那些年，我們都在屋邨走廊中穿來插去，嬉戲追逐；如今，十來歲的孩子已經穿梭化妝品專櫃，為化大眼妝而選購所需用品。

那些年，我們三歲入幼稚園、六歲入小學，一切按照法定入學年齡進行；如今，十個月大的嬰孩已被送到playgroup，由外傭姐姐或母親挾着雙腋，學跳舞學唱歌。

世界變，變得很快，那些年的應有童真和快樂大抵已經變質；育有四個月大女兒張逸晴（Dora）的曹敏莉，無可避免地接受現實，只希望透過不斷的溝通，讓女兒快樂地成長，「依家小朋友間嘅競爭都好大，我都唔想佢學嘢慢過人、蠢過人，但同時我都想佢好開心咁長大；我會盡量畀多啲時間佢，我要做佢媽咪之餘，亦要做埋佢最好嘅朋友！」

今年七月，曹敏莉為丈夫剖腹誕下8.7磅女兒，名張逸晴，英文名Dora，她說女兒性格似足爸爸夠冷靜。

相處點滴

曾於美國留學的曹敏莉，○三年返港參選港姐並獲得冠軍殊榮，美貌與智慧並重已是不爭的事實，其溫文儒雅的個性，經過歲月的洗禮，竟毫無磨損的痕迹，溫婉地訴說着四個月大女兒Dora的點滴。

「我同老公成日笑佢好似一嚿飯咁，性格好冷靜，開心嘅時候唔會大笑，唔開心嘅時候又唔會大喊，只係皺皺眉。佢好爛瞓o架，出世後嗰個月，除咗我之外，冇人見過佢擘大眼；半夜要餵佢食奶，都係我摷醒佢，飲奶過程，佢可以全程瞇埋眼，好似冇醒過咁，真係唔知點解可以瞓咁多o架！」

曹敏莉女兒的乳名為「多多」，由英文名Dora轉化而成；由懷孕到分娩，她跟丈夫，甚至其他家人，均將多多兩個字掛在口邊。女兒出世那刻，曹敏莉看着她，跟她說：「你就係多多喇？」女兒竟然懂得單眼回應，令初為人母的她留下了深刻的印象，「依家全部人都嗌佢做多多喇。」曹敏莉笑着說。

四個月大的Dora遺傳了媽媽的溫柔文靜，坐在梳化一角羞澀地微笑。

難忘的不只將女兒帶到現實世界中，還有替女兒洗澡的過程，已夠曹敏莉樂滿半天，「我好鍾意同多多沖涼，覺得佢頭髮濕咗，肥嘟嘟，好得意。記得初初，佢係瞇埋眼瞓住覺沖，跟住就戇居居擘大眼，每次落水都好緊張；到咗依家，佢就好鍾意沖涼喇，一落水就係咁踢係咁踢，睇住佢都覺得好好玩呀！」

除了女兒的變化，從事金融行業的丈夫張家傑的變化，曹敏莉也看在眼裏，「以前老公七點鐘起身，七點半就要出門口返工，覺得佢好辛苦，好忙；依家多多出咗世後，老公照樣七點鐘起身，餵囡囡飲奶，同佢傾吓偈，可以八點幾九點先出門口，原來之前佢係可以晏啲返嘅！」曹敏莉帶點醋意的說。

曹敏莉懷孕初期不斷嘔吐，更一度令臉部微絲血管爆裂；後期又因肚太大而感到腰骨痛，走路也感吃力。