明星靚相大分享☆

原名粘冰冰嘅黃婉曼（ Icy）， 13歲時由內地來香港讀書，高考後考入中大新聞與傳播學院，未畢業就到《新聞透視》實習，去年轉做天氣女郎，憑一句「帶大家跳出香港睇天氣」及超勁上圍火速爆紅，近日更因在無綫主持《世界盃動起來》而人氣再升！

住男友家唔認同居

不過成為宅男女神嘅 Icy生活並冇變化，放工多是與拍拖兩年、在無綫新聞部任職攝影師的男友曾志釗見面。上周五（ 11日），本刊發現她工作後又會男友，但兩人並不是回早前出入的葵涌舊樓，而是驅車往沙田第一城。 Icy換衫後再往 apm做騷，明顯在上址居住，但 Icy卻堅稱兩人並非同居：「其實係因為我屋企人都留喺內地，我一個喺香港生活，有時做嘢夜咗咪會留喺男友屋企，同男友屋企人一齊住。雖然我同佢家人相處得都幾好，不過始終唔係咁方便，依家我準備租屋搬出去住。」
呢期當紅嘅 Icy密密接 job冇停手，不過佢仍然不失慳家性格：「以前我會舊衫循環再着，但為咗出騷，依家我都捨得去 I.T用成千蚊買件衫。呢排雖然係搵錢多咗，不過相對 set頭置裝費都大咗。我咁大個女依家先至叫儲到少少錢，不過要買樓嘅話又未儲夠首期，如果父母可以幫我俾首期就好喇！」

儲錢買樓再結婚

問 Icy儲錢買樓，是否打算同男友結婚？原來她連生仔都諗埋，非常有計劃。她甜笑說：「男友基本上合乎我想要嘅條件，不過唔可以話『合乎晒』，免得佢囂張！如果要結婚點都要一年時間籌備，今年咁忙，一定唔會。依家拍拖都幾穩定，男友同我都想趁後生搵多啲錢，等將來生活好啲，有層樓將來小朋友起碼有個地方生活。」
為了銀， Icy今年 2月離開無綫，任職內地中國移動旗下雜誌《 12580尚悠》總編輯。一眾網友對女神告別紛紛留言，希望令她回歸報天氣，不過 Icy就話分身不暇：「唔報天氣唔係因為 TVB嘅關係，而係我出面有好多嘢做，尤其係今個月世界盃開始，每晚都要返 TVB做『戰雲密佈』，又幫商場做推廣活動，其間仲要做總編同寫報紙專欄，太多嘢做兼顧唔到。」粗略估計， Icy於世界盃期間收入高達 40萬：其中包括為 apm講波一個月，酬勞近 25萬；無綫《世界盃動起來》 30集，每集約$3,000，一個月勁賺 9萬；再加總編及《 am730》專欄等酬勞，難怪她自言現時一個月收入，等如報天氣一年人工！
Icy坦言世界盃之後想做才女：「我想嘗試新工作，好似做旅遊同飲食主持，或者一啲文靜嘅工作，不過一定要有知識成分，因為我一直都想走才女路線。」

女主播愛攝影師

做電視台女主播，對得最多就係一班攝影師，所以有不少攝影師近水樓台先得月，可以同女主播拍拖，甚至開花結果！