等咗咁多年，36歲「剩女」楊千嬅終於嫁得出。結婚一生人一次，當然要搞大，今次千嬅同老公丁子高婚宴分兩場擺，頭場於本週一（20日）在君悅酒店筵開48圍招呼摯親好友；24日平安夜才與好友狂歡。
據稱千嬅今次豪擲過百萬擺酒，好彩今次婚宴有唔少贊助商揼錢幫補，最重要係嫁到好老公，走進人生美好階段，難怪千嬅當住傳媒面前，狂讚老公係「好好嘅PR」：「未識佢之前，我唔覺得自己會結婚，識到佢之後，最大得着係搵番自己。」千嬅真係賺凸喎！


36歲有「樂壇烈女」之稱的楊千嬅，去年8月與31歲靚仔公關丁子高在賭城註冊結婚，之後千嬅曾公開講過：「有人肯娶我，就係一個dream。」不過千嬅認為要在港擺酒才算明媒正娶，等足1年有多，本週一終於同丁子高在君悅酒店擺喜酒，正式成為丁師奶。

做足禮儀
香港擺酒，傳統禮儀當然做到足，週一早上，穿上中國袴的老公仔丁子高已從其男家陽明山莊，出發到君悅酒店迎接穿上傳統裙褂的楊千嬅，其間畀開門利是、姊妹玩新郎及新郎新娘一齊斟茶畀男家老爺奶奶等習俗全部做齊。

狂讚老公
擺酒儀式要到晚上才正式舉行，但因所有傳媒禁止採訪婚宴儀式，所以丁生丁太兩公婆特登安排當天下午4時舉行的切餅祝酒儀式，讓傳媒直擊2人的恩愛騷。
雖然儀式只進行唔夠10分鐘，但當千嬅發表愛的宣言時亦多次hard sell老公：「我覺得好似去咗IPS（丁子高所屬公關公司）騷咁，佢（丁子高）真係一個好好嘅PR。」臨尾接受傳媒訪問時，丁太更加多幾錢肉緊：「以前我唔會覺得自己會結婚，識到佢之後最大得着係搵番自己，了解自己多咗。」最後仲感動到喊。

黎明冇到
晚上婚宴舉行，唔少賓客陸續到場，曾有傳千嬅有發請柬畀黎明，但當晚黎天王竟然出現劉華演唱會做嘉賓，都唔去飲！
有稱今次千嬅揼過百萬搞婚禮，而所有到場親友亦收到一份包含他們到巴黎拍攝的相冊及禮餅全盒為回禮紀念品，非常重皮，但據知該婚禮收到如奇華禮餅及周大福珠寶等贊助，幫補不少。
最值得開心係千嬅嫁到個細心又體貼嘅老公，唔使做剩女，飲得杯落啦！

玩中式拜堂


週一下午4點，舉行切蛋糕會傳媒時，緊握老公丁子高嘅千嬅，一上台已笑到四萬咁口，一睇就知佢哋好開心。


搭住咀
應傳媒要求，千嬅唔使諗，搶先用手搭住老公，仲當眾咀落老公度，鬼咁肉緊。


晒婚戒
恩愛之作，千嬅亦不忘向觀眾記者晒老公所送價值76萬嘅「PIAGET」18K白金，鑲上166粒圓形美鑽嘅結婚戒指，幸福到痺。


講錯說話
切蛋糕儀式進行期間，千嬅件婚紗唔小心掂到蛋糕，一時口快話：「死啦！死啦！」要擔任司儀嘅商台DJ Vani解圍話：「口水講過！」


其間企定影相時，千嬅條裙被丁子高踩住，即大叫：「你踩住我條裙呀！」搞到老公好尷尬。


賭王女陪嫁
今次千嬅請來12位姊妹陪嫁，一向同千嬅係酒腳，又教千嬅買樓投資嘅賭王二房千金何超蕸（箭嘴），自然係姊妹之一啦！


哭讚老公
儀式完畢，千嬅接受傳媒圍訪時，一講起老公令佢搵番自己，即喊到收唔到聲。


接新娘唔少得玩新郎，千嬅即場定下十大家規要求老公就範，好大女人喎！


向親戚敬茶時，2人一齊跪低，好有禮。而多次於電視演大妗姐嘅陳鳳冰更做埋大妗姐，相信收唔少利是。


要迎娶千嬅，丁子高畀咗$23,999開門利是先過到姊妹嗰關。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄