今年無綫台慶頒獎禮，最大的是「視后」戰，佘詩曼離巢後，各花旦對一姐之位虎視眈眈，無綫亦表明立場，候任「視后」必定會是簽了經理人合約的「親生女」。距離頒獎禮唔夠一個月，以胡杏兒及陳法拉兩個跑程最接近，當中叫三飛的胡杏兒，更贏得網民支持，暫時成為最高票視后人選。至於當正自己做硬一姐的陳法拉，見胡杏兒得民心，於是使出奸招，拖埋「老公」落水，做兩頭蛇「包圍」兩大話事高層，硬搶！

五生五旦
本週二（十一月一日），無綫舉行節目巡禮，以五小生五花旦製造話題，當中包括陳豪、郭晉安、鄭嘉穎、黃宗澤、謝天華、胡杏兒、楊怡、陳法拉、鍾嘉欣及徐子珊，由於佘詩曼離巢，無綫一姐之位懸空，新一任當家花旦，將會在這五人之中揀選。換句話說，下月五日舉行的台慶頒獎禮，誰得到「視后」，就是一姐！以目前走勢，胡杏兒同陳法拉為大熱，兩人亦講到出口，希望可以做到今屆視后。但在網上票選中，有三部劇《萬凰之王》、《怒火街頭》及《魚躍在花見》的胡杏兒，暫時以大比數拋離《潛行狙擊》的陳法拉，她的票數更在鍾嘉欣之下，論資歷、演技及觀眾認受程度，陳法拉始終未夠班。

多人圍
胡杏兒近日在深水埗為《怒火街頭2》拍外景，每次出現都俾街坊圍住影相，又話支持佢做視后，連印巴籍人士（白衫）都爭住同佢影相。

阿姐上身
得唔到民心，加上經常「一姐」上身，對幕後工作人員態度惡劣，令陳法拉失分不少。
「依家拉姐（陳法拉）當自己上晒位，好有個人主見，導演都未必講得佢掂，唔啱聽嘅話，佢一定同導演撐到行，試過當住大班人面話唔知導演想拍乜？好唔分庄閒，之後仲黑口黑面，佢永遠覺得自己啱晒，又唔諗吓咁多年廣東話都未講好，成日NG累人遲收工，大家都冇俾面色佢睇！」一名幕後工作人員說。
最近忙於拍攝古裝劇《東西攻略》的陳法拉，在工作現場的確無乜人緣，經常叉晒腰對工作人員嘴藐藐，拍完收工，工作人員更加唔願意幫她收櫈，法拉要自己郁手，食飯都冇人陪自己一個，簡直生人勿近。
相反對手胡杏兒就晚晚與同劇《怒火II》的鄭嘉穎、李燦琛等一班幕後工作人員一齊開餐，坐埋有講有笑。公司同事對兩個阿姐的態度，差別很大。

做兩頭蛇
明知對手得民心，陳法拉心知不妙，善於巴結高層的她亦不敢怠慢。本來是「迷雲黨」的陳法拉，因為去年陳志雲牽涉官司，在公司失去話事權，她看風駛，立刻拉埋「老公」薛世恒一齊向樂易玲埋手，公然帶埋「老公」同高層賀壽，成功埋身，穩住花旦地位。到陳志雲歸位，陳法拉亦無放過決定做兩頭蛇，一於無分彼此兩個高層都擦，為內部高層投票鋪定路；至於胡杏兒，就只得戲劇製作部總監梁家樹一人撐腰，計高層票源，確比陳法拉輸蝕。 ####


我多人撐！（設計對白）週二，無綫舉行節目巡禮，兩位視后熱門人選胡杏兒同陳法拉一齊出現，幫公司拉客。


但係啲老細冧我喎！（設計對白）


杏兒領先網上有多個「視后」投票，當中大部分都是胡杏兒領先，陳法拉三甲不入。


台慶劇《萬凰之王》宣傳重點落在胡杏兒一個人身上，似是幫她攞獎鋪路。


胡杏兒同徐子珊搏到盡谷胸上陣，成功搶贏其他花旦風頭。


胡杏兒每次都同劇中演員及幕後工作人員一齊食飯，相處融洽。


獨孤精食飯時，陳法拉冇人陪，要自己坐埋一邊食自己。


陳法拉去到片場攞晒款，叉晒腰，問工作人員幾時先到佢埋位。


工作人員寧願幫郭晉安攞櫈，都唔願意幫女流之輩陳法拉，睇得出她人緣有幾好！


陳志雲重返無綫話事，陳法拉一見陳總即刻上前吻賀對方回歸。


今年七月樂易玲生日派對上，陳法拉與老公薛世恒（左）難得一齊出現到賀。


全靠梁家樹多次委派胡杏兒演重頭劇，令到她今年有望登上「視后」寶座。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄