一點沒誇張，打從簽約黎明旗下的Amusic，去年的樂壇新人李治廷就是本刊專訪欄目的頭號邀約對象之一。
結果，貴人一直事忙，等了又等，等他橫掃了去年的樂壇新人獎、再憑柏林影展最佳電影《歲月神偷》勇奪「香港電影金像獎最佳新人」、又忙完了《為你鍾情》、《李小龍》和今年賀歲片《我愛HK開心萬歲》的拍攝工作，足足等了一年半，這一天，李治廷剛從台灣宣傳《李小龍》回港下機、趕到電視城出席《勁歌優秀選》綵排中間有兩個小時空檔，終於把他等到了。
順道一提，幫李治廷贏得《優秀選》的歌曲是改編自張國榮的〈一片痴〉。
一向自己唱作為主的李治廷趁着《我愛HK》未上畫、和周星馳的《新大話西遊》開鏡前，抓緊時間入studio錄新歌，本來不太情願唱改編歌，卻在某個心情不好的日子被監製雷頌德挾去錄音，竟然亦唱得全城大熱、感動了不少60、70後的哥哥fans，包括本人。
被電影人文雋形容「不入娛樂圈是香港的損失！」，被導演郭子健讚賞「香港80後偶像的最佳代表！」，被老闆黎明嫉妒：「拿遍了我年輕時想拿的獎！」的李治廷，家住清水灣千四萬豪宅；世叔伯是財爺曾俊華、《歲月神偷》導演羅啟銳還有溫拿；鄰居是邵逸夫、方逸華；伯樂是黎天王，長得俊朗、唱得好聽、能文能武還竟然是畢業於全英排名第三名校Imperial College物理系高材生……我抱着一肚子偏見與這個23歲、有樣有運仲有才華的有錢仔會面後，衷心奉勸大家，放下憎人富貴的偏見，看看尖子是如何煉成的。

 

唔算有錢
香港有錢人大把，落一轉中環，呢架車值200萬，比起前面嗰架嘅400萬，又算得乜？莫講話仲有大把人買飛機添……比錢多，我邊夠人嚟，不如話我係幸福仔。
我爸爸由細到大好open，話我聽佢細個打交大，佢仲會同我一齊攞番石榴掟人哋啲車，知我鍾意音樂，成日買新結他同鼓畀我。小學我一個月50蚊零用錢，多過好多人，夠攞嚟幫我架四驅車加龍頭、鳳尾、新軨有突。到中學，有個更好嘅制度，就係用錢引誘我讀好啲書，考試攞A、同B有錢獎，考C要扣錢，不過我從來唔會攞C。
但我覺得自己最幸福係，生長喺呢個家庭環境，見識得多。我真係咩人都見過。細個屋企住九龍塘，一個人落九龍城踩板，識咗成班東頭邨嘅朋友。爹哋嘅朋友，搞音樂有、白手興家有、屋企有錢有，亦有人本來幸福美滿，生意失敗或者遇上咩事，搞到成頭家散晒都有，我好細個就見識到，呢個世界唔係咁美好，可以幾殘酷，擁有，唔代表可以擁有一世。

唔係校友
我哥哥大我15年、姐姐大我11年，又去咗其他地方讀書做嘢，我嘅成長同single child冇分別。
我記得兩歲前，自己好外向、好鍾意交朋友。兩歲至五歲，爸爸送我去溫哥華坐移民監，鬼仔世界好難融入，我開始變得自閉。直到小學（英基國際學校）都係嗰種冇乜朋友、唔多出聲，專鍾意畫畫、砌模型、玩埋啲自閉玩意，俾人孤立俾人蝦嘅小朋友。好多人以為我係DBS（男拔萃）校友，係，我爸爸係校友，最大心願係我入到DBS。結果我入咗英基國際學校，中學前我都冇乜目標、返學調皮、做嘢是是但但，老師針對父母又擔心嗰種，直到小六遇上兩個老師，一個話我聽，其實我可以做得好好，第一次讓我願意嘗試努力、第一次體驗原來做得好被人讚賞嘅感覺好好；另一個係音樂老師，鼓勵我夾band，仲向校長提議，每朝十分鐘嘅早會音樂欣賞時間，畀我哋上台彈band song、彈Linkin Park喎！幾了不起？

Head Boy
睇我profile，讀全英排名第三大學物理系，睇落好睇，但冇人知我大學讀得幾辛苦。
第一年返香港過聖誕，個個中學同學呢個話去咗美國邊度玩、嗰個話join咗好多club，我成個中學都係學校風頭躉，讀書好、係head prefect又夾band，佢哋以為我一定夾咗新band，唔知又做咗邊個club嘅chairman，其實第三個星期開始我抄嘅notes已經一個字都睇唔明、大學課程已經超越咗我以為自己做到嘅嘢，嗰三個月大學生涯係我最灰最冇信心嘅日子。
入大學前，我都以為自己幾好，實情同學個個都係精英中嘅精英，講緊一個地區嘅第一，一早就考到全獎學金。嗰年我考試前打電話返屋企講：「我咁多年讀書好，唔代表喺呢度就掂，媽咪，今年我可能畢唔到業，不如疊埋心水畀我去美國讀音樂啦！」
好細個我已經認定自己會以音樂做事業，好多uncle、auntie（溫拿五虎、側田三叔Ted Lo）睇住我大，正因為佢哋喺呢行事業有成，細細個佢哋已經話我聽，呢行成功睇機緣巧合：「o靚仔，讀好啲書！夾band搵唔到錢o架！」我揀物理實在係第時去夾band最壞打算唔使再食父母，起碼仲有個靠得住搵到食嘅文憑。

並非天才
個個以為我樣樣叻、以為我係天才。唓，呢個世界邊有咁多天才，起碼我唔係。我喺劍橋識個韓國仔朋友，佢讀書叻、係劍橋足球隊隊員、仲有時間玩同蒲，每日set好時間踢完波4點9去買酒，飲到9點準時上床瞓覺，早啲瞓早啲起身用嚟讀書、呢啲先係天才！仲有我大學嘅best friend Peter，我哋間學校學分考到70%係一級榮譽、考到60至70%已經好叻，一啲唔失禮出去包搵到工，但Peter考到88分！呢啲先係天才！
打完個電話畀阿媽，我諗通咗，話畀Peter聽：「你幫我啦！就算被打敗，我都要用盡能力堂堂正正抬起頭被打敗！」結果，嗰年有Peter幫，我考前三個月每日溫足9個鐘書，考到60幾分……嗰三年大學生涯，我學到一樣嘢，呢個世界冇天才，所有嘢都係努力換番嚟！

只求進步
音樂唔同，音樂有天才，夾band世界咪好多天才囉，飲完蒲完成晚第二日一樣唱到，不過，都唔係我！你冇聽過我第一首demo呢？好難聽好恐怖，換轉係我，飲兩罐啤酒都開唔到聲！嗰段日子最灰，書又讀唔掂，唱歌又唱唔到，畀條生路我行啦！直到我跟咗Christine Samson學唱歌，學足三年，至叫做慢慢學識用聲咋。
我一直覺得入啱行，唱歌拍戲feel like home，以前覺得有機會入到行、做自己興趣嘅嘢，辛咩苦呀？實際上我係超完美主義者，要求同能力永遠係兩條平行線，要求永遠高過能力，做音樂嘅人咁嘅態度至正確、先至可以做得好，不過咁樣做人特別辛苦囉！
不過我有一個好處，出面真真假假嘅彈同讚都唔會影響我、打擊我，音樂人應該如此，要畀自己信心、要睇到自己嘅缺點，同人比較有乜謂？我班大學同學，一個畢業後21歲仔一個月已經搵緊3、50萬，另一個一級榮譽生，做咗一年淨係加佢600蚊人工……呢個世界就係咁，唔好講咩目標唔好同人比，我對自己嘅要求只得一個：進步！

落選最好
父親、《歲月神偷》導演羅啟銳都是男拔萃校友、《歲月神偷》又有男拔做贊助，不論是行家還是討論區都有個美麗的誤會，說李治廷是DBS校友。
「入唔到都冇咩好失望，遇唔到小學（英基）改變我一生嘅老師，至係我最大損失！」
說得對，李治廷的聲音是香港樂壇這些年最讓我有期待的新聲音，要是入了DBS、碰不到鼓勵他夾band唱歌的老師，才是損失。



比錢多，我邊夠人嚟，不如話我係幸福仔。


在新戲《李小龍》飾演少年李小龍，形神俱佳，中港台影評都大力吹捧。


第29屆香港電影金像獎，李治廷一舉拿下「最佳新人獎」和「最佳原創電影歌曲」兩個獎。


李治廷說每拍一部電影都是學習機會：「咪以為明星好巴閉，愈係華哥（任達華）君如呢啲影帝帝后，愈係照顧身邊隊crew。」


李治廷說中學常借英基同學父親的studio夾band，才有幸遇見黎明試音，而非傳聞中的靠父親和世叔伯關係。第 187 期 忽完就走 圖片


沒有緋聞亦沒有醜聞，李治廷工作以外的消閒，最多只有跑步和打機。


呢個世界冇天才，所有嘢都係努力換番嚟！





作品九成是自己作曲、編曲：「Leon好錫我，真係信任我交畀我自己做！」


09年李治廷橫掃所有媒體新人獎，眾望所歸。《蘋果日報》圖片


arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄