《蘋果日報》旗下嘅免費報紙《爽報》行將出版，有人話咁多免費報紙出街，益咗發行商，但小弟八到料，最開心嘅係印刷商。
聞說《頭條日報》將軍澳印刷廠有一條巨型「高斯」印刷機剛剛投產，小弟即時向該報負責人問有乜新動向。《頭條》原本有兩條「高斯」巨機，如今再加一條，印刷力大增三成三，原來兩條機已可印一百萬份免費報，如今去到盡可印一百五十萬份，正等對手出招。
不過《頭條》負責人話，依家人人都講到好大，其實單講印刷力，根本印唔到咁多。以前市場上《蘋果日報》和《經濟日報》嘅印刷廠都幫街外人印報，依家佢哋自己都出免費報，不但唔再幫人印，仲要搵人幫佢哋印，估計市場欠缺嘅印刷力至少有三十到四十萬份，即係有咁多數量嘅免費報紙打鑼都搵唔到人印。
《頭條日報》在將軍澳印刷廠新裝一條巨型印刷機，加埋原來兩條機，每日可印一百五十萬份免費報紙。
《頭條》負責人又透露，剛剛有免費報紙出版商好急咁搵佢哋，問可唔可以每日代印三十萬份免費報。佢開咗個價，要收0.35元印一手（即係八版細版），印一份四十版嘅免費報要1.75元，仲要簽三年死約至肯做。佢話以前「和平時代」，市場印刷力過剩，代人印報紙只收0.08元一手，佢依家開價0.35元一手，增加四倍有多。但市場上除咗《頭條》之外，又睇唔到邊間肯幫人印報嘅印刷商，可以接得起印幾十萬份免費報紙嘅生意。
加價咁多會唔會太誇張呀？《頭條》負責人歎口氣話：「印刷廠要投資八億至十億，現時嘅求過於供情況，可以話十年唔逢一閏，你唔鍾意可以自己起廠，但邊個願意做咁大投資？而且今日話起，都要兩三年先至起得好喎！」
《蘋果日報》間印刷廠現時用咗一條機幫《am730》印，《蘋果》自己要出《爽報》，根本唔夠機，行內人話如果要出一百萬份《爽報》，即使係六十四版以下較薄嘅報紙，印到早上八、九點都未印得完，但按正常發行要求，六點就要印好晒，否則就錯過返工嘅高質素人流，所以如肥佬黎要大搞《爽報》，都唔知佢點樣繼續幫《am730》印。總而言之，在各報大燒銀紙搞免費報紙嘅時代，都係做印刷商最賺錢啦。
留言列表
