明星靚相大分享☆

陳冠希和家人於周二（ 15日）晚，到位於尖沙嘴馬可勃羅香港酒店的「夜上海」菜館食飯。據知陳冠希十分重視今次家庭飯局，早於一星期前已搵助手訂枱，為祖籍上海的父親陳澤民和家人慶祝瑞午節。

向前妻介紹男伴

Edison父母陳澤民和 Carol及兩個家姐陳麗華和陳見飛，於八時多到達菜館。記者發現還有一名約六呎高、青靚白淨，貌似林文龍的神秘恤衫男，一直尾隨陳澤民身後。之後一行五人揀選了菜館中央的六人枱坐下，陳澤民和 Carol則將他們之間的座位留給陳冠希，而恤衫男則坐在陳澤民身旁。
主角 Edison還未現身。離婚多年的陳澤民和 Carol，即使同枱都冇乜兩句，而嫩版林文龍亦明顯與陳家格格不入，經常唔出聲，更借尿循離開飯枱。當他如廁後返埋位，陳澤民便介紹他給前妻 Carol和家人認識，嫩版林文龍亦禮貌地向他們逐一點頭。眼見現場氣氛尷尬，陳見飛便提議預先點菜，更特登坐在父母之間打破悶局。其後現身的 Edison，一坐低便被父母輪流捉住傾偈，甚少和父母見面的 Edison亦好識做地兩邊「應酬」，之後更主動同阿媽影相留念。記者發現嫩版林文龍對陳澤民照顧周到，每次有餸上枱，都會先夾餸俾對方，之後開始和陳氏一家混熟， Carol甚至主動同嫩版林文龍傾偈。嘆完龍鬚桂魚絲、龍井蝦仁等上海名菜， Edison就俾現金埋單請客，盛惠三千蚊。

天台會合鬆人

飲飽食醉， Edison和家人步行到廣東道坐車離開。其間 Edison發現記者，便先行叫母親和兩位家姐上車。此時嫩版林文龍煞有介事地返回酒店，陳澤民一臉茫然，亦尷尬地返入酒店。之後記者發現二人前後腳出現在酒店旁的天台停車場，一同坐車離開。
陳澤民和 Carol早年離婚，不過兩人再見亦是朋友。 Edison初出道時，全家人亦會高調現身撐場。之後陳澤民經常被拍得與國內藝人胡兵等猛男過從甚密，一直採取不聞不問態度的 Carol，最終頂唔順有人「中途轉基」，而決定遠赴溫哥華定居。「 Carol雖然同前夫冇晒感情，但見到前夫身邊嘅男伴車輪咁轉，有邊個女人接受得到，所以佢哋早幾年真係冇乜來往。係個仔發生淫照單嘢，成家人嘅關係先緊密番， Carol先慢慢諗通接受事實！」知情人士透露。
作風一向低調的 Carol，難得返港撐 Edison之餘，又唔介意見埋老公的同性密友。果真如此， Edison返唔返到娛樂圈，都應該要開香檳慶祝。

米芝蓮 1星級食肆

位於尖沙嘴馬可勃羅香港酒店的「夜上海」，除主理正宗上海菜外，亦加插不少新派菜式。 09年和 10年分別獲選為米芝蓮精選和 1星級食肆。由於名牌效應，即使菜式價格偏貴亦座無虛席。不過記者食過幾款菜後，發覺菜式普遍只屬一般水準， 40元 4個生煎包，完全冇肉汁， 88元的炒年糕竟然冇味，唔明 Edison點解咁鍾意去！