明星靚相大分享☆

無綫節目《荃加福祿壽》由電視搬上舞台，終於可以實現喇。喺 12月 4號同 5號，汪明荃（阿姐）、阮兆祥、王祖藍同李思捷會喺灣仔會展搞個「荃加福祿壽宇宙最長演唱會」，噚日佢哋就喺將軍澳電視廣播城開記者會。記者會場地搞到好似星球大戰咁，三個扮嘢王以黑白灰軍裝出場，再介紹大紅花頭夾紅色格仔褲嘅阿姐登場，真係有別於無綫一般記者會，原來今次個演唱會監製係早前被扣查後獲撤銷保釋嘅錢國偉（ Wilson），唔怪得咁多花臣啦！

放大圖片

錢國偉以兼職形式為無綫製作節目，人工比以前仲好好多。

放大圖片

以前都係迷雲黨嘅崔建邦同錢國偉（左），如今喺電視城有緣再聚。

錢國偉自由身好搵 放大圖片

福祿壽着上灰白黑嘅軍裝，扮星球大戰軍官。

離開無綫後， Wilson第一次以兼職身份幫無綫搞騷，佢話無綫冇叫佢回巢，自己又冇諗過返無綫，佢話：「我都係想自由身出去博一博，不過之後都會 freelance接無綫嘢做，會拍邵氏有份投資嘅電影。」出面人工高，收入好，難怪 Wilson無心回流，笑住話自己跑嚟跑去人工梗會高少少。出年多幾個免費電視頻道，有消息話有公司高薪挖角， Wilson都覺得開心：「我都戥好多同事開心，大家身價都高咗，辛苦都有價值。」

福祿壽盼有 Part II

今次 Wilson搞福祿壽音樂會，一定絞盡腦汁為自己打響劫後頭炮，祥仔話橋已經有，除咗福祿壽嘅經典扮相，仲會加新嘢，佢話：「有四個嘉賓已經應承咗會嚟，到時我哋都會扮佢哋。」佢哋更表明絕對唔會加場，祖藍話：「冇得加，太爆喇，之前搵個場都搵咗好耐，先搵到星期六日，我哋觀眾都係家庭客，如果好反應，希望可以有 Part II啦。」


阿姐嘅至潮打扮，加上風騷甫士，令她睇上去更青春。