陳奕迅（Eason）和徐濠縈結婚多年，愛女康堤轉眼間都成七歲。見阿女都入讀小學二年班，一直鍾意細路的Eason亦恨到出口想生多個。惜近年積極發展潮服生意的老婆阿徐，事業大過天，繼續採拖字訣兼主張搵代母代勞。
兩公婆為生仔各有睇法，日前Eason撇甩老婆和阿女去開餐，心情麻麻的他不斷發牢騷。而早前開學日，康堤也只得外傭送返學，全程悶悶不樂，跟昔日一家三口溫馨開學情景大相逕庭。
日前，Eason在食麵期間大發牢騷，大呻老婆忙到無時間生仔。
養身造人
現年三十七歲的Eason，近日大放口風想生多個，陪伴七歲的女兒康堤，坐言起行的他即從母親身上攞料，現正從飲食改善身體，為造人做好準備。他說︰「我想要第二胎，開始飲食養生，以前愛吃滷味、內臟、吃火鍋連鍋底也吃掉，現只吃七分飽，也開始多吃水果。三十七歲了，如要多生一個，身體要好才能生。」有心有力的他，打算有仔趁嫩生，雖然跟老婆有共識，但她卻一直採拖字訣。
因近年在潮服生意，搞得有聲有色的阿徐，成功洗脫昔日「大花筒」惡號，故事業行先，對於追仔一事，她說︰「目前太多工作，要經常飛，暫不可能佗BB。男人對生仔好心急，佢哋唔明佗十個月嘅辛苦，生完又要收身減肥。但我唔係唔生，仲有幾年先到四十歲，睇吓佢等唔等得。其實我贊成搵代母，因現今嘅人太繁忙。（阿女想唔想要弟妹？）佢話有好多朋友，唔需要喎。佢都好重妒忌心，會呷醋我抱第二個細路。」
老婆唔急Eason急，對於用代母，他反對說︰「我覺得成件事好唔自然，暫時不能接受。搵代母咪冇得衝動，唔係幾好喎。」
上周三（廿一日）晚，Eason在《蝦仔嗲哋》舞台劇上遭林建明魚肉，有工作在身的他，暫且拋開生育問題，即時開心晒。
日前康堤放學時，也只得司機和外傭接，躲在司機身後避鏡頭的她，不時偷笑，十分鬼馬。
全站熱搜
留言列表
