雖然近排挖角潮搞到無綫陣腳大亂，但係都冇理由唔顧及吓觀眾嘅感受，將電視劇啲橋用完又用，仲要用喺同一個演員身上，會唔會離譜咗啲呀？
最近，喺網上嘅一個討論區，就見到有網友熱烈討論緊石修喺台慶劇《荃加福祿壽探案》嘅演出，喺劇中石修只係講咗：「一滴、兩滴、三滴。」跟住就將一個精神失常嘅人催眠咗。
呢樣嘢都未夠神奇，最不可思議嘅係，石修用同樣嘅手法喺○四年播出嘅《隔世追兇》，都做過一次，兼且對白一模一樣，石修又係講：「一滴、兩滴、三滴。」究竟係無綫啲編劇技窮，定係石修真係識催眠呢？
○四年，石修喺劇集《隔世追兇》中，被匪徒用槍指住個頭嘅時候，佢同個匪徒講：「你睇吓地下，一滴、兩滴、三滴。」藉此催眠匪徒，而被催眠咗嘅匪徒反過來對付同伴。
事隔七年之後，石修嘅催眠術重現人間，最近喺台慶劇《荃加福祿壽探案》，石修用番同一種催眠手法，又係講：「你睇吓地下，一滴、兩滴、三滴。」跟住就催眠咗一個精神失常嘅人。
一滴血催眠重犯
《荃加福祿壽探案》鼻涕催眠
全站熱搜
留言列表
