明星靚相大分享☆

曾經傳過緋聞嘅古天樂同鄭秀文（ Sammi）已經 7年冇合作，嚟緊佢哋一齊拍杜琪峯同韋家輝嘅愛情片，日前佢哋同埋劉浩龍、黃奕等出席拜神儀式，老闆林建岳都有到場，大隊遲啲要到香格里拉海拔 4000米高嘅地方取景，導演要所有人都上香拜神，祈求順利，惟獨基督徒嘅 Sammi例外，而林建岳亦大派利是，古仔攞住利是喺 Sammi耳邊講嘢， Sammi就作狀打古仔，緋聞男女完全唔避忌玩到癲。

放大圖片

古天樂、 Sammi懶理傳緋聞，兩個雞啄唔斷，身邊嘅劉浩龍（左一）插唔上嘴。

放大圖片

林建岳日前率領導演同演員出席開鏡拜神，祈求新戲拍攝順利。

同安仔冇乜好講

Sammi今次飾演喺內地居住嘅港人貨車司機，邂逅咗巨星古仔後發展一段浪漫愛情， Sammi話唔擔心傳緋聞：「我有準備一定會有呢啲傳聞，我已經將心情調校好，傳吧。」有傳因呢套戲阻住 Sammi同許志安復合， Sammi話：「都係啲報道啫。」可會同安仔傾吓派定心丸？ Sammi話：「唔使啦！冇乜好講。」古仔講到傳緋聞，佢話：「所有緋聞我都唔理 o架，最重要係專心拍好戲，呢個先係我責任。」至於阿杜之前話擔心古仔身體多過 Sammi，古仔唔認孱：「佢講笑啫，我覺得我擔心佢多啲。」咁會唔會保護 Sammi？古仔好小心咁話：「每個工作人員都會照顧到最好。」 Sammi話雖然以前去峨嵋山試過哮喘發作，但都唔擔心身體，仲笑古仔：「我覺得佢睇嚟好高大但真係好弱，我會好好保護佢。」此外，古仔早前接受有線節目訪問，坦言好恨攞影帝，佢話：「贏到影帝好似中六合彩咁，但唔係我控制到。」


Sammi已做好心理準備同古天樂傳緋聞。