21歲 Mia雖然已是兩子之母，但因與錢景峰拍拖，模媽身份亦夠晒綽頭，輕易在八模中成功突圍。
娛樂頂點
郭秀雲拆散鴛鴦 姊弟戀半年玩完 潮媽 Mia：佢一樣係帶仔搵食
2010年06月18日
新 8模成員之一 Mia（陳靜儀），一出道就自爆是兩孩之母，更與郭秀雲兒子錢景峰行埋。無奈拍拖僅僅半年，日前 Mia在 facebook自爆和男友分手。有指二人分手，是郭秀雲使橫手拆散鴛鴦。
因伯母嫌棄未能成功箍實有米男友， Mia不甘示弱反擊：「我對得住自己，希望啲人唔好再用有色眼鏡睇我，佢（郭秀雲）都一樣帶仔搵食。」 Mia字字鏗鏘，皆因選美出身的郭秀雲，當年和錢小豪秘密結婚生仔，離婚後就帶埋個仔返頭嫁入豪門，遭遇比 Mia更傳奇。
21歲的 Mia（陳靜儀）因與郭秀雲之子錢景峰拍拖，成為新八模風頭躉。但二人拍拖僅半年， Mia周二晚（ 15日）忽然在 facebook自爆與錢景峰分手， Mia表示：「很累了，真的很累了，我明白到做媽媽難，做單親媽媽更難，我吾（唔）知我一個人可以再撐到何時，現實與想像永遠不一樣，我和你，是時候停下來，祝福你，永遠幸福快樂。」
對於女友提出分手，錢景峰亦即時在 facebook回應 Mia，但言語間似有難言之隱，他說：「多謝你，真係多謝你，我真係唔知點話俾你聽，我有幾愛你……陳靜儀你點都要永遠幸福快樂，你是一個很好很好的人。」
有兩子之母的 Mia，有指 16歲讀中四時俾人搞大個肚，意外生完兩件之後便和前夫離婚。 19歲背負「失婚婦人」之名闖蕩模界。年前與比她還細兩年、郭秀雲兒子錢景峰撻着，惹來郭秀雲不滿，更曾暗示 Mia冇可能入門。她說：「做朋友冇所謂。呢次唔會係佢最後一次拍拖。」
Mia日前在 facebook自爆與錢景峰分手（圖），錢即時作出回應，但不久便自行刪走留言。
想做錢家新抱？唔使旨意！（設計對白）
一向緊張囝囝前途的郭秀雲，一早批死兒子和 Mia的姊弟戀只屬短暫式：「後生仔火花只係一剎那，總之佢唔會係我個仔最後一個女友。」
郭秀雲經濟封鎖
Mia和錢景峰在 facebook的留言依然愛得癡纏，但二人無奈分手，據知全因郭秀雲多翻阻撓，多次出言嫌棄之餘，更對兒子實施全面經濟封鎖。「 Sharon（郭洋名）最初覺得個仔只係玩玩吓，口頭警告叫佢唔好玩上身，不過後來見佢哋咁認真，就開始驚。其實 Sharon私底下都同個女仔傾過，不過始終冇用，所以佢近呢個月開始對個仔經濟封鎖，仲同個仔講，如果你要拍拖，就要自己賺錢。」知情人士說。
19歲的錢景峰和 Mia年頭因出席《家有囍事 2010》活動撻着，有指 Mia因結識有米男友，即飛起住屋邨賣雪糕的前夫。誰知二人行埋半年便告分手。
比起郭秀雲，做老竇嘅錢小豪對 Mia態度正面得多。「我之前都有見過佢，大家都有點吓頭。兩子之母？依家咩年代呀，冇所謂嘅，我覺得佢幾靚女呀！」
獨力撫養仔女
5月 28日（周五），穿着背心熱褲拖住個仔的 Mia，出現於大埔太和邨的幼稚園接女兒放學。據知 Mia離婚前和前夫達成協議， Mia取得一對子女的撫養權。為了賺奶粉錢， Mia除了剝衫做 o靚模，還在馬鞍山中心開舖賣衫。
Mia和錢景峰被爆分手後，本刊曾多次致電 Mia，不過截稿前仍未獲回覆。早前 Mia曾向記者暗示有人睇唔起佢，令她和錢的戀情告急。她說：「我喺街撞過佢（郭秀雲）兩次，但冇同佢講過嘢。我對得住自己，希望啲人唔好再用有色眼鏡睇我。佢都一樣帶仔搵食，其實我同 Andrew拍咗半年拖，佢都見過我嘅小朋友。 o靚模都係一份工，着比堅尼唔係 cheap。我承認以前好錯，但依家唯一能夠做就係賺多啲錢，盡力照顧佢哋。」本刊連日多次致電郭秀雲，但至截稿前仍未有回覆。
潮媽接放學
Mia現時獨力照顧分別三歲和五歲的一對仔女，她即使再忙，每日都會堅持接囡囡放學。當日 Mia一身 o靚模打扮到屋邨幼稚園接放學，與其他師奶相比，明顯潮得多。
落舖巡業務
在馬鞍山中心開舖賣女裝的 Mia，當日接完放學後，隨即到舖頭巡視業務，更落手落腳幫手招呼客人。
麥記醫肚
平時極少煮飯的 Mia，當日晏晝便帶一對仔女到附近商場麥記醫肚。
宅男輪住影
話晒 8模新崛起，模媽 Mia更成宅男偶像。即使當日拖住對仔女，但仍有大批宅男輪住同佢影相。
老嫩同樣愛得激
現年 41歲的郭秀雲， 88年參加首屆國際華裔小姐選美獲得秀軍， 21歲的郭忽然和錢小豪在澳洲秘密結婚，婚後隨即誕下兒子錢景峰，但二人不足三年便離婚收場。離婚後，當時郭秀雲帶着兒子，為搵食經常以三點式泳衣示人，曾拍電影《我為卿狂》和《省港流鶯》。直至 03年結識已故「鋼鐵大王」龐鼎元之子龐傑才慢慢淡出娛圈。傳奇身世和模媽 Mia十足倒模一樣，難怪被 Mia反寸還擊。
Mia雖然離婚，但和前夫感情不錯，她亦間中相約前夫和一對仔女天倫樂。
自從下嫁龐傑後，郭秀雲身份、生活三級跳，一洗以往性感女星形象。
留言列表
