自從10月同廣告導演老公袁劍偉生完B女Kayla後，林嘉欣一直留守加拿大湊女，暫別娛樂圈，湊B萬事足。
做咗媽咪形象要更加健康，據知林嘉欣同陳奕迅婚前拍落的電影《戀人絮語》的床戲亦被刪走。戲中兩人一路刷牙一路在床上纏綿sweet到爆的戲分，導演兼曾志偉大仔曾國祥卻嫌套戲過長而狠心剪走。要睇32歲林嘉欣學周秀娜含住牙膏調情，機會難逢呀！


今年6月同袁劍偉結婚的林嘉欣，早於上年已完成所有《戀人絮語》戲分。雖然當時未結婚又未大肚，不過人夫Eason在拍攝現場已覺嘉欣古古怪怪。「佢（林嘉欣）係一個幾慢熱嘅人，一唔使埋位就行埋一邊細細聲講電話，據我所知佢喺圈入面冇乜朋友，最熟都應該係伊健喇！」

瞓醒再玩
Eason同嘉欣飾演偷情男女，兩人本來分別同范曉萱及向佐拍拖，後來身痕偷食。其中一幕講二人齊齊過夜「開屏」後，林嘉欣一邊刷牙一邊整醒Eason，嘉欣仲將牙膏滴落Eason塊面，搞到Eason呱呱嘈。Eason事後仲話：「我估唔到啲牙膏係咁鬼『揦』，平時刷牙唔覺，點知拍嗰陣『揦』到我塊面紅晒！」

Cosplay上癮
Eason偷跳，同佢傳過緋聞的謝安琪亦有份拍《戀》片。Kay姐戲中飾演洗衫妹，暗戀靚仔客人台灣小生彭于晏，仲拎住對方着過嘅臭衫係咁索，分分鐘變態過班內衣賊。
做咗「索Kay」，謝安琪又要經常對住吹氣公仔做戲，「故事講我成日自行幻想同彭于晏做唔同嘅嘢，我仲會主動錫個假人添！我喺戲入面幾乎咩角色都扮過，宅女、護士、俠女通通做勻，最尾仲會着住懷舊衫同個着住『許文強衫』嘅吹氣公仔道別，好好玩！」
咀吹氣公仔咁好玩，不如張繼聰都整個Mary玩吓啦！

志偉仔1開4
入圍台灣金馬獎「最佳新導演」的曾國祥，除咗教陳潔儀點做戲外，連飾演陳老公自己老豆曾志偉都冇面畀。

威廉搞人妻
《戀人絮語》分4個故事，除Eason＋林嘉欣、謝安琪＋彭于晏外，仲有陳偉霆飾演的四眼仔表面戇直，其實靜雞雞暗戀同學仔個媽咪陳潔儀，當佢知道陳潔儀個老公曾志偉包二奶，想盡辦法玩踢爆，最後成功拆散人哋家庭，可惜佢自己都係悲劇收場。
William跟蹤曾志偉，知道對方包二奶後，即時向陳潔儀爆大鑊，之後仲乘機帶人妻爆房。

向佐食台妹
向佐、范曉萱呢段故事，同林嘉欣Eason嗰段絕對有關係。Eason正印范曉萱知道男友偷食，於是主動聯絡嘉欣男友向佐，兩人為向林嘉欣同Eason報復而發生關係，不過曾國祥話呢幕床戲畀觀眾個感覺太負面，最後都係一刀剪走！
范曉萱話同向佐呢幕床戰係佢咁多年以來最大膽一次，可惜俾導演剪走咗，幾激都冇用！


滴晒
嘉欣含實泡牙膏攬住Eason，本來兩個面貼面sweet到爆，但玩牙膏呢招，點都令人諗起Chrissie喎！


騎住
導演曾國祥話一對情侶朝早起身一齊刷牙係件好幸福嘅事，所以特登安排Eason同嘉欣玩牙膏談情。


按摩
着住條孖煙囟嘅Eason幫嘉欣按摩，偷食得嚟都好溫馨，不過Eason對榕樹腳實在粗得驚人，破壞咗個feel啦！


Kay玩制服
經常走入幻想世界嘅Kay，因為喺彭于晏衫袋摷到張牙醫咭片，於是幻想自己做咗牙醫診所嘅護士，仲搵個吹氣公仔扮彭于晏齊齊幫人睇牙。



喺洗衫鋪做嘢嘅Kay超級宅女，鍾意靚仔客人彭于晏都唔敢開口表白。





arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄