哈囉喂百鬼出籠，想喺派對出位，唔止化妝飾物考心思，再揸架暗黑蓮花壓場， 218匹引擎咆哮，加若隱若現嘅碳纖拉花、高鼓頭燈及玲瓏身段，未落車已引來靚女尖叫，再拋胸挑逗呢！記者：徐影龍攝影：譚盈傑 Model： Betrys@GME ModelsHair： Green、阿 Ming@CHIN.G
其他副刊影片 你當我是浮誇吧
Lotus賣相一向浮誇，毋須去到 Evora、 Exige級數，平平哋五六十萬嘅 Elise足以夠照。 Lotus未來將會大轉款，變得又橫又方，似足林寶堅尼，而呢款 Elise SC仍有 Lotus家族式誇張曲線身段，一對頭燈拔地而起，玲瓏浮凸得令人血脈賁張。亮黑車身配暗啞仿碳纖拉花，由車頭一直延伸到車尾，兇狠霸氣若隱若現，充滿神秘感。加埋超低矮車身，以及黑夜中怒目而視嘅尖長頭燈，有如遇着豐滿小魔女般，心甘情願死喺佢手上。不論去任何飯局或哈囉喂派對，相信甫駛入會場、未踏出車門，女嘅見到肯定會有少少鍾意咗你，男嘅就嫉妒得有少少想「舂」你。幾十萬車價換嚟百分百收視，未計性能表現已值回票價啦！
放大圖片 
■雖只得兩個位，但勝在唔開篷都相當闊落。
放大圖片 
■車身玲瓏浮凸得如豐滿小魔女，男人見到肯定三魂唔見咗七魄。
放大圖片 
■內櫳佈局偏向簡約，真皮及金屬配襯互相輝映。
放大圖片 
■ LED尾燈光猛奪目，美得如魔咒般，令目光不願離開。
拍住林寶拉利咁快
除最新最豪嘅 Evora，過往 Lotus一向玩簡約，早幾年更精簡到連冷氣都無，揸得蓮花預咗辛苦。幸好呢架 Elise SC都有冷氣、音響、一按撻車，甚至連杯架都有，揸起來已算舒服，且鍾情蓮花嘅，一定愛死副 218匹豐田 2ZZ-GE引擎，加上 Supercharged機械增壓，推動僅重 870kg嘅輕車身，你可以想像到加速力有幾驚人， 0-100km/h只需 4.6秒，比林寶 LP560-4及拉利 F360等只相差約半秒，幾十萬追貼幾百萬性能表現，內櫳簡約啲都無所謂啦！最正係操控夠 Raw夠 Pure，不設 LSD、 TRC等電子輔助系統，六速棍波拍上拍落，拖波補油全部靠自己，嗰種直接反映車手技術嘅機械感，喺現今車壇已經買少見少。
南瓜 Lotus 一樣應節 放大圖片 
嫌黑色太神秘，同場仲有架開開心心、似足南瓜車嘅二手橙色 Elise SC，同樣招搖搶眼，更有齊泊車鏡頭同手動軟篷， 08年車行咗約 2萬公里，代理包 1年保用，叫價$499,000。
Lotus Elise SC 放大圖片 
引擎： 1,796cc直四馬力： 218PS/8,000rpm扭力： 211.8Nm/5,000rpm傳動： 6速手動波箱售價：$561,000起查詢： 2877 0810（ Richburg Lotus） 
留言列表
