Do姐鄭裕玲和艾粒，形象大反差，前者出名做事認真嚴謹，後者騎呢惡搞見稱，兩者走在一起，卻竟然是一個出奇地有默契的組合！難怪艾粒最近推出新電台節目《口水多過浪花》，也主動找Do姐來坐鎮，齊齊開咪在大氣中講吓懷舊吹吹水，嘻嘻哈哈一個下午。

訪問當日，節目還未出街，但三個人三把口，談到每個話題，你一言、我一語，已恍如為節目來個熱身，撇開了電視框框，其實他們更好玩！

「上次做《逐格鬥》呢，次次都係講嗰幾句嘢……」Do姐說。

「係呢！」少爺占在旁和應。

「冇乜嘢新嘢o架，次次都係：『總司令……』跟住就點點點，又話遊戲開始……」Do姐續說。

「然後就話節目尾聲，邊個贏……」當奴接着補充。

「係囉，就係咁咋！」Do姐說。

「所以依家呢個電台節目最後出嚟，都唔知個效果係點o架……」少爺占又謂。

「係點？好痛苦囉！」Do姐搶着笑說，隨即引來一陣笑聲。

如此這般，這個二十分鐘的訪問查實是由大量笑聲，再加他們一人一句搭訕搭出來的，或許不夠深情，或許有些無聊，但開開心心就好了，娛樂嘛。

上靶下靶

艾粒說，想到找Do姐合作做節目，只因他們想調換一下「莊閒」位置。「我哋開咪開咗咁耐，全電台都已經知我哋好惡，通常都係做上靶。我哋想試吓調番轉，做下靶會係點呢？諗咗好耐，有冇一個head得住我哋嘅人呢……」Do姐在旁插嘴：「有呀，你哋話仲有個俞琤可以head住你哋呀嘛！」當奴點點頭回應：「係呀！」Do隨即一臉不屑：「佢睬你都有味啦！」眾人隨即笑起來。

笑完，阿占繼續解釋：「諗到搵Do姐，因為我哋做過《逐格鬥》做得好開心嘛！」Do姐又再插嘴：「但我好niceo架喎，未必係上靶嚟o架喎！」阿占恍然大悟：「諗諗吓其實又真係喎……」Do姐馬上和應：「咁樣呀，咁個節目不如算啦！哈哈哈哈！」

我問艾粒，上次三人合作《逐格鬥》，Do姐做電視的日子這麼長，理所當然是由她做主導；然而，論到開咪做電台節目嘛……「係喎，咁邊個係主導先？」我還未說完，Do姐已質問他們。「嗯……今次冇話主唔主導嘅……一team人冇話分主次嘅……」兩人支支吾吾地說。

Do姐隨即叉着腰，語氣滲着「恐嚇」成分地說：「咁嘅咩？我大牌嚟o架喎！」兩人忍不住聲笑起來。「咁梗係你做主導啦！」當奴謂，接着反問我：「你有冇留意我冇正面望過阿Do姐呀？我唔敢正面望佢o架！」在旁的阿占此時笑得更大聲。

上靶下靶其實已經很清楚。

上周五，三人為新節目舉行記招，適逢Do姐生日，艾粒送上蛋糕之餘，更即場契她做契妹。

除了開咪做電台節目，Do姐最近也會客串《蝦仔爹哋》舞台劇。

早前當奴單飛，跟雲海合作演出〈骷髏頭〉。

快啲收工

這個新節目，以懷舊做主題，暫定三個月。Do姐說，這次答應他們合作開咪，除了因為酬勞合理，還有一個更簡單的原因。「四至六點，我得閒呀嘛！」啤……

「我上晝做運動、做瑜伽，跟住就食晏，夜晚又可能去食吓飯，或者留喺屋企睇吓電視，下晝四至六，好似好得閒喎，咁呢兩位仁兄又合作過，我覺得佢哋幾乖，quite nice啦！（商業）二台我又冇做過，開開心心兩個鐘頭，我咪冇乜所謂囉！」

她說，為了這個節目，她也會親自「碌卡」邀請嘉賓接受訪問。「反正我成日喺TVB都只係喺台慶先見到啲同事，有陣時邊個打邊個，有啲原來好紅嗰喎，我都唔知o架！」此時，只見艾粒兩人無厘頭在勁笑。

去年《逐格鬥》，Do姐和艾粒首次合作，三個最大默契，都是想快快趣趣收工。

於十多年前曾在電台開過咪，Do姐形容，做電台節目始終比較輕鬆，所以沒有壓力可言。「好多嘢其實同上次合作《逐格鬥》一樣理念呀，都係希望早啲收工，唔好麻煩！如果個嘉賓明知會輸，唔該唔好搞咁多嘢，快快趣趣啦！」艾粒即異口同聲和應：「我哋嗰陣好鼓勵人輸o架！」

忽然，Do姐有點擔心地問當奴：「喂，你哋嗰度（電台）冇camera影住o架嘛？」當奴正經地答道：「冇，但門口有好多狗仔隊車o架。」「係咩？」「多o架、多o架、多o架！」「咁如果日日返工，都冇乜嘢好影啦！」「影，影頭一個禮拜囉，一定會。我預計到。」在旁的阿占聽着聽着，又爆笑起來。

艾粒以外，少爺占還會主力他的「野仔」樂隊。

尊師重道

Do姐向來處事作風認真又嚴謹，我問艾粒，經過上次《逐格鬥》的合作，對着她沒有壓力嗎？阿占說：「上次Do姐提點我哋最多，係叫我哋企後少少去嗰盞燈度：『！呢個燈最靚呀！係嘛？』總之跟住Do姐企邊，我哋企邊就得啦！」Do姐露出滿意的笑容來：「吓，你又記得o架喎！」「記得！你仲話我：『寒背呀喂！昂高啲！』咁囉！都係出鏡嘅嘢囉！」Do姐的笑容顯得更滿意。

阿占繼續說：「其實Do姐唔惡o架！funny guy嚟o架！佢好似畀大家印象好惡，連家庭觀眾都會驚咗佢咁！」Do姐也忍不住說：「係囉！我都唔明點解！哈哈！」「Do姐近年最惡，都係港男嗰陣，佢叫啲評判（高八度地尖叫）：『scoring please！（畀分啦唔該！）』嗰吓最惡囉！」大家笑起來，Do姐即睥着他。

當奴亦補充：「對住Do姐，唔可以話係壓力，應該係話尊敬囉！我哋係驚做錯嘢，驚符合唔到Do姐要求。其實佢真係唔惡o架！你有冇睇到街口嗰張（Do姐為瑜伽中心做代言人的）大海報？」隨即把雙手放到頭頂去，合十，模仿出海報中Do姐的瑜伽動作。「佢係咁樣對住大家笑o架！」

阿占看着看着，再次爆笑。Do姐沒他們好氣只說：「嗰張（海報）都影得算係咁o架啦！」

年輕有為

調番轉頭問Do姐，跟艾粒合作可有甚麼得着呢？「冇喎！暫時都冇！哈哈哈哈！」答的是艾粒。Do姐向他們皺皺眉才說：「等我知吓啲年輕人嘅嘢，唔會out-dated咁囉！」艾粒即向她擦晒鞋，指她才是年輕人，Do姐亦笑着說：「咁我咪畀佢哋知吓啲年輕人嘅嘢囉！哈哈！」

艾粒和應說，Do姐其實是個科技王。「佢又玩iPad。」阿占插口：「又電子書、又玩App。」當奴道：「我哋介紹乜嘢App畀佢，佢都好藐咁話唔好玩o架！哈哈哈！」

那麼，在Do姐眼中，兩人分別又有甚麼優點呢？Do姐先說阿占：「佢？佢好識投資o架原來！你冇理由唔知呀嘛？佢又有舖頭、又係地主……」阿占尷尬地苦笑起來：「嘩！我都想喎！」

接着，她又輪到講當奴：「呢個？呢個好識諗，起碼有層樓供緊，又娶埋老婆……」此時，當奴臉紅了，搶着對Do姐有點語無倫次：「Do姐，夠啦，你唔好再講喇！我嚟緊有個內衣品牌，諗住搵你做代言人……最多畀你擺番呢個甫士呀！」說罷，當奴又再一次模仿Do姐雙手合十放在頭頂的瑜伽甫士，引得大家又再哄堂大笑。

開咪以外

聽回Do姐和艾粒這個訪問錄音，就像在收聽他們做節目，巴啦巴啦、哈哈哈哈，他們三個確實有着很有趣的默契。

既然如此，可有想過第三次合作的話，會搞甚麼嗎？當奴說：「開畫廊囉！阿占同Do姐都識畫畫呀嘛，有得做o架我覺得。」Do姐反問他：「你都識畫畫o架呵？我記得你嗰次《華麗明星賽》畫咗粒『黑豆』呀！」當奴即更正她：「唔係！係漆黑嘅環境有一點紅色！」哈哈哈哈，又一陣笑聲。

Do姐又再反問他：「咁點解你唔講吓做啲舞台嘢呢？」當奴再正經地回答：「唉，咁你哋會答o架嘛！」Do姐幾乎翻白眼，惟有說：「咁我哋就排一樣嘢可以走埠珠江三角洲啦！總之唔好淨係喺香港，做舞台嘢，排就排成個月，做就只做嗰三場，嘥晒啲時間！」

阿占隨即搭嗲：「我哋希望Do姐帶我哋去登台！佢成日去登台o架嘛！」Do姐便反問他：「咁你有乜嘢喺台上嘅talent呀？」「幫你拎嘢囉！哈哈哈哈！或者不如合作介紹樓盤吖，好似《更上一層樓》嗰啲呢，但我哋只係sell唔靚嘅樓，Do姐只需要做生招牌就得o架啦！」「咁係咪要我介紹劏房呀？」

我建議他們不如試試一齊做瑜伽，他們又再巴啦巴啦起來。「嘩，好辛苦o架！」「你哋兩個男仔檻住條底褲做咪得囉！」「我條底褲太大啦！」

我不敢再搭嘴了，要不然這個訪問應該可以再講多三個鐘……。

Do姐早前旅遊日本後，送給艾粒的iPhone殼手信，可見她其實也很錫兩人。