15/10黎姿由助手陪同下現身銅鑼灣，穿上碎花短裙露出已消腫雙腿，但腰位下身圓潤。"
娛頭
再生唔收身 限制探 B 父母冇情講 黎姿封閉一年保細孖
2010年10月21日
三十九歲的黎姿，去年下嫁富商馬廷強後專心「造人」，終在今年七月，打孖上誕下一對孖女。
初為人母，黎姿視一對女兒為金笸籮，由於孖女出世時體重懸殊，僅得三磅的細孖瞓足一個月氧氣箱後，體質及抵抗力依然較弱，為怕受細菌感染，黎姿廿四小時高度戒備，唔帶大細孖外出，更謝絕外人探訪，甚至連自己父母都冇情講，想探望外孫女，要分批限人數輪候上門。
此外，黎姿自知屬高齡產婦，孖女得來不易，深感是上帝送她的禮物，為了感恩，她決定於下月的感恩節（十一月二十五日），閉門為孖女舉行「嬰孩奉獻禮」，培育兩女做基督徒。
探 B限人數
黎姿懷孕，高峰期重一八○磅，孖女在母體內搶營養，爭輸了的細孖出世時嚴重唔夠秤，要留在醫院瞓氧氣箱，幫助呼吸，母女被迫分隔個多月，令初為人母的黎姿相當忐忑，為讓細孖盡快回復正常體重，更吩咐工人日日速遞人奶到醫院。
出院後，瘦弱的細孖仍只有五磅多，與重八磅的大孖仍差一大截；初生嬰兒抵抗力差，加上細孖體質較弱，黎姿為怕愛女受細菌感染，一直將孖女隔離於家中，連親戚家人想見孖女一面，亦要過關斬將。
「細孖唔足磅，身體適應力同抗菌能力都會比較弱，所以 Gigi都好小心，到而家都未帶過佢哋出街，就算打預防疫苗，都係醫生上門；有啲朋友想話探吓對孖女，佢都拒絕，話等佢哋大啲先。就算自己老豆老母，至親屋企人， Gigi都唔俾佢哋一次過上晒去，每次最多兩、三個，分批去輪住探，佢話人多細菌多，要小心啲。」
熟手湊 B
黎姿曾於網上上載湊 B相，相中的她掃風手勢相當純熟。
孖女出院後，雖然一直留在家中，但黎姿早已在坐駕上貼上「 Baby in the Car」的標誌，相當細心。
為保細孖健康，黎姿作出一連串抗菌措施，連一向感情要好的父母都冇面俾，要分批輪候才能上門見外孫女。
誕下孖女後一星期，黎姿由十名保鏢及護士護航出院，產後首次露面的她神采飛揚，笑容滿面。
早前，黎姿陪老公馬廷強到中環四季酒店開餐，其間與友人滔滔不絕，未收身的她穿上大大件乾濕褸遮掩脹爆身形。
一日消毒三次
為一對孖女健康着想，黎姿變身緊張大師，除了嚴格挑選 BB日用品外，更吩咐工人每日早、午、晚全屋徹底消毒三次。更有指她為了令人奶保持新鮮，專程從德國訂購一個母乳雪櫃到港。
寶貝女大過天，一切以一對孖女為優先的黎姿，不惜放棄收身計劃，谷行奶水親自餵哺，不過，據了解，產後的她雖然維持升 cup，但仍然唔夠奶量，餵飽大食 BB。
「佢已經聽足老人家吩咐，又飲魚湯谷多啲奶，但都係唔夠，所以而家都係要一餐人奶，一餐奶粉咁餵。」
醫生指示戒嚴
家庭醫生關嘉美表示，唔足磅的嬰兒須留在醫院瞓氧氣箱，直至醫生認為情況穩定， BB到達正常磅數才可出院。
關醫生稱，唔足磅的 BB並不等於不健康，只是體質較弱，易受細菌感染，所以父母照顧時要特別小心， BB應盡量留在家中，盡量不要接觸太多人，更不適合擺滿月酒。居住環境更要長期保持乾淨， BB用的床單、被鋪要日日清洗，奶樽要烚至水滾後半個鐘才用，接觸 BB前都要洗手。
此外，家中不適宜鋪地氈，更不要將毛公仔放在 BB旁邊。父母出街時最好戴上口罩，回家後要沖涼、換衫後才可接觸 BB，這些預防措施最少要維持半年，甚至一年，直至 BB有足夠抵抗力為止。
感恩節出關
信主的黎姿，十分感恩上帝送她的這份禮物，她已決定等到孖女足三個月後，下月感恩節出關，到教會參加「嬰孩奉獻禮」。但為免孖女曝光，黎姿已向教會提出特別申請，要求儀式閉門進行，除了親戚、朋友外，不招呼其他教友。
「 Gigi覺得自己年紀唔細，可以佗到 BB，係上帝聽到佢禱告，送俾佢嘅禮物，所以佢好感恩，要將 BB奉獻俾上帝，希望兩個女由細個開始，就接觸基督教，不過佢都係盡咗做媽咪嘅本分，兩個女將來信唔信，就由佢哋自己決定。」黎姿身邊密友說。
除了奉獻禮閉門進行，身為教徒的黎姿，以往逢星期日都親身前往教會出席主日崇拜，但黎姿明知自己是傳媒目標，為免引來其他教眾不便，最近便得到教會特准，安排牧師每月上門，進行查經講道。
8/10一坐完月，黎姿即堅持隔日返公司打點生意，每次約逗留兩小時，一發現有記者，即從後門離開。
細佬黎嬰自車禍重傷後，皮膚護理中心生意一直由黎姿接管，她更一直堅持待細佬康復後將生意全盤交還。
為怕自己感染病菌傳染孖女，黎姿每次外出，大部分時間都戴上口罩，以防萬一。
奉獻禮不等於洗禮
「嬰孩奉獻禮」即表示父母願意將自己的孩子獻給上帝，由於相信兒女是神所賜的產業，所以會用神的道作為教導兒女的基礎原則。
奉獻禮不等於洗禮，參加奉獻禮的孩童由初生至 12歲不等，不同的教會有不同準則，儀式由牧師主持，已信主的父母將兒女帶到教會，在神和眾人的面前立志，盡心在基督的真道中，以聖經的真理引導兒女成長，讓孩子接受基督的教導，認識主。孩童會進行灌水禮，由主理牧師在孩子頭部滴水。
一於再生
嫁人後疊埋心水做賢妻良母，全力為馬家開枝散葉的黎姿雖然生孖胎，但她亦未打算收工，更從不考慮收身，反而跟足營養餐單，繼續養好身體，追得就追。
「佢冇諗過收身，餵人奶嘅媽咪本身要有均衡營養，唔可以節食，佢啱啱生完嗰陣，本來都諗住抖下先，因為佗孖女嗰陣成日嘔，佢老公唔想佢咁辛苦；但唔夠兩個月，佢已經 ready好再生，成日話望住兩個女就咩辛苦都唔記得晒，仲話生幾多個都冇問題。」
手腳瘦番晒
忙住湊女，但黎姿仍冇忽略細佬黎嬰的皮膚護理中心生意，一坐完月，就堅持隔日返公司，落手落腳到實。
不過，黎姿亦遵從醫生意見，由於家有兩 B，加上細孖要陪護起碼一年，即使她隔日外出返皮膚護理中心，但每次外出，都一定戴上口罩。
上週五，穿上條碎花連身短裙的黎姿由助手陪同返工，產後兩個多月，由於無刻意收身，腰腹位依然脹爆，雖然手腳已經無產前般腫脹，但上圍 cup數則維持高水。
精神飽滿的黎姿，當日在公司逗留了約兩小時，便匆匆趕回家。
產後的黎姿不時到名店 shopping掃貨，每次出巡都由多名保鏢護駕，相當大陣仗。（《忽然 1周》圖片）
黎嬰車禍後，康復進度出奇理想，黎姿曾表示是神蹟，因此帶埋細佬齊齊返教會崇拜。（《 Face》圖片）
身為教徒的黎姿，以往每逢星期日都會親身到位於紅磡的山福堂出席主日崇拜，但近日已獲教會特准，派牧師上門為她講道。（《 Face》圖片）
緊張媽咪
十月懷胎，母親緊張子女在所難免，尤其是圈中人，生活顛倒，普遍遲生，骨肉得來不易，令圈中一班媽咪格外緊張！
羅美薇
一向注重清潔的羅美薇，生完女兒後緊張情況有增無減，試過被拍得在 gym房做完 gym後，為怕將外界的細菌帶返家中，她隨身攜帶一大支消毒噴霧，噴完又捽，十分認真。
袁詠儀
袁詠儀試過因兒子「魔童」有同學在學校打噴嚏無用手掩住口，為怕兒子感染流感，她緊張到打電話向學校投訴。
徐子淇
「千億新抱」徐子淇，雖然後生大把機會生完再生，但去年大女晞彤入院，她仍為女兒許願，甚至戒吃最愛的牛肉，更表示為了女兒長期吃素都得。
撰文、攝影：娛樂組
留言列表
