玉女真面目　周慧敏－明星靚相大分享☆

「千祈唔好俾我外表呃倒。」
語調鏗鏘爽朗輕快用字有力的周慧敏，用以上十隻字來形容自己。
遺腹女，母親要一人分飾兩角，搵食要緊，工作何止兩份。
屋企又無男人，形成自小已頗獨立，大大小小問題自己解決，擔擔抬抬雙肩一力承擔的硬淨性格。
「樣似受保護，嬌滴滴，唔出聲，其實不拘小節。鍾意保護人，路見不平，鋤強扶弱，又神經質，活到今時今日，仲學緊咩叫女性溫柔。」
不顧身世到一個地步，玉女曾大模廝樣踎大牌檔，幫襯街邊小食企住擦至愛的煎釀三寶。
「咁至有風味呀！」
甚至一支公孭住部相機，深入油麻地廟街影低寫實畫畫題材。
「更估唔到嘅地方，我自己一個都去過。」
玉女面孔，魔鬼身材，皮相真身，原來，是個男人。

黑色格紋羽絨褸 $3,280
黑色仿鱷魚紋短身水靴 $1,880
Both Aigle
Ralph Lauren黑色雪紡one-piece 售價待定
Piaget Limelight Paris-New York 18K白金鑽石及藍寶石項鏈 $2,672,000；戒指 $1,586,500

放下身段
被全港七百幾萬人認證身份，做了四分一世紀玉女鼻祖掌門人，下年三月入行廿五周年的演唱會都火燒眼眉了，周慧敏這刻才來揮劍除名，拒絕認祖歸宗，都幾反高潮！
「玉女形象，係大家俾嘅。但問心，我冇可能係玉女，呢兩個字，於我，可能只係玩MSN先用的一個化名，根本唔代表乜嘢。」
就連次次睇次次都忍唔住包雲吞的《大時代》慳妹角色，也來連消帶打割席。
「哈哈哈慳妹的而且確幾cute，成日夾住個荷包仔拖住紅白藍四圍騰，偶然諗起都會心微笑，但我冇可能似慳妹，慳到咁絕！」
四兩撥千金，笑得豁達開懷，連我這個塘邊鶴都feel到當事人那種輕鬆自在，百毒不侵。
「因為現階段，我只當自己係part time藝人。」
即是玩票性質，只會選擇性地有限度配合。工作以慈善首選，代言人身份其次，餘下的quota就要睇興趣和感覺了。明星身份放到最低最低，唔賣賬打關係，不求人冇包袱，什麼娛樂圈規矩遊戲，針對性炒作新聞，理得你，有時間同家中貓狗玩餐飽唔好！？
「以前細個，一入行就歌影視播未停過，根本冇時間停低睇清楚自己須要，不斷push不斷push，只識過度嚴厲強逼自己，依家諗番，其實幾傻。」
放手，動力來自轉變。

脫胎換骨
周慧敏說，自在人生，緣於兩大轉捩點。
第一次，在97年。
由86年參加港台DJ比賽入行，本來當玩，結果變成離開校園後人生第一份工，一做十年，身心透支攰到極點！覺得自己一直生活响小圈子裡面，世界發生乜事完全唔知，好迷失，唔知信心係乜，生活被動到得人驚，而更得人驚的是，係發現自己每日唱歌、拍戲的工作，表面上，好似一樣；但實際上，身處其中的這個圈子，遊戲玩法，已經嚴重變質。
「我從來都唔係是是但但，有一日過一日嗰種人。甚至幾proud of自己就係主宰，我唔要再過這種災難生活。正正因為三十歲都未到，更加有責任為自己搵出路。碰啱該段時間所有合約陸陸續續完結，倪震又有計劃移民加拿大，於是決心放自己一個大假，點知，一放，就變成好幾年的悠長假期。」
難得抖氣，仲唔趁機會restart人生。從前錯過的，失去的，嘩即刻做趕快做搶住做，並重頭認識自己的興趣、能力和目標……就這樣，發掘對了生活模式，亦肯定找對了生活伴侶，方才發現，原來，人生，可以咁過！
第二次，事發於去年。
周慧敏坦言放下了四十多年來，一直盲目靠自力去闖關的一套自信、修為，投向基督信主了。還不諱言，沿途風光路至此，惡作連續劇煲水緋聞？更難入侵周氏金剛不壞之身。
「在主愛內，依家個心，最踏實。」
阿門。

我的人生

不敢回憶　未能忘記
我最鍾意踢爆。
本人親兄是周慧敏的死忠粉絲。變態到一個地步，似病人服藥，每日都要（迫我）聽一次周小姐的名曲至安樂。
地方有限，大佬的床下底遂變成藏寶地方，其中一角專區，井井有條珍藏周氏的歷年推出CD，還要在每隻碟的右下角，用簽名粗筆狂草自己名字，慌死有人偷喎！對待那張束胸宮廷服poster仲緊張，矜貴過人民幣零售國債呀！
多年後舊事重提，始知一切並非精密部署，胸前夾死蟻逼爆效果，原來純屬意外。
「細個保守，從來冇諗過行性感。點知拍MV當日，裁縫先將件衫趕起，上身造窄咗，改唔切，要趕埋位，加上打燈，嗰時又未興digital相機，直至睇到報紙登出嚟效果，先知咁震撼。」抗拒，唔舒服，見到都當透明，更不想fans攞俾自己簽名。「雖然，我知呢批相，信和幾度賣斷。」介意？都成史前的過去式了。今日尺度，即使穿得性感，戲裡男男女女閃電肉搏炒埋一碟，當事人都不過視為碎料小兒科。
「冇咩大不了啫！」
現實，除外。

Aigle紅色雪褸 $5,880