肥媽︰佢咁嘅態度好過分！（真實對白）
韋綺珊︰鬧人都要顧吓人哋感受！（真實對白）
杜麗莎︰ My God！我真係咁乞人憎咩？（設計對白）
無論係重量級人馬肥媽（中），抑或表妹韋綺珊（左），杜麗莎（右）一樣冇面俾照鬧。
媽咪姐手帳
肥媽韋綺珊 狂數惡婆杜麗莎劣行
2010年06月18日
上期《忽然 1周》報道杜麗莎嘅惡婆劣行後，媽咪姐就收到好多二五報料，原來佢鋪鬧人踩人癮係已經發作多年，其中陳潔靈老友肥媽，當年都俾杜麗莎蝦過鬧過，積怨甚深。
多年來俾杜麗莎連恰幾鋪嘅肥媽，今時今日再提對方時都句句有骨：「係咪發生過嗰啲事，我唔記得！我係大人，識得適當時候失憶就失憶。不過近日我都有留意佢（杜麗莎）同陳潔靈嘅新聞，作為陳潔靈好姊妹，見佢俾人恰梗係唔開心，佢對 Teresa（杜麗莎）咁好， Teresa用咁嘅態度對番佢就好過分！」
原來，當年搞個唱蝕大錢，要敗走到美國展開新生活嘅杜麗莎，曾得陳潔靈相助。知情者說：「佢當時跟第二任老公生咗小朋友，為養家佢一度要做保險經紀。 Elisa（陳潔靈）知佢仲想唱歌，所以成日叫自己經理人搵騷俾 Teresa做，幫佢重建唱歌事業。所以大家見佢依家掂咗，就咁樣對陳潔靈，覺得佢忘恩。」
媽咪姐求證陳潔靈經理人 Dora，她承認當年有幫 Teresa接騷：「個騷啱 Teresa咪叫埋佢做囉。不過大家唔好再將新聞扯埋落 Elisa度，因為佢唔想再有是非。」
韋綺珊：佢有鬧過我！
肥媽同陳潔靈好老友，所以好睇唔過眼老友俾人恰。
杜麗莎惡名遠播，連佢表妹韋綺姍（ Rita）都同佢反晒面。據知 Rita當年出道不久，就俾傳媒揭發佢係 Teresa表妹。 Rita即時收到杜麗莎電話，狂鬧 Rita唔好借佢個名上位，仲話根本唔同級數，叫表妹唔好妄想可以同佢相比。說話傷盡人家自尊心，令一場親戚關係嘅兩人不相往來多年。媽咪姐就此事問 Rita，佢一聽杜麗莎個名都打個冷震咁話：「當年傳媒將佢同我比較我都唔想 o架，關我咩事，佢係有鬧過我，但念在一場親戚咪『嗗』聲吞咗佢，大家好多年無聯絡。其實人人都有脾氣，不過佢鬧人都要顧吓人哋感受至得。我都係唔敢講太多，我驚又接到佢嘅鬧人電話。」
杜麗莎惡行表
杜麗莎同兩個女兒喺台前演出十分溫馨，原來喺後台就鬧爆肥媽老公。
藐爆行家
二五報料話，十幾年前肥媽一次同杜麗莎同台演出，自視甚高嘅杜麗莎覺得對手唔同級數，喺後台對住肥媽唔單止嘴藐藐，佢趁人哋綵排時，企喺台邊踩爆：「唱得大聲有鬼用，唱成咁返屋企啦！」
肥媽老公都俾佢鬧
06年肥媽同杜麗莎又喺一個水機產品搞嘅音樂會狹路相逢，肥媽老公喺後台攞相機諗住幫老婆影啲花絮相，點知杜麗莎竟惡爆嚴禁佢拍照：「呢度唔准影相，唔准影我！」肥媽老公都唔弱，即時還拖：「你唔係我老婆，冇興趣影你！」
霸住 live band
事隔一年，有線搞歌唱比賽，搵嚟杜麗莎同肥媽做表演嘉賓。杜要求有線請隊 live band為佢伴奏，有線見出咗錢請隊 band，不如用盡佢，建議幫埋肥媽伴奏。點知杜知悉後即發揮霸氣本色，唔准肥媽用隊 band，仲鬧爆啲工作人員多事。
《巨聲 2》恢復和諧
冇咗惡婆杜麗莎，周日（ 13日）錄影嘅新一輯《巨聲 2》成班評判（左起） Janae Chan、陳奐仁、陳潔靈、倫永亮同埋單立文相處非常融洽。
本周日（ 13日），無咗惡婆杜麗莎嘅《巨聲 2》回復天下太平，一班評判有講有笑之餘，仲不忘暗寸杜麗莎嚟做搞笑話題。
有參賽者唱完，倫永亮俾咗評語，單立文話：「乜你講得咁溫和？」
倫永亮望住陳潔靈：「我要講嘢小心啲，否則會俾人話我好似杜老師咁鬧人，俾人點火撥扇（查實係搧風點火）！
陳潔靈：「我講嘢好有見地 o架！」
森美即插嘴：「咁你即係話某人無見地啦！」說罷成班評判同主持都笑餐飽。
田蕊妮：「依家啲氣氛真係好唔同！」
留言列表
