余文樂圈中好友除了沈嘉偉同郭富城，還有曾經是同門兼波友的周柏豪。過檔東亞後，余文樂電影密密拍之際，助手忽然「劈炮」，公務、私事無人理，撞啱周柏豪想幫胞弟周柏文在事業上謀出路，於是介紹細佬做余文樂貼身助手，月薪一萬，比起一般助手八千蚊的起薪點，余老闆，算闊綽。

阿哥話事
周柏豪胞弟周柏文，在髮型屋從事初級髮型師工作已有一段時間，眼見細佬表現唔算標青，距離晉升師傅級尚有一段距離，令身為阿哥的他，對細佬前途問題相當擔心。「柏豪同細佬感情好好，見細佬份工無乜前途，又搵得唔多，成日想幫佢喺娛樂圈搵份工，自己又可以睇實細佬，兩兄弟有個照應。」周柏豪的友人透露。
而另一邊廂，跟隨余文樂多年的助手，因私人理由辭職，公事私務突然無人處理，余文樂於是四圍放聲氣請人，周柏豪收到風後，便向老友推介細佬做助手。「其實喺街外要搵個人做助手，一啲都唔難，之不過阿樂份人慢熱，又怕外人手腳唔乾淨，搵極都搵唔啱心水，既然柏豪開到口，阿樂同細佬都叫做識，所以好爽快就請咗柏文。」余文樂的友人透露。

高於市價
明星助手工作看似簡單，但除了照顧藝人日常工作，就連交電話費等私人事務都要負責，名副其實貼身「大丫環」。一般助手初入行，底薪只有八千元，但余文樂跟周柏豪因有多年交情，令周柏文的入行價，能夠高見一萬元。
早前余文樂出席雜誌頒獎禮，由歌手細佬變成明星助手的周柏文，抵步後率先落車為老闆打點一切，同主辦單位了解頒獎流程才安排余文樂落車。見老闆上台攞獎，柏文會主動為他拍照留念，話頭醒尾。活動完結後，余文樂在門外煲煙，柏文等老細食完煙之後，便遞上西裝褸讓他穿上，然後一同前往開餐。兩主僕關係雖然啱啱開始，但余文樂相當照顧細佬，早前柏文生日，余文樂仲買定蛋糕同佢慶祝。


有助手分擔事務，余文樂可以更專心工作，轉會東亞後的他，一口氣拍下公司的《志明與春嬌》、《精武風雲•陳真》同《劍雨》，加埋同江若琳合作的《童眼》，已完成四部電影。另外更準備重返樂壇，有傳余文樂新碟會效法死敵陳冠希唱rap歌，同宿敵爭飯食。


打扮同髮型跟阿哥周柏豪有幾分相似的周柏文，早前陪同新老闆余文樂出席雜誌頒獎禮，一萬蚊人工，公務私務都要跟到足。



余文樂同周柏豪以前同屬一間經理人公司，兩人因同樣愛打籃球而成為好友。


做助手，要貼身照顧藝人無假放，但本月初余文樂為新碟飛到台灣作準備，周柏豪胞弟無須同行，可以休息吓！


雖然兩主僕相處日子尚短，但余文樂相當照顧周柏文，更為他慶祝生日。


出席完頒獎禮，余文樂在保母車旁邊同司機煲煙吹水，臨上車前，周柏文即遞西裝褸俾老細，照顧周到。



余文樂同邱淑貞老公沈嘉偉、郭富城份屬好友，早前他為「橫洲工業」落場打職業籃球賽，沈生沈太和城城一起到場為他打氣。


唔做髮型師，周柏文轉職做余文樂助手，收工到北角食飯都一齊。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄