電影《危險關係》未開拍，已經為爭戲份鬥片酬鬧不和的章子怡、張栢芝，火併再度升級！有指不滿栢芝坐正做第一女主角的章子怡，經多番拉鋸要求導演許秦豪改劇本加戲份不果，早前曾罷拍一星期；直至今個月十九日才歸隊，但她竟帶同私人編劇同行與導演講數，但導演卻堅持要忠於原著。章子怡拍了一晚戲，又再玩失踪，令導演許秦豪十分不滿，隨時一拍兩散。

頻頻NG
十年前合作徐克《蜀山傳》，栢芝因為幫鄭伊健出頭，一度與章子怡結怨。近日兩人再度碰頭，接拍電影《危險關係》，擔任第二女主角的章子怡，因不滿張栢芝坐正，不單缺席新片開鏡，原本要在今個月十二日歸隊開工的她，竟然整整一星期唔見影，罷工失場！
上週三（十月十九日）晚，終於蒲頭返劇組的章子怡，與男主角張東健，到位於車墩的影城開工，晚上十時拍到凌晨二時，二人拍攝一場拖手奔跑戲，NG十次有多，每逢工作人員打燈換景，章子怡便第一時間返上私人休息車，做獨孤村，未有與導演及工作人員講多句。

多多要求
現場一位劇組工作人員，更憤憤不平爆章子怡打亂拍攝期，罷拍了一星期。「本來章子怡答應今個月十二號入組，景都搭好晒等佢，張東健亦埋晒位，但佢一路無出現，成個劇組要停晒工，損失幾大？唔講大家都心裡有數啦！導演已經嬲到震！」自恃係國際巨星，章子怡要求開工要有齊雪櫃，化妝枱的豪華休息車，又要有四個助手跟身，派場十足。「佢有乜要求，電影公司已經全部滿足佢，其實栢芝合約都訂明可以要求豪華休息車，但栢芝覺得無咁嘅需要，佢話寧願留喺現場，同工作人員傾偈仲好，亦無話要有幾個助手！」工作人員說。

導演攤牌
十九日當晚，栢芝凌晨二時通告，並未有與章子怡同場，她提早十一時已經抵達片場準備，與工作人員閒談打發時間，相比章子怡的不可一世，兩種態度。同栢芝唔妥，章子怡亦毫不掩飾。上月二十六日新片記者會，記者追問章子怡為何接演第二女主角角色，她一度黑面，其後，便傳出章子怡不斷與導演交涉，要求改劇本加戲份。「佢（章子怡）係都要導演改劇本，但導演覺得要跟原著情節唔可以改，套戲開咗半個月，章子怡就不停糾纏，小動作多多。導演忍無可忍，同佢攤牌，講明劇本無得再改，佢一係拍，一係唔拍，如果佢決定唔拍，電影公司就會公開成件事，叫佢自己衡量，咁佢先死死氣肯返嚟！」知情者說。

講唔掂數
雖然章子怡十九號返抵上海開工，但她仍對加戲份一事咬住唔放。據了解，當日她帶同一名私人編劇返劇組，搵導演講數。「佢帶咗個私人編劇嚟，叫導演一齊研究吓點樣可以修改個劇本，唔只搞到導演火都嚟埋，電影本身個編劇提起章子怡就㷫。不過，導演點都唔就範，章子怡拍咗一晚戲，就同導演再請假，話要去『金雞獎』，但最終又唔見佢蒲頭，依家仲未肯返劇組！」一名工作人員說。

自己攞嚟
事實上，決定完成多年心願，開拍《危險關係》的導演，最初是屬意張曼玉加章子怡。「栢芝而家個女主角角色，許秦豪原本係搵張曼玉，但Maggie同過章子怡合作《英雄》，印象好麻麻，所以最後辭演，導演於是考慮搵章子怡或者栢芝做女主角，但章子怡又擔心呢個壞女人角色會破壞形象，遲豫不決，但栢芝經理人好快就同栢芝商量好，決定接！」
離婚、同霆鋒分產爭仔如此複雜問題，栢芝都以快打慢搞掂，更三扒兩撥以天價簽約新亞洲娛樂，染指幕前幕後兼做埋揸弗人，做壞女人，未驚過！
機會，手快有！章子怡三心兩意，自己攞嚟！

十年恩怨
張栢芝同章子怡的牙齒印，早在十年前已經種下。○○年跳出「謀」女郎行列，憑《臥虎藏龍》上位的章子怡，被大導徐克點名客串新戲《蜀山傳》。首日開工，章子怡發現在劇組巴士上休息的男主角鄭伊健，用了她的枕頭睡覺，章子怡於是破口大罵伊健，目睹整個過程的張栢芝，挺身代出頭：「罵人就是不對！」自此兩人互當透明，亦拒絕同場現身。直到○五年尾，兩人於海南島的廣告頒獎禮再次碰頭，為了還以顏色，據知二人不約而同向相熟記者通報「死敵」房間號碼，經此一役，雙方仇恨加倍升級。

遲 嚟 先 上 岸
電影《危險關係》改編自法國作家Pierre Choderlos de Laclos於1782年發表的著名小說《Les Liaisons Dangereuses》。此書被荷李活於88年及99年改編成電影《孽戀焚情》及《誘惑性遊戲》，而韓國的裴勇俊亦於03年接拍由此書改編而成的電影《挑情寶鑑》。
有別美、韓版本，由韓片《八月照相館》導演許秦豪執導的《危》片，將故事集中於張東健同張栢芝一對青梅竹馬的好友身上。故事講述「雙張」失散多年於上海重遇，栢芝飾演的莫婕妤已成為女大亨，而張東健飾演的謝易梵亦變成花花公子。栢芝一方面打賭要張東健把章子怡飾演的杜芬玉追到手，另一邊廂卻安排少女勾引張東健，攻心計搞破壞。
電影籌拍初期，女主角本屬意影后級的張曼玉，章子怡才肯「屈就」做配角，之後張曼玉辭演，電影公司曾提議章子怡接手做女主角，但她因為角色太負面，遲遲未肯表態，卒之被張栢芝攝位坐正。 ####


原本凌晨二點通告的栢芝，提早三小時到片場等候，仍笑容滿面，心情大靚。


19/10為進一步說服導演加戲，章子怡帶埋私人編劇到上海，與導演講數。


上月26日，章子怡與張栢芝出席《危險關係》記者會，被問及接演第二女主角，章子怡即時黑面，氣氛尷尬。（《蘋果日報》圖片）


在劇組等章子怡成個星期的張東健，19日晚，二人拍攝一場奔跑戲，拍了超過十多take。


章子怡（箭嘴）每行一步，都有四個助手跟身，其中一個更專為她挽鞋。


每次換景，章子怡即第一時間返上私人坐駕休息。


力壓章子怡坐正第一女主角的張栢芝，連睇playback都表現風騷，與工作人員說個不停。


準備收工的章子怡，企多陣都唔願，要坐在人力車上等車接走。


未有自己戲份，栢芝則坐在片場一間大房等候，又不時行出行入，與工作人員聊天。


23/10本週日，栢芝與張東健早上六時便出發，坐個半小時車到濱江森林公園拍外景，拍攝一場打golf戲，拍足十二小時。


放食飯期間，栢芝攞出iPhone對鏡自拍，拍了幾個角度，才找到滿意效果。


在濱江森林公園外，有唔少工作人員把守入口，阻截居民行近外景隊。


章子怡本答應十二日歸隊拍攝，而未有戲份的栢芝，則趁空檔與兩個兒子到泰國玩。（《Face》圖片）


張曼玉辭演，造就栢芝成為第一女主角，令配角章子怡極之不滿。（《蘋果日報》圖片）


（《蘋果日報》圖片）


（《忽然1周》圖片）


電影開鏡，章子怡突然甩底，剩低栢芝與張東健撐場。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄