上周六（11日）舉行的《歡樂滿東華》被狂插為悶騷一場，但原來卻成為不少網友茶餘飯後的話題。本刊發現《東華》騷播出後數日，在「高登」、「親子王國」等多個討論區都上載一條曾志偉打golf失控爆粗片段，連日點擊次數過萬。片段中志偉口快快噏咗句「好×多謝總理！」令身邊的總理之一何超蕸當場露出尷尬神色。事後連司儀之一的鄧梓峰亦踢爆志偉唔覺意爆粗。
打波打到㷫合合，難怪這個贈送粗口環節成為全晚收視最高的時段。


早前曾志偉在海南島舉行的世界職業明星高爾夫球邀請賽中，撼低一眾荷里活明星贏得全場冠軍，於是今年《東華》騷就順理成章搵志偉打golf籌款，總理之一的何家二房二女何超蕸就捐出50萬贊助。

超蕸老尷二部曲
一向低調的何超蕸，甚少以東華總理身份現身電視，今次破例出錢贊助，竟然聽到志偉爆粗，難怪她反應咁大。其實全個過程只有五秒，但已十分搞笑。

超蕸斜啤志偉
記者在網上翻睇志偉爆粗片段：當晚擺好姿勢的志偉準備揮杆，可惜他的球技令人失望，打了廿多球只入得一球，另一司儀曾華倩都睇唔過眼說：「你打到返屋企呀！」倒數音樂響起，志偉愈打愈㷫，打完最後一球後隨即發晦氣講了句：「哎吔！算喇！」跟手就掟支球杆落地。現場兩位司儀鄧梓峰和曾華倩正想打圓場之際，志偉突然爆出一句粗口：「點都好×多謝總理。」非常礙耳。出錢做善事冇理由換來粗口問候，何超蕸隨即口噏噏跟企她旁邊的總理交頭接耳，更向志偉斜啤一眼，但當她發現被攝入鏡頭時，即對住鏡頭尷尬一笑。

鄧梓峰：唔覺意啫
失控爆粗嘅志偉當然例牌當冇事發生，繼續在鏡頭前擠出笑面，但據知他事後亦有向其他藝員怪責自己「波」藝未精。完成這個環節後，更嬲爆爆返化妝間休息。記者就此事問過主持鄧梓峰，他亦承認志偉事後的確表現失望，他說：「佢或者有啲嬲啦，之後都有話自己打得唔好，不過真係好難打，我前一日試咗成晚一球都入唔到！（志偉嬲到爆粗？）我……冇留意喎！我掛住望住前面個計分牌，或者佢唔覺意啫！」而另一司儀曾華倩就力撐志偉當晚冇講粗口：「個環節都係搞吓氣氛啫，都唔係正規比賽。我認為志偉唔會嬲，現場好亂，我亦聽唔到佢講粗口。總理始終唔係我哋artists，難免會唔適應鏡頭，未必係尷尬嘅！」爆粗嘅志偉則在截稿前仍未回覆。至於無綫外事部發言人蘇先生說：「我哋暫時未收到有關投訴，會睇番片段再進一步了解。」點都好，難逃網友「法眼」，一句都唔錯得！

網友圍插
志偉今次失言爆粗，惹來大班網友一窩蜂在網上留言，大部份網友都表示親耳聽到志偉爆粗，有部分網友更彈志偉欠體育精神，鬧他輸到發脾氣掟杆，更認為今次爆粗事件可以帶挈《東華》騷收視，總之踩得就踩。

開口夾着脷
家庭觀眾有老有嫩，所以藝人在直播節目中必須謹言慎行，一句無心之失，除了惹來廣管局的投訴外，更會惹禍上身，以下有人辦你睇。
劉華登報道歉
劉德華在95年台慶上照稿讀講咗句「杏加橙」（廣東話粗口諧音），廣管局立即收到六百多宗投訴，劉華費事形象盡毀，於是在報章上登啟事向全港市民道歉。
娘炳遭雪藏
梁漢文在95年的《東華》騷中，臨完場在台上竟然爆粗講咗句：「唔好咁×嘈！」被現場大咪收晒音亦懵然不知，最後娘炳被雪藏一年，事後他表示好後悔。
森美網上耍冧
森美去年在電台節目中將歌名〈家春秋〉突然講錯為「家噸×」，搞到大批網友在電台網站投訴他，最後他要在大氣電波和網上道歉，才能平息事件。


爆粗前風騷
歷時六個鐘的《東華》騷悶場多到數唔晒，獨志偉爆粗一幕最有驚喜。其實志偉爆粗前，眾人都相安無事，何超蕸（右二）更肉緊地睇志偉打波，完全風平浪靜。


志偉當晚眼界甚差，經常將波打到出界外，嬲到佢dum晒地。


志偉爆粗唔係第一次，08年在「512關心行動」中，有指他不滿匯演變成東亞騷，在慰勞宴上突然爆粗說：「出年召集人係陳道明，你老×！」於是林建岳隨即拉大隊去另外一家飯店慶功。


林建岳《FACE》圖片


怒掟球杆
打廿球先入得一球，志偉最後都可以笑住掟杆落地，影帝即係影帝。難為身邊的工作人員，差點被杆掟親。


發現鏡頭
志偉爆粗後，隨即扮冇嘢，超蕸忍唔住將頭擰向左邊，繼而啤了志偉一眼，後來發現鏡頭對住自己，惟有尷尬地望番鏡頭。


拍掌圓場
最後志偉亦刻意行前走向超蕸，拍住手講咗句正常版「多謝總理」，超葭亦禮尚往來拍掌打圓場。


志偉在東華瀨嘢並非首次，08年就有報道指他在後台飲酒飲到high晒，返廠後先除丘凱敏條褲，再扯曾華倩外套，最後要曾華倩出手摑醒。《FACE》圖片







劉德華《蘋果日報》圖片


梁漢文《蘋果日報》圖片


森美《蘋果日報》圖片

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄