農夫邊吃着鳳凰翅膀，邊七嘴八舌地跟我硬銷他們為now主持的新遊戲節目《撳錢》。「估唔到香港有咁認真製作的節目……」C君如是說。「真係好認真，我成日都想返去綵排……」陸永這樣地補充。

然後，他們邊喫着花茶，邊輕描淡寫地說着關於他們自己的。「結婚？我兩、三歲時已經同同學講要娶佢o架啦……」C君又如是說。「感情狀況？拍吓拖咁囉……」陸永又這樣地補充。

驟耳聽來似乎有點hea，彷彿在說着別人的事，不痛不癢，但實情，他們不過是把人生看得透罷了，要不然，以他們廿多歲的年紀，一定不會懂得rap出人生的種種無奈（〈粒粒皆辛苦〉）、諷刺股票熱潮（〈全民皆估〉）或是以小朋友的眼界來看大人（〈問題兒童〉），以大人的經歷來教小朋友（〈偉大道航〉），甚至乎把他們近日沉迷玩的「芒亨」，都用來作了首點擊率極高的〈獵人之歌〉。

能夠以rapper身份，由獨立組合變成為大眾接受，做廣告代言、電影客串和節目主持，甚至出書搞棟篤笑，在他們的成長歷程中其實不乏辛酸，關鍵只在於用甚麼心態來對待，畢竟，the show must go on。

關於C君

C君，原名鄭詩君。早前他在紐西蘭借助方大同、楊千嬅、謝安琪、王菀之等人拍的片段，以他所形容的「明星效應」成功向女友求婚，宣布於下年拉埋天窗。「我跟千嬅講過想向女友求婚，她說，做娛樂圈諗到就要去做，因為你唔會知幾時先會得閒，所以佢同丁子高就係咁註咗冊，咁我先立下心腸求婚囉。」

拍拖六年，離離合合，期間，C君曾跟林珊珊女兒西瓜來往過。「咁樣六年，最後都係一齊，大家都覺得走唔甩，係佢o架啦！西瓜都知呢件事，但唔會叫佢嚟飲囉，我自己都唔好意思喇係咪？唔係咁好囉！」

問他為何有結婚打算，他說：「我相信婚姻，鍾意成家立室，鍾意安定，因為我屋企是單親家庭，自己出身的家庭不好，咪自己創造一個美好家庭囉。」

他是獨子，自小與父親相依為命，因為出世時患有地中海貧血症，很易疲倦，加上每星期要到醫院打除鐵針和輸血，小時候很少外出跟其他小朋友玩。「我細個好鍾意寂寞，最好冇人喺我身邊，冇乜朋友，一個人睇書，寫打油詩，中學時會無端端寫啲rap咁囉。

「其實我個病，到小學時期已經有除鐵藥可以代替打針，人愈大身體機能又好咗，我到依家都需要每日食除鐵藥，每個月到醫院body check，基本上冇乜大問題，唔係乜病，應付到所有工作。」

因為千嬅的提議，C君決定跟女友拉埋天窗，不過結婚念頭卻沒有影響到陸永。

C君自小與父親相依為命，加上地中海貧血症，過了一個不一樣的童年。

關於陸永

陸永，原名陸永權。據他形容，現時感情是「OK甜蜜」，但卻沒有受C君影響，有結婚念頭。「結婚咁大件事，會受人影響嘅咩？我唔覺得呢個係人生必要做的issue，但我絕對唔會抗拒。我亦沒有想過要有下一代，不過估計都會有，因為我太鍾意小朋友！」

那麼前女友唐寧去年跟舞台劇才子鄧偉傑結婚，以及正懷有身孕，又可有留意？「係囉，大咗肚喎，我都係睇雜誌先知。我知佢結婚，但冇同佢聯絡，都係最近佢send嘢畀我，我先有番佢電話號碼，我咪send句嘢恭喜佢咁囉。」

他跟C君一樣，同樣是獨生子，小時候經常自己同自己玩。「咪畫畫、畫畫，唔知諗乜嘢，然後又畫畫畫畫咁囉。」到中學時代，因為參加課外活動而認識了低他兩年級的C君，大家愛band sound、愛戲劇，志趣相投，自此便朝見口晚見面。「到我畢業後，我們的關係已經不止是同學，我哋沒有各行各路，他讀ive，我讀演藝，都仲一齊玩音樂、做音樂，但沒有想過會成為職業。」

兩人畢業後，C君在傳媒做全職copywriter，陸永則以兼職教小朋友戲劇維生，仍然繼續hip hop，繼續rap，繼續創作他們的音樂，不過卻長期糧尾。「我同C君最窮嗰陣，試過戶口得兩個位數字，要佢過埋畀我，先籌到一百蚊撳機攞到出嚟用！」

同樣是獨生子的陸永，小時候父母總會抽空帶他四圍去。

關於獨立

2000年他們組成了農夫，02年被DJ Tommy睇中，簽約為他們的經理人，那時組合成員還有女主音聶碧芝，以及DJ Galaxy，曾推出過首張唱片《月下思》。「Tommy是LMF其中一位成員，對我們來說，LMF是神，有位咁嘅經理人招手，當然要簽畀佢啦！」陸永說。「至於那張《月下思》，應該冇乜人知，因為完全冇宣傳，我哋當時只是純粹志在玩音樂，有人肯幫我哋出碟，又不用自己錢，點解唔出？」C君又解釋。

其後，他們再以獨立組合的身份，推出過兩張唱片，反應不錯，但成員則只剩下C君和陸永，兩人見音樂工作漸多，便決定辭掉本身工作，全職投身做音樂。

至○七年，DJ Tommy把農夫簽給他與陳冠希拍檔的CMD。誰料，他們才簽約沒多久，便發生了慾照事件。

「沒想過因為這樣，我們突然要面對很多記者！知名度、見報率當堂激增！」陸永表情浮誇地說，C君在旁插嘴：「那一、兩個月的確訓練了我哋好多嘢！亦令我哋急速成長，令我哋變成入咗娛樂圈囉！」

那麼獨立身份好玩，還是入了娛樂圈較好玩？C君說：「依家最好玩！入咗娛樂圈，但我哋心態卻是很獨立，自由度比很多藝人高啲。」

當年跟麥玲玲合作唱〈風生水起〉，結果農夫便一直風生水起。

農夫與經理人DJ Tommy（右二），去年年底離開Edison的CMD，陸永說，只因彼此音樂路線有別而已。

關於堅持

去年年尾，農夫跟了Tommy離開CMD另起爐灶。有說Tommy跟Edison反目，有說農夫不滿在CMD掣肘多。

C君和陸永沒好氣地你一言我一語解釋：「冇o架，呢個圈好難會同人反目嘅喎！除非你好勁，或者諗住唔做啫。」「掣肘？完全冇喎，全部嘢都畀我哋好多話事權，甚至要我哋話事！」「之前就跟Tommy講，Tommy再同Edison講……」「或者係同Edison講，Edison再同Tommy講咁囉。」「相比之下，依家只需要問Tommy，啲決策當然快好多啦！」

外界都認為，農夫是由Edison一手捧紅，而且跟他的關係非常close。「關係？正常囉！可以叫做朋友囉，都會有聯絡，例如聖誕節，佢都會打電話畀我哋，送吓禮物咁囉。我結婚擺酒，都會請埋佢飲。」C君說。

沒有擔心過，離開CMD後，對之後發展有影響嗎？陸永說：「我們從來都不是需要一個很強大的back up或資金來做我們的事。依家幾好呀，公司人不算多，但齊腳，大家都為公司好，感覺好熱血，唔使夾硬畀一百個人我哋o架！所謂的演藝生涯，全部都是靠自己，只係睇你肯唔肯努力做好，唔會離開咗邊度就冇咗囉！」

這就是農夫的工作睇法。