一曲《高登神獸戰-認真你就輸鳥》放上Youtube不夠一個月，便已經有逾廿八萬人次觀看，令林一峰最近成為了高登小王子。

「純粹貪玩o架咋！」一峰勁興奮地說。「我第一次喺facebook睇到『金翅仆街鳥』張卡，我真係笑到仆街呀！興奮到好想聯絡啲原創者，幫佢哋出卡，跟住我去完旅行返嚟，林二汶話我聽，佢買到嗰套卡，我即刻大叫：吓？仆街！出咗啦？當時開心到好似一個好鍾意食薯片嘅肥仔得到薯片一樣，我係咁噒，林二汶見我咁，就大我：『寫首歌呀笨！』咁我咪即寫囉！驚你呀？ Just for fun！同我做嘅嘢冇關o架，唔會落碟o架，咁開心，why not？」

大概這就是獨立創作人的好處，對外不用有甚麼顧慮，想點就點。「係o架！我自己搞公司，自資出唱片、搞show，真係賺到錢o架！你話係咪好好彩呢？touch wood！」隨即摸摸旁邊的木枱，然後神態優雅地說：「總之，最緊要係有假放！你睇，我啲皮膚幾好！」

我看着他臉上幾乎零毛孔的肌膚，剎那間，我終於體會到何謂「神獸卡」中的「一蕉羞貍貔」（即「一招收你皮」諧音）！

我，就是那隻collect skin的「貍」。

我不賣身

打從○三年推出第一張唱片開始，林一峰至今仍堅持着由其自家品牌LYFE製作，自己出晒錢，自己話晒事，做自己老闆；就算將於本月底舉行的個人音樂會《One Magic Day》，亦同樣靠自己。

「係o架！雖然都要靠其他人嘅effort，但我真係唔使點靠其他人嘅投資！總之由始至終，我都有個主動權喺手，我可以一個人控制晒！最多只係要搵華納或者東亞幫我發行咁囉，但我唔會賣身囉！」

他說，這些年來，其實也有很多唱片公司向他敲門，找他簽約，只是，他就是過不到自己嗰關。「幾年前，曾經有大陸公司叫我開個價，幾多錢都得，直情係blank cheque嗰種，我聽到都『嘩！』，好似好筍咁，但其實唔係o架！」不是樹大好遮蔭嗎？「即係呢，如果一個大公司或財團畀一千萬你，我收咗會好驚o架！因為要還o架，還嘅話，我就要乜嘢都做！但我唔得囉！我情願繼續每年用三個月至半年嘅時間去旅行，總之要隨時走得甩——唉，死啦！講呢啲嘢，好似冇乜趣咁，我驚悶親大家呀！」接着，他突然靜下來，說要想一個較有趣的比喻來加以說明。

搜索枯腸，他終於想到出來：「即係我同啲大公司嘅合作關係，就好似偷吓情咁，但唔會結婚囉……呀，no、no、no，應該話好似拍散拖咁，但唔會結婚囉……呢個比喻OK呀呵？」你話呢。

將於本月底舉行的個人音樂會《One Magic Day》，一峰繼續彈着結他跟大家說故事。

一峰愛旅行，每年需至少三個月時間離港。圖為他○九年於冰島的自拍照，原來佢都好鬼chok！

有乜咁慘

自己開公司總要些資金吧！「唔使好多錢o架！嗰陣開公司，得我自己一個人，我只係用咗幾萬蚊就開o架啦！」那製作唱片、做show都要錢啩，那些錢又從何而來呢？「寫歌囉。」寫歌？「十年前嘅事咯，嗰陣我寫咗廿幾首歌，就已經賺到六位數字，然後我咪用嗰啲錢instead of買車買樓，投資落去做唱片同做show，跟住咪轆到一嚿錢，愈轆愈大囉！錢，run出嚟咋嘛！不過依家寫歌都賺唔到咁多錢囉，四位數我仲會有，但好多其他新人就未必有，啲嘢唔賣得呀，好坎坷！而我就係喺啱啱啲歌仲賣得嘅時候，賺到嗰啲錢，你話我係咪好好彩？touch wood！」說罷，他又再摸摸旁邊的木枱。

那run一間獨立製作的公司，過程應該會有些辛酸、辛苦的時候吧！「辛酸、辛苦？最辛苦係冇假放囉！好似之前幾晚，我咪要通宵喺studio做嘢囉！我辛苦咪放假囉！一啲都唔辛酸唔慘o架！你問吓其他賣咗身嘅藝人慘啲，定我慘啲呀！我有時睇見佢哋都戥佢哋慘o架！名我就唔開啦，有啲藝人真係收咗嚿錢後，就乜嘢都要做，乜戲都要拍！我明白做呢行呢，五光十色，好多吸引、好多機會同誘惑，但就係因為咁，好多人咪騎虎難下囉！然後啲藝人成日都話好辛苦，我都唔知佢哋辛苦啲乜！可能最苦都係騎虎難下！」

這些五光十色沒有吸引到你嗎？「我犀利在忍到手唔賣身！我都唔係好想堅持o架，但我諗，香港除咗我之外，都冇乜邊個做音樂做得開心——其實我都唔係好識其他人，我只係覺得好似個個都喺度呻咁！」

一峰比妹妹二汶年長七年，但兄妹卻十分老友鬼鬼。

一峰說，他的賺錢原則，是不會貪，以及無論如何也會安定家人生活為先。

小時候的一峰，樣子早已跟現在差不多了！

九九年，一峰（右一）曾與現有線主持區永權（左二）等人組成「星盒子」赴台灣發展。

真係x架

我老實告訴一峰，我的原意是，想寫寫他經營一家獨立公司過程中的血汗史，例如有沒有為了做唱片或搞show而要捱麵包，又或者有沒有試過蝕了一鑊很甘的，諸如此類。

「吓？真係冇喎！我到依家我自己都出咗十一張碟，又幫自己、幫農夫、陳奐仁、野仔佢哋搞show，全部都冇蝕過錢喎！好似我第一張碟，我本來諗住賣到二千隻，已經好開心o架啦！點知最後係賣到三萬囉！依家我啲碟嘅銷量，起碼都有五千張，touch wood（又摸枱），好賣過好多主流歌手o架！幫人搞show，我都只係要出幾十萬，最後都至少會賺幾萬o架！所以單靠賣唱片同門票，真係生存到o架！」

然後，他又自己在口噏噏：「呀！你話血汗史，都有嘅……其實都唔係好血汗，係我真係嬲囉！舊年呢，我寫咗兩首歌畀兩個藝人，結果冇攞到我首歌，但轉個頭，喺佢哋嘅碟度，就有我曲詞嗰個concept，不過係搵咗其他人再寫過，真係Xo架！佢哋想自己hold番個right咋嘛！OK，咁我咪攞番我嗰兩首歌，轉一轉佢，自己出囉！我唔使靠人哋o架！反正我冇乜嘢多，（即做了一個很得戚的表情）橋多！哈哈哈！」

嘥我時間

一峰形容，他出身草根，所以冇乜嘢未捱過。「我喺坪石邨大，只係一個屋邨仔，三百幾呎住七個人：爹哋媽咪、我、二汶、兩個姑姐同阿嫲。屋企管教得好嚴，唔畀出街，連出走廊玩都唔得！咁我舅父送咗個結他畀我，我咪用個結他解悶囉！」

他說，從小到大所有屬於自己的事情，都是由自己話晒事。「我未試過冇得揀o架！唯一一樣令我後悔一世嘅，係媽咪逼我讀大學，我讀咗囉！讀醫生、律師就話有用啫，我喺城大讀商業嘅，你話有乜用先？用嚟幫我run間公司？冇用！唔關事！係，嗰三年識咗啲同學、老師係好好，但大學呢樣嘢，真係好嘥我時間！我嗰陣走晒堂去晒睇戲寫歌，個lecturer喺度講緊課時，我直情攤晒啲嘢出嚟寫歌！我真係好衰呀，嘥晒大家啲資源，又嘥咗人哋個學位！雖然我都有自己畀學費，但學到嘅嘢係零！所以我奉勸啲年輕人，如果一早就知自己想做啲乜，做！讀書同大學並唔係一個避難所囉！」

要是當年沒有選擇讀大學，又會點呢？「寫多啲歌囉！」對呀，這樣可能會賺到更多錢啊。「咁就未必！冇包生仔o架嘛！但會更有意義囉，咪當磨利刀囉！」

之但係呢，如果當年入大學是修讀音樂系，那又會否覺得嘥時間呢？ 「如果我係讀音樂系？咁又唔會喎！」

咁咪即係唔關讀唔讀大學事囉。

林一峰說，入行以來，他幸運地從未遇過對他衰的人。

我想，這是跟他擁有一張令人睇見都肉緊的BB臉，以及那只有五呎三或四的身高有關。「嗯，其實我雖然細細粒咋，但我身形都係黃金比例o架！我隨時都可以練到朱古力肌，有埋就仲perfect！」

這幅後記照片，他所穿的褲子是他自己揀選的，他一看便喜歡，更立刻買了下來，即着，滿心歡喜便跟攝影師姐姐走出店外拍照。

殊不知一看相機上的mon，褲子竟變成了3D，凸顯了他的「百慕達三角」！我們一眾吱吱喳喳的女人仔團團圍着看，全都被他相中的「神鵰」嚇窒。「再影過啦，現神鵰唔緊要，最緊要靚！依家咁好似唔係咁靚囉。」一峰說。

忽發奇想，要是為一峰出「神獸卡」，大概應該是這樣的。