傅明憲噚日同動物愛心大使謝雪心去咗將軍澳一間老人之家探訪啲公公婆婆，同行仲有幾隻貓狗大使， GiGi同心姐喺活動上又送啲毛氈、利是畀啲公公婆婆，當係提早同佢哋拜年。
放大圖片 
除了愛護動物，傅明憲噚日就去派毛氈同利是畀一班老人家。
放大圖片 
冇幾耐前，身為愛護動物協會會長嘅傅明憲先同成班委員開會，為動物謀幸福。資料圖片
斥心理變態
係人都知 GiGi係愛狗之人，佢身為香港愛護動物協會（ SPCA）會長，提到一名馬來西亞男子虐打貴婦狗單嘢佢嬲到震，仲話：「原先我唔想睇條片，但好多朋友打畀我，姚樂怡睇完喊住打嚟，大家問可唔可以做啲嘢，我先硬住頭皮睇晒條片，真係好恐怖，睇完瞓唔着，全晚個腦不停浮現隻狗俾人打，好無辜好慘，隻狗已經好乖企喺度，都仲要打佢，嗰對男女真係心理變態。」GiGi話初時以為喺香港發生， SPCA想搵齊資料再同警方聯絡，睇吓可唔可以起訴對男女罰錢坐監，後來先知原來發生喺大馬，香港 SPCA已經聯絡咗大馬 SPCA，但收到通知話暫時好多嘢未證實到，未知執行情況。至於有傳話隻貴婦狗已經喺幾年前過咗身， GiGi話：「呢個消息都未經證實，喺 facebook見到兩個人嘅相，如果冇認錯人，咁應該仲有隻西施 o架，如果啲狗未死，真係好想救佢哋出嚟。」 GiGi話遺棄動物已經好差，虐狗比遺棄動物更離譜，佢話：「唔鍾意咪唔好養囉，做乜要虐待佢？」講到農曆年嘅工作，心姐話佢會同阿女珈穎喺紐約登台，跟住又會同羅家英、汪阿姐合作做粵劇，但心姐話佢點忙都會抽時間做探訪活動。 
傅明憲同心姐都係愛狗之人，知道有人虐狗，自然嬲到震。
全站熱搜
留言列表
