face 週刊 128 期阿爸爛底老豆周身街數　薛凱琪死充富貴門 @ 明星靚相大分享☆

封面　阿爸爛底
老豆周身街數　薛凱琪死充富貴門
2009年11月04日
28歲薛凱琪（ Fiona）最近有傳與拍拖 4年嘅房祖名分手，中女重新再上市，新碟《 Read Me》未見大 hit歌，阿 Fi當然要豁盡啲。
阿 Fi人財兩失，冇咗個金龜祖名，原來佢多年來亦冚實老豆一身爛數秘密。本刊發現薛父（薛偉豐）曾有 7次被入稟法庭收爛數紀錄，按揭糾紛、拖租、走數，最離譜連手提電話費都唔交，估唔到千金打造嘅阿 Fi老豆拖人咁多數！薛凱琪辛苦經營嘅富貴女印象，一鋪打爛晒！
Fiona餅印阿媽 Emma
上月中，薛凱琪冇工作喺身就同餅印媽咪 Emma周圍去， 04年薛母喺北角城市花園開過補習社（但已結業），當時薛母為保愛女起步事業，曾對本刊拒認親女，家老公被揭咁多爛數，唔知薛母又會點拆招呢？

28歲薛凱琪（ Fiona）入行 5年，出道時一家 3口租住北角半山寶馬山花園豪宅，再加上報稱自細入讀學費每月約 8千元嘅國際學校 Island School，英文「叻」過中文，阿媽黃小明開補習社，老豆薛偉豐又開室內設計公司，加埋個唱片公司高層舅父 Peter，表面計薛家好富貴！
半山搬元朗
工作量唔算多，不過去年阿 Fi以公司名義買入 1,130萬九龍塘豪宅帝景峰相連單位，打造 1,650呎私人玩樂天地，但據知「富貴門」前身拖人成身債。「嗰陣 Fiona屋企唔係想像中咁掂，佢老豆生意亦唔算大，成家由羅便臣道搬咗去元朗加州花園，本身同佢 hea嗰班都係啲有錢二世祖，唔知係唔係怕冇面，佢家道中落後就好快消失咗，冇搵大家，係到佢 04年入行唱歌大家先再見番呢個人！」知情者說。

《蘋果日報》圖片

據知 Fiona外婆有啲貨，九十年代曾於中環開過間「 City Cafe」，供外婆打躉有細藝，薛母 Emma亦主管家中大小事務，薛父對老婆亦十分言聽計從，去年生日更齊齊為 Fiona搞生日，一家好 happy。
屢被入稟
阿 Fi家道中落，薛公主焗住由羅便臣道豪宅搬去元朗加州花園，據本刊調查發現， 97年薛父與前商台高層蔡東豪合資 888萬買入嘅加州花園，喺 02年亦要劈價 312萬急住放盤，甘心流晒血倒蝕 575萬賣樓，似乎當時幾等錢使；同時本刊又發現高峰期持有 6間公司嘅薛父，名下 5間公司均於 04年同時結業，最後一間亦於 08年結束。
而薛父喺 93至 04年間曾有 7次分別被入稟高等法院、區域法院及小額錢債審財處，追討款項由數萬至 20多萬及未有披露實際金額的按揭欠款，尚幸未有被申請破產，物業亦沒被釘契，相信他已解決債項。至本週一（ 2日）本刊致電華納宣傳大員 Carmen，她表示因阿 Fi身在橫店拍劇暫時未有回應。
私人天地

去年 8月， Fiona以公司名義用 1,130萬買入九龍塘豪宅帝景峰相連單位，新居大裝數月後， Fiona急不及待將新居傢俬相放上 blog同人分享。
7條街數
Fiona老豆薛偉豐開過 6間公司，不過均已結業，其中 93至 04年間更不時被入稟追債，筆筆都唔係小數目，其中有 4宗為高等法院審理，富貴門似乎係假象。
官司都有分大細，根據香港政府現時劃分：
涉及 5萬以下錢債：小額錢債審裁處
5萬至 100萬錢債：區域法院
100萬以上錢債：高等法院
高等法院
1嘉兆臺單位拖加按
本刊發現薛偉豐兩宗按揭糾紛，分別為 97年買入價 888萬的加州花園及 92年買入價 559萬的羅便臣道嘉兆臺單位，而嘉兆臺更因加按後拖欠供款而被銀行入稟。
2加州花園拖供樓
3拖租欠差餉
由於案件可能涉及高院其他訴訟，所以薛偉豐呢兩單訴訟要在高院審理。
4欠律師費
區域法院
5冇交租
6又走數
薛偉豐曾持有 6間公司，除咗欠按揭及拖租，估唔到佢走數種類多，連出名收費平嘅萬眾手提電話費都唔交，俾人向小額錢債審裁處入稟。
小額錢債審裁處
7電話費都唔交

有上有落
細個住慣羅便臣道豪宅，不過老豆生意有升有跌，千金 Fiona亦焗住搬去元朗加州花園，雖然環境唔錯，不過比起羅便臣道的確差好遠！薛父 02年蝕放加州花園後，一家租住北角寶馬山花園，計落有 6年冇買樓，直至去年 8月先用薛凱琪及其母以公司名義再買樓，但底花薛父就冇名。

'88西摩道福澤花園（賺 168萬）
↓
'90半山羅便臣道樂信臺（賺 256萬）
↓
'92半山羅便臣道嘉兆臺（賺 259萬）
↓
'93半山地利根德閣（賺 240萬）
↓
'97元朗加州花園獨立屋（蝕 575萬）
↓
'03（租）北角寶馬山花園
↓
'08九龍塘帝景峰（現持有）

從細大改造

長頸
寒背
A膊

薛母黃小明（ Emma）得一粒女，對阿 Fi當然好大期望，可惜樣子甜美嘅阿 Fi天生長頸、 A膊再加寒背，「 Auntie好緊張 Fiona，佢以前成日都迫 Fiona游泳練番個 A字膊，想佢游番闊啲個膊！」知情者說。不過，先天以外， auntie亦深明「佛靠金裝」，明知愛女 ready入行，亦刻意搬番出港島，月租 3萬北角半山寶馬山花園單位，等乖女出入富貴門。

薛凱琪 04年入行後，機會不斷，入行 1年就有機會擔正拍 TVB劇《學警雄心》，不過當時因角色關係，要剪短晒啲頭髮，長頸 A膊缺點暴現，自始獲封長頸鹿。
行名店

薛凱琪 07年為了進軍台灣市場，被公司放逐台灣大半年，不過 Fiona一於少理，不時「偷渡」返香港陪阿媽 shopping。
薛公主「豪」語錄
阿 Fi自細住羅便臣道，讀國際學校，食好又住好，偏偏屋企就家道中落，要迫住做落難千金，但入行時外表富貴嘅阿 Fi，都一樣交足戲，出道初期講句嘢都好有公主 feel！諸葛公主都係執佢口水尾咋。

「我由小學到中學都係讀國際學校，冇學過中文，所以家我拍劇、錄音睇歌詞，都要爹哋媽咪幫我翻譯做英文拼音！（老豆）總之就唔係出月薪、唔使受氣、話晒事嗰隻囉！」

「我好鍾意食零食，每隔個幾鐘我就會搵食，所以屋企雪櫃時時都要 keep住一堆零食，我屋企人買個 6呎高雪櫃，主要都係放零食咋！」

「你就知我鍾意睇戲啦！我身後部 50吋大電視就係我屋企嘅私人影院喇！」

「全屋最值得自豪，一定非我呢個衣帽間莫屬喇！係由 1間客房改成，可以放超過 300件衫！」

7年前戀
保安局局長李少光個仔　李霖恩：已經少聯絡！
同 Fiona傳得最耐嘅緋聞男就係房祖名， Fiona 04年入行，有傳房祖名追足佢 1年先追得美人歸，之後 Fiona間唔中被拍得與不少中性打扮嘅女友夜蒲，喜好忽左忽右，但原來 Fiona未入行之前，同過保安局局長李少光兒子李霖恩拍過一年貨仔。
「 02、 03年， Fiona（當時 22歲）同李少光個仔李霖恩拍拖，嗰陣佢哋成日孖住去 rave，玩得好癲吓！」知情者再爆。不過已為人父嘅李霖恩週一（ 2日）接受本刊電話訪問時就口窒窒話：「我以前同佢係 Island School嘅同學……不過……我冇同佢拍拖……我唔清楚佢屋企嘅嘢，大家已經好少聯絡，我唔方便講佢！」即匆匆收線，有大有細，李霖恩唔想激親老婆又啱嘅！