忽然1周 740 期獨家專訪　發律師信與「金牌」解約　傅穎落淚：我食緊穀種 @ 明星靚相大分享☆

餐廳爆煲
本周三（ 30日） Theresa在活動中自爆已發律師信給金牌。之後她到寓所附近餐廳醫肚，本刊記者上前與她做了個獨家訪問，說到激動之處， Theresa忍不住落淚。
封面故事
獨家專訪　發律師信與「金牌」解約　傅穎落淚：我食緊穀種
2009年10月02日
隨著金牌大風地震，太子基揸旗朝代展開，唔埋太子黨嘅人實行大逃亡。早前 Miki（楊愛瑾）率先成功解約甩身，重投舊公司 Starz People懷抱。本周三（ 30日），又傳出 Kary（吳雨霏）對金牌心灰意冷，秘密搵新公司，務求逃出生天。同日 Theresa（傅穎）出席活動時更自爆已發律師信給金牌，正式要求解約。在金牌女藝人中，只得太子黨 Stephy一人獨大。
據知長期被金牌一姐 Stephy打壓的 Theresa， 3個月前已求公司「放生」自己，雖然 CEO陳輝虹口講無條件放人，但一直採用拖字訣。遭公司投閒置散、自生自滅嘅 Theresa忍無可忍，才急急發律師信要求金牌解約。事後本刊記者和 Theresa做了獨家訪問，她坦承前路茫茫，又要生活又要養家，壓力爆煲的她忍不住落淚說：「我食緊穀種。」
隨着鄭中基上場，與他老死的 Stephy、方力申等太子黨勢力即時大增。 Stephy一向視 Theresa（傅穎）為死敵，又冧掂太子基心腹 Elaine，令 Theresa在金牌形勢岌岌可危。雖然跟金牌尚有 2年生約，但 Theresa求走心切， 3個月前更已與好姊妹 Miki密謀出路，主動向公司要求解約求生，但 Theresa想逃出生天卻不如 Miki般順利。

Stephy 陰招得逞

Kary Miki雞飛狗走

出席活動　強顏歡笑

本周三出席活動的 Theresa一直強顏歡笑，被問到 Stephy會否為她走而開心時， Theresa一聽到呢個問題更加唔識笑，只話：「唔答！」

會上 Theresa見番已轉會的好姊妹 Miki，但因準備公布發律師信解約一事，故起初兩人無乜交談。

直至宣布完跟金牌解約，鬆一口氣的 Theresa才走埋 Miki身邊密密傾。

解約一味拖

喊住過生日
早前 Theresa開生日會，趁記者及金牌同事走晒，淨係對住班 fans的她不再掩飾心情，為工作受屈狂喊，要 fans遞上紙巾安慰。

據知 Miki解約快過打針，全因得有米男友郭永淳（永安集團太子爺）撐腰，既出面幫她傾解約，亦打本給她過檔出唱片，一圓歌星夢。至於 Kary亦因有富爸爸做背後投資者，去留可以自己話事。「 Kary查實係自資出唱片，等同有『免解金牌』，話走就走無難度。 Theresa份合約由金牌及 model公司 Talent Bang共同擁有，但公司一直闊佬懶理，直至記者追問陳輝虹 Theresa係咪要解約，佢先話同意無條件俾 Theresa走。不過之後陳輝虹根本冇行動，佢嘅理由係未與共同擁有 Theresa經理人合約嘅 Talent Bang達成共識。」知情者說。
Theresa：我覺得好辛苦
解約事件拉鋸幾個月， Theresa為換取自由決定主動出擊，於本周三（ 30日）向金牌及 Talent Bang兩間公司正式提出解約，更在當日出席的慈善活動中主動向記者公布此事。記者多次追問她離開金牌，是否跟她不埋太子黨有關，她說：「 Ronald（鄭中基）好少搞聚會，我都唔鍾意應酬。」
記者又直接問她， Stephy會唔會因此好開心。她立即表示：「唔答。（會唔會覺得前路茫茫？）一個人承擔係有啲吃力，但呢個係成長嘅一課。」
離開記者會後 Theresa返回柴灣寓所，於晚上換回便服外出醫肚，本刊記者上前追問她解約心情時，起初她不願回答，但在記者追問下，她忍不住說：「我要一個人應付幾邊合約嘅問題，又要面對是非傳聞，我覺得好辛苦。我唔想家人擔心，都唔敢同佢哋講解約嘅事。呢件事（解約）真係會定我生死，我好驚自己事業就咁完。」
有傳解約前有多間經理人公司跟她接洽過檔，包括林小明的寰宇及李國興的美亞，還有林嘉欣及劉心悠所屬的星皓，亦曾跟她接洽。

Theresa形容自己食緊穀種。本周三（ 30日），她出席活動前，便乘巴士前往尖沙嘴整髮，非常慳家。

下午 3時多左一袋右一袋，戴着口罩的 Theresa喺柴灣藍灣半島寓所出現。

食包醫肚
她步入商場的快餐店，點了一個漢堡包餐後極速離開。

遮遮掩掩搭巴士
以為 Theresa會上保母車，點知她走到巴士站上了一架過海隧道巴士。

上車後， Theresa除下口罩，呆呆望着窗外。最後車上乘客漸多， Theresa即戴番口罩（小圖），避免有人認出。

之後她在尖沙嘴整髮後會合助手，兩人登上門外的保母車到山頂出席活動， Theresa終於唔再需要迫巴士。

大不了做侍應
問她是否已搵定後路， Theresa承認有跟幾間公司傾談過，但仍是初步階段，為此她甚至作好最壞打算隨時轉行，為生活做侍應都肯。「若果未傾到新公司，我已經諗定到外國報讀演藝課程，唔夠錢讀我咪半工讀，去到外地做乜都無所謂，做侍應都得，總之唔想加重家人負擔。」
當記者問她是否面對經濟問題，生活是否開始難撐時， Theresa情緒開始激動，未幾更強忍淚水哽咽地說：「暫時仲可以維持得到，但係靠食住啲積蓄。（咁即係食穀種！）可以咁講！」
有指金牌曾叫 Theresa收聲，不准講半口公司不是，因此當記者問到與 Stephy關係時，她只說：「同 Stephy不和嘅是非我唔答，身邊朋友會知咩事，同 Stephy、 Miki、 Kary曾經係 Cookies組合，總算一場緣分，希望每個人都發展順利。至於公司，我都好多謝佢俾我嘅機會，係呢個地方令我學咗好多嘢，包括 EQ，呢個地方令我長大咗好多。（你係咪受咗妥屈唔敢講？）……」 Theresa沉思數秒，最後搖頭不說。
之後她說要感激 Paco及楊千嬅，「多謝 Paco喺我最多是非時相信我有盡力。多謝千嬅，我入金牌後等咗兩年無碟出，係千嬅喺一個飯局度求 Paco幫我出碟，我同佢唔熟佢都咁幫我，好感激。」

一露熱爆
08年書展， Theresa走到天橋 sell自己本書，點知一陣怪風將條短裙吹起露底，經此一露，成為熱話，人氣蓋過 Stephy。《 Face》圖片

因未能克服唱 Live壓力， Theresa接「鄧走音」棒，唱歌走晒音，慘被網友冠以歌藝屎上最強。

每月收入萬多元
據知 Theresa一提到錢忍唔住落淚，是緣於她長期被打壓，導致無啖好食所致。知情者說：「 Theresa呢幾個月仲有登台同活動，好多都係 Paco之前幫佢傾落，好似 Budwiser喺內地嘅騷。 08年 Theresa出完寫真集反應好，佢每個月收入都有 6位數字，若果唔係被打壓，仲可以搵更多錢。不過佢亦唔爭氣，搞出個『傅走音』嘅朵，對佢工作更加有影響。」據悉近月 Theresa收入已跌至萬多元，連交租都唔夠，難怪近日搬離月租萬五蚊的西環泓都，跟任職傳媒的女友人夾份租住柴灣。
Stephy陰招阻出書

千嬅見 Theresa在 04年開始，坐了兩年冷板櫈，唔想師妹無飯開，她開口求 Paco幫 Theresa出碟，為 Theresa在金牌送暖。

冰封三尺非一日之寒，迫使 Theresa堅決要走，是太子黨的 Stephy屢次出招有關。自 08年推出處女寫真《 Smiling》後， Theresa一登成為宅男女神，走勢直逼 Stephy，自此便傳出 Stephy與 Theresa不和升級。據知 Stephy冧掂負責接 Job的太子基心腹 Elaine聯手對抗，以無期及開天殺價招數為 Theresa推 job，令有市有價的她接 job量大減。
據知《美女廚房》第二輯，監製錢國偉有安排 Theresa在嘉賓名單之列，但最後金牌女將如 Stephy、 Kary、甚至無乜知名度嘅唐素琪都被邀上節目，獨欠 Theresa。據知是與 Stephy傳緋聞的方力申背後阻止，唔俾佢下廚。「其實書展前， Stephy因唔想同死敵硬撼，於是搵男友方力申幫口，加埋太子基心腹 Elaine把口，起初金牌真係想唔俾 Theresa出繪本，所以遲遲唔同「皇冠」簽約，點知陳輝虹向外話會幫 Theresa出書，講咗就收唔番。」知情者透露。之後就傳出在書展期間， Stephy叫公司同事 call多啲 fans到書展為自己撐場，要聲勢蓋過 Theresa。
踢走咗 Theresa， Kary、 Miki又走埋，金牌只剩番無威脅嘅唐素琪， Stephy絕對贏晒。
打壓事件簿
今年五月太子基上場垂簾聽政，黃栢高被調任金牌大風香港區主席兼被飛出經理人部門， Theresa即時被太子黨打壓。
同事撐場為做戲
Theresa今年 25歲生日，由 fans夾錢幫佢搞生日會，公司當日雖然有派同事撐場，但係到現場採訪記者一走，公司同事即鳥獸散，擺明只係喺記者面前做場戲。
孤零冇車坐
8月初金牌大風舉行周年聚會筵開九席，中港台三地藝人聚首一堂， Theresa冇得同 Stephy坐第一席。最慘仲係公司其他藝人個個有公司車坐，只得佢冇，胡彥斌見到咁做好心俾 Theresa黐車一齊去，但走嗰程 Theresa就要自己搭的士。
出書自費宣傳
七月書展皇冠出版社邀請 Theresa出書，書展期間金牌認為 Theresa嘅書展活動不屬公司的宣傳計劃，因此車錢要佢自己俾，但賣書嘅作者版權費，金牌就照分。
出騷零助手
6月底 Theresa被安排到廣州 K場演出，但公司竟然冇安排助手跟身，連化妝、整頭都要一腳踢， Theresa演出時忍不住感觸落淚，之後將自己單拖拎喼嘅相放上 blog。
公司推 job
澳門係香港藝人嘅新掘金地，因為很多酒店都鍾意請藝人去唱騷，由舊年開始 Theresa就有好多邀請，但係俾公司以不同藉口推搪。據知早前東華在澳門搞籌款騷，大會要 Theresa，最後無故換上方力申，令 Theresa見財化水。

陳輝虹反擊
而有關金牌打壓 Theresa的事例，陳輝虹更逐點擊破，他說：「話同事影完相就走，相信唔係咁。話佢去廣州登台冇助手，其實助手係稍後同佢會合，唔係一齊出發啫。另外，話書展時要 Theresa自己俾車費，我相信冇咁嘅事。至於話公司幫佢推 job，轉 sell其他藝人，我諗呢啲唔合邏輯，藝人愈多工作公司就可以抽愈多佣金，邊可能唔俾佢做嘢。」
各有態度
Miki：「知道佢搞緊轉公司嘅事，之前喺網上面問候過佢。（支唔支持佢？）一定支持佢嘅意願。（有冇身同感受？）唔會，大家遭遇都唔一樣，希望佢開心啦！」
傅穎為跟金牌一刀兩斷，要出動律師信，金牌 CEO陳輝虹不認同她的做法，他說：「我一路都傾緊，但係合約有三個 party，除咗佢，我哋公司之外，仲有另一間公司，唔係刻意拖延，而係要等各方同意，所以收到律師信都好愕然。」至於鄭中基則不作回應。

Miki支持佢

陳輝虹好愕然

鄭中基冇回應

老闆點睇
傅穎解滿成功還我自由，隨時可以傾新公司合作，本刊特向多間經理人公司的負責人詢問，當中以星皓老闆王海峰最有興趣簽佢。

會幫佢
星皓老闆王海峰：「我覺得 Theresa幾好，近排有留意佢嘅新聞，如果我幫到嘅話都會幫佢。」

有興趣
寰宇高層 Bill Yeung代老闆林小明（圖）回應：「作為經理人公司，對有實力嘅藝人一定有興趣。個人而言覺得傅穎有實力，但一切等佢搞清楚合約先算。」

睇緣分
美亞旗下天下映畫高層褟嘉珍：「我哋製作電影亦有經理人部門，如果要搵人都先考慮旗下藝人先，喺我印象中，傅穎係個幾多新聞嘅藝人，有冇機會合作就要睇緣分。」

唔傾住
跟母親合組 Star Max的張敬軒，曾表示有興趣與自由身的 Theresa斟斟，記者再跟他聯絡，他的助手 Bella說：「我哋依家唔喺香港，喺外地準備開騷，暫時乜都唔傾住。」

娛樂八掛大放送★ 為食譜識飲識食街★ 任逍遙旅行萬里路 ★
科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳賽馬貼士提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 過期週刊及雜誌(4-6月刊)★ 過期週刊及雜誌(6月-8月刊)★ 過期週刊及雜誌(4-9月刊)☆