蔔絲和蔥絲夠多,食落有咬口。


百年炸醬麵$46
Angel祖傳秘方,由韓國調配好的炸醬空運到港,再加入 10種蔬菜炒香,絕不死鹹。

Check!


款式:★★★ 1/2
開業 2個月,不停新增 menu,雖然只有 5款 lunch set,不過小食款式夠多。

環境:★★★
堂食只有 3張細枱兼無冷氣,坐得幾辛苦,外賣最實際。

抵食:★★★★
8成材料由韓國 home made入口,醬料同做法地道,絕對抵食!




Bee中學學生
聽朋友講呢度 啲嘢好食,所以咪嚟試,試過炒年糕同翠玉瓜餅,覺得幾好味,其他地方都未食過。

韓式本家




營業時間: 12nn-11pm
電話: 6598 6401
地址:銅鑼灣渣甸街 30號地下 B鋪

自創和風熱狗 Wasabi味夠出位


老闆 Keith運用創意,將美式熱狗 crossover日式醬汁材料,創立了全港第一家日系熱狗快餐店,仲落重本花了 5萬蚊訂製熱狗外賣機,似足日本拉麵店,不過只接受八達通。熱狗店唔只有 gimmick, Keith亦由本地麵包廠訂製了 23cm長的黑芝麻熱狗麵包,輕輕一烤,面脆內軟腍,還有自家調味的沙律醬, Keith用橄欖油取代普通食油,感覺 light好多。全店有 6款熱狗, 5款熱狗腸,全都由德國製造,無論是雞肉、豬肉還是牛肉,全部都 100%無添加,唔油膩。當中以 Sabi Dog最受歡迎。新鮮山葵色澤翠綠,磨成粉的乾山葵則味道更香濃,將兩者混合再溝沙律醬,酸酸甜甜,再有 wasabi的餘辣,正!


Niko Dag$32
原創口味,日本入口的仿蟹棒加蟹子,啖啖肉,和風十足。


Sabi Dog$32
用上新鮮山葵加山葵粉兩溝而成的醬汁,入口即打通任督二脈,鼻腔有一股山葵香卻不會嗆喉。


Nori Dog$32
日本燒雞汁溝沙律醬雞肉腸,雞肉味唔算太濃,不過加埋特製醬汁,鮮味即時提升。


特別訂製的熱狗機,八達通付錢後,可拿着熱狗牌等開餐。

Check!


款式:★★★ 1/2
雖然只有 6款熱狗款式,不過全部口味獨特。

環境:★★★★
除咗外賣,食店內都足夠容納 15-20人堂食,有冷氣都坐得舒服。

抵食:★★★★
隻隻熱狗都落足料,醬汁同腸仔都鋪滿成個麵包!




我係附近返工見到咪嚟試,都試過好多口味,最鍾意係 Sabi Dog, wasabi味香又唔攻鼻,個感覺好得意又好食。

J-Dog




營業時間: 12nn-10pm
電話: 2512 2452
地址:大坑銅鑼灣道 124號地下

JoJo首推印度外賣快餐平 3成


呢間印度外賣店大有來頭,菜式同材料都係出自 1985年開業至今的 JoJo印度餐廳,今次首推外賣快餐店,同樣的食物以比餐廳平 3-4成的價錢賣出,真係抵食好多。最優惠一定係午市套餐,有 7款選擇,咖喱牛、雞同羊一定唔少得,仲有時菜,白飯同煎香酥餅,一個大男人都隨時食唔哂。必試推介有奶油滑汁雞,雞肉嫩滑,用芫荽、紅椒粉、薑蒜等印度香料醃過夜至完全入味,再焗熟,入口先味道偏甜,不過辣味在喉嚨開始散開,辣度十足。


奶油滑汁雞午市套餐$48
巴西的雞髀肉夠滑嫩,用印度香料醃過夜,非常入味,愈食愈香辣。


迷你薯蓉薄煎餅$22
南印度的有名小食,做法有點似法國 crepe,用咖喱汁調味過的薯仔粒,又腍又入味,一啲都唔油。


香料咖喱羊肉$48
用小豆蔻和丁香等香料炆煮蒙古無骨羊髀肉,比街外的咖喱香料味更香更濃,食唔停口。

Check!


款式:★★★★
由小食到 lunch box有成差不多 50款選擇,外賣店來講算好多。

環境:★★★
除咗外賣,餐廳亦容納 12人堂食,不過無冷氣,真係食到出汗。

抵食:★★★★
整體價錢唔算貴,特別係下午茶,$20左右有嘢飲又夠分量!




食客 Raj Choudhury 飲食業
好有家鄉味道,我哋全部朋友都好鍾意食,可以堂食又可以外賣,好方便。

JoJo Express




營業時間: 11am-8pm
電話: 8100 8869
地址:灣仔港灣道 28號灣景中心 Brim 28 1樓 4號鋪

撰文:伍嘉瑩
攝影:葉曉明、謝耀恆

    stacylife 發表在 痞客邦 留言(0) 人氣()