人仔好搵！圈中幕前幕後，不論拍戲拍劇，集體北上，本地製作要埋班，莫講話演員，好嘅化妝梳頭都難度期。好似謝天華套《Laughing Gor之潛罪犯》，搵女角傾影帝襯Laughing sir，左度右度成個幾月先集齊兵馬。


上星期六（十月二十九日），吹雞開鏡，自稱貪錢，片酬加得夠滿意嘅吳鎮宇冧庄埋位，仲有杜汶澤、廖啟智等戲骨幫手搭棚，女角除咗一早講咗有份嘅徐子珊，有Janice Man同今屆港姐冠軍朱晨麗，都係嗰句，男人戲，女角弱啲唔係大問題。電影開鏡拜神，監製帶頭上頭炷香，梁家樹不敢怠慢，誠心落力叩頭，搞到幾乎跌眼鏡。老實講，邵氏開戲，自己友多外援少，又有無綫滾筒式宣傳強谷，條數點都易走棧好多，邊使咁騰呀！ ####


總之貴你好多啦！（設計對白）你收幾錢啫？（設計對白）再度同謝天華合作拍Laughing電影版，吳鎮宇好老實，全因為錢作怪，唔係搭吓膊頭就OK嗰隻。


監製梁家樹大力叩頭上香，幾乎跌眼鏡，好彩接得住，無事！


做晒主角，謝天華影低自己個大頭照，留為紀念。


Janice Man同徐子珊好好傾，好熟咩？唔，應該好戲至真。


應屆港姐冠軍朱晨麗，戲中做吳鎮宇女友，零經驗但要同影帝過招，難過選港姐。


郭晉安冇份拍《Laughing》，當日純粹路經此地。


影帝肯幫手，高層樂易玲當然要親自招呼。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄